HGB-02 వ్యాఖ్యానం కోసం సిద్ధం కావడం

మనము ఏదైనా ఒక పనిని ఆరంభించుటకు ముందు, దానికి తగిన సిద్ధపాట్లను చేయుట బుద్ధిగల పని అయ్యున్నది. లూకా సువార్తలో, ఒక గోపురమును నిర్మించాలని కోరి, సిద్ధపడకపోవుట వలన ఆ పనిని ముగించుటలో విఫలమైన ఒక వ్యక్తిని గూర్చి వర్ణిస్తూ యేసు స్వయంగా ఈ ఆలోచనకు ఒక ఉదాహరణను ఇచ్చాడు. వాస్తవానికి, లేఖనములను వ్యాఖ్యానించు విషయములో కూడా ఇదే నిజమైయున్నది. బైబిలును అవగాహన చేసుకొనుట అనునది ఒక సంక్లిష్టమైన పని మరియు దీనిలో అనేక విధములైన కార్యములు ఉంటాయి మరియు మన జీవిత కాలమంతా ఇది జరుగుతూ ఉంటుంది. కాబట్టి, సరియైన మార్గములలో బైబిలును వ్యాఖ్యానించుట కొరకు మనము సిద్ధపడాలి.

ఆయన మనకు లేఖనమును అనుగ్రహించాడు: వ్యాఖ్యానమునకు పునాదులు అను మన పాఠ్యక్రమములో ఇది రెండవ పాఠము, ఈ పాఠ్యక్రమము క్రీస్తు అనుచరులు బైబిలును ఎలా వ్యాఖ్యానించాలో విశదీకరించుట కొరకు అంకితం చేయబడింది. మరియు ఈ పాఠమునకు “వ్యాఖ్యానము కొరకు సిద్ధపాటు” అను శీర్షికనిచ్చాము, ఎందుకంటే లేఖనములను చదివి వాటిని వ్యాఖ్యానించుటకు ముందు మనకు సహాయకరముగా ఉండు కొన్ని విషయముల మీద మనము దృష్టిపెట్టబోవుచున్నాము.

ఈ పాఠములో, వ్యాఖ్యానము కొరకు మన వ్యక్తిగత సిద్ధపాటులోని రెండు కీలకమైన విషయములను మనము చూద్దాము. మొదటిగా, పరిశుద్ధాత్మ యొక్క పరిచర్య మీద మనము ఆధారపడవలసిన విధానమును పరిగణిద్దాము. రెండవదిగా, మన సొంత మానవ కృషి యొక్క అవసరత మీద దృష్టిపెడదాము. ముందుగా పరిశుద్ధాత్మ మీద మనము ఆధారపడుటను చూద్దాము.

మనము పరిశుద్ధాత్మను గూర్చి ప్రస్తావించునప్పుడు, పలువురు క్రైస్తవులు పలు విధములుగా స్పందిస్తారు అని మనకు తెలుసు. బహుశ మీరు ఆత్మ వరములను — అనుదిన జీవితములలో ఆయన సన్నిధి మరియు ప్రోత్సాహము — ఉద్ఘాటించు సంఘమునకు చెందినవారైయుండవచ్చు. లేక విశ్వాసుల యొక్క అనుదిన జీవితములలో ఆత్మ కార్యములకు తక్కువ ప్రాధాన్యతనిచ్చు సంఘమునకు మీరు చెందినవారైయుండవచ్చు. ఏదిఏమైనా, లేఖనము యొక్క వ్యాఖ్యానములో పరిశుద్ధాత్మ యొక్క కార్యమును గూర్చి మేము తెలుపబోవు విషయములు మనలో ప్రతి ఒక్కరికి పునర్నిశ్చయతను కలిగిస్తాయి మరియు సవాలు చేస్తాయి. మనము బైబిలును వ్యాఖ్యానించుచుండగా, మనము ఉద్దేశ్యపూర్వకముగా ఆత్మ యొక్క పరిచర్యకు లోపరచుకోవాలి, కాని దీనిని ఒక విశేషమైన రీతిలో చేయుమని స్వయంగా బైబిలు బోధిస్తుంది. పరిశుద్ధాత్మను నిర్లక్ష్యము చేయుట ఘోర మూర్ఖత్వము అవుతుంది; అయితే బైబిలు బోధించు విధానములలో మనము ఆయన మీద దృష్టి నిలపాలి. కాబట్టి, లేఖనములను వ్యాఖ్యానించుచుండగా పరిశుద్ధాత్మ మీద ఆధారపడుట అంటే అర్థము ఏమిటి?

మన లేఖన వ్యాఖ్యానములో పరిశుద్ధాత్మ ఒక ప్రాముఖ్యమైన భూమికను పోషిస్తాడని ఇంచుమించు ఇవాంజెలికల్ క్రైస్తవులందరు ఒప్పుకుంటారు. అయితే బైబిలు వ్యాఖ్యానశాస్త్రము మీద ఆధునిక అధ్యయన పుస్తకములు మరియు బోధనలు చాలాసార్లు పరిశుద్ధాత్మ యొక్క భూమిక పట్ల చాలా తక్కువ ఆసక్తిని చూపుతాయి. బదులుగా, లేఖన వ్యాఖ్యానమును ఒక పురుషహీన సన్నివేశముగా, అనగా లేఖన భాగమును అర్థము చేసుకొనుటకు కొన్ని నియమములు లేక పద్ధతుల యొక్క పట్టికను మాత్రమే మనము ఉపయోగించు ఒక ప్రక్రియగా మనము పరిగణిస్తుంటాము. అయితే బైబిలు దృష్టికోణము నుండి వ్యాఖ్యానశాస్త్రము, లేక లేఖన వ్యాఖ్యానము, ఒక వ్యక్తిగత ప్రక్రియ అయ్యున్నది, ఎందుకంటే దానిలో మానవ వ్యాఖ్యానకర్తలు మరియు పరిశుద్ధాత్మ యొక్క వ్యక్తిత్వము మధ్య సంభాషణ జరుగుతుంది.

వ్యాఖ్యానములో ఉద్దేశపూర్వకముగా పరిశుద్ధాత్మ మీద ఆధారపడుట కనీసం రెండు కారణముల కొరకు కీలకమైనదిగా ఉన్నది. మొదటిగా, ఆత్మ లేఖన ప్రేరణకు మూలమైయున్నాడు. రెండవదిగా, పరిశుద్ధాత్మ మానవ వ్యాఖ్యానకర్తలను వెలిగింపజేస్తాడు. ముందుగా ప్రేరణను చూద్దాము.

ఒకసారి, నా క్రైస్తవ జీవితములోని ఒక కఠినమైన సమయములో నాకు సహాయము చేసిన కొన్ని పుస్తకములను వ్రాసిన ఒక సుపరిచితమైన రచయితను ముఖాముఖిగా కలుసుకొనుటకు నాకు అవకాశం దొరికింది. నేను అతనితో కలసి కూర్చొని అతని పుస్తకములు నాకు ఎంత సహాయపడ్డాయో తెలియజేయాలని నేను ఎంతో ఆతృతగా ఎదురుచూశాను. మా సంభాషణలో ఒక సందర్భము వచ్చినప్పుడు, అతను వ్రాసిన పుస్తకములలోని ఒక ఉపయోకరమైన మెళకువను నేను అతనికి తెలిపాను. ఆశ్చర్యకరముగా, అతడు నా వైపుకు చూసి ఇలా అన్నాడు, “నువ్వు తప్పుగా ఆలోచన చేసుకున్నావు! నేను అసలు దానిని వ్రాయనే వ్రాయలేదు!” అక్కడ నా ముఖము చిన్నబోయిది. అయితే నేను ఒకసారి శ్వాస పీల్చుకొని అతనికి ఇలా జవాబిచ్చిన విషయం నాకు జ్ఞాపకముంది, “సరే, దీని అర్థము నాకంటే ఆ పుస్తకము వ్రాసిన వ్యక్తికే బాగా తెలుసు అని నేననుకుంటాను.”

అవును, అనేక విధాలుగా బైబిలు విషయములో కూడా ఇదే వాస్తవమైయున్నది. దేవుని పరిశుద్ధాత్మ లేఖనములోని ప్రతి మాటను ప్రేరేపించాడు. ఈ భావనలో, ఆయన లేఖనమునకు రచయిత అయ్యున్నాడు. కాబట్టి, ఆయన గ్రంథములోని మెళకువలను మనము ఆయన యొద్దనే వెదకుట సమంజసమవుతుంది. ఒక సాధారణ భావనలో, ప్రేరణ సిద్ధాంతము ఇలా సెలవిస్తుంది:

వారి రచనలు పొరపాటులేనివిగా ఉండునట్లు పరిశుద్ధాత్మ దేవుని ప్రత్యక్షతను లేఖనముగా వ్రాయునట్లు మానవులను ప్రేరేపించి వారి రచనలను పర్యవేక్షించాడు.

2 పేతురు 1:20-21లో పేతురు ఈ ఆలోచనను వ్యక్తపరచిన విధానమును వినండి:

ఒకడు తన ఊహనుబట్టి చెప్పుటవలన లేఖనములో ఏ ప్రవచనమును పుట్టదని మొదట గ్రహించుకొనవలెను. ఏలయనగా ప్రవచనము ఎప్పుడును మనుష్యుని ఇచ్ఛనుబట్టి కలుగలేదు గాని మనుష్యులు పరిశుద్ధాత్మ వలన ప్రేరేపింపబడినవారై దేవుని మూలముగ పలికిరి (2 పేతురు 1:20-21).

ఈ వాక్యభాగములో, బైబిలు ప్రవచనము అంతా పరిశుద్ధాత్మ ద్వారా కలిగినది అని మరియు దేవుని ప్రత్యక్షతను వ్రాయునట్లు ఆత్మ మానవులను ప్రేరేపించాడు అని పేతురు సెలవిచ్చాడు. వారు వ్రాసినది ఖచ్చితముగా నిజమగునట్లు, మరియు మానవ రచయితల యొక్క మాటలు కూడా దేవుని మాటలైయుండునట్లు ఈ ప్రకియ దోహదపడింది. మరియు 2 తిమోతి 3:16లో, లేఖనమంతా అదే విధముగా ప్రేరేపించబడింది అని పౌలు సూచించాడు.

బైబిలు కర్బన సత్యమైయున్నది, ఆరంభము నుండి అంతము వరకు అనుబంధము కలిగినదిగా ఉన్నది, జీవ వాక్యమై, జీవితములో నాటబడి, జీవిత అవసరతలన్నిటి కొరకు జవాబు ఇవ్వగల అద్భుతమైన గ్రంథమైయున్నది. పరిశుద్ధాత్మ రచయితగా ఉన్నాడు కాబట్టి ఇది సత్యమైయున్నది, మరియు పరిశుద్ధాత్మ ఆయనకు వ్యతిరేకముగా నిలచుట లేక తనకు విరోధముగా తాను నిలబడుట అసాధ్యము... మీరు యిర్మీయా చదివినా లేక పౌలు లేక ఓబద్యా లేక యోనా చదివినా సరే; వారు విభిన్నమైన పదములను ఉపయోగిస్తారు, కాని వాటి వెనుక ఉన్న ఆత్మ మాత్రం ఒక్కడే, ఎందుకంటే ఒకే ఆత్మ ఎంపిక చేయబడిన పదములన్నిటిని ప్రేరేపించాడు.

— రెవ. డా. స్టీఫెన్ టోంగ్, అనువాదము

పరిశుద్ధాత్మ లేఖనము యొక్క రచయితలను ప్రేరేపించాడు అను ఆలోచనకు క్రీస్తు మరియు ఆయన శిష్యులు కట్టుబడియుండిరి. మరియు క్రీస్తును అనుసరించుటకు ప్రయత్నించిన వారు ఇంచుమించు ఎల్లప్పుడూ లేఖనములు ప్రేరేపించబడిన విధానమును ఎంతో కొంత వరకు ఉద్ఘాటించారు. అయినను, క్రైస్తవ విశ్వాసమును ఒప్పుకొనినవారు ప్రేరణ యొక్క స్వభావమును అనేక విధాలుగా అర్థము చేసుకున్నారు.

మన ఉద్దేశ్యముల కొరకు, ఆధునిక సంఘములో ప్రసిద్ధి చెందిన మూడు ప్రేరేపణ అభిప్రాయముల మీద మనము దృష్టి పెడదాము. మొదటిగా, కొంతమంది ప్రేరణను గూర్చి “కాల్పనిక” అభిప్రాయము అని మనము పిలచుదానిని నమ్ముతారు. ఈ అభిప్రాయము ప్రకారం, అన్య కవులు లేక సంగీతకారులు తమ సొంత కళలను రూపొందించుటకు ప్రేరేపించబడిన విధముగానే పరిశుద్ధాత్మ బైబిలు రచయితలను ప్రేరేపించాడు. వారి అభిప్రాయం ప్రకారం, లేఖనము దేవుని యొక్క పొరపాటులేని సత్యము కాదుగాని, కేవలం మానవ రచయితల యొక్క వ్యక్తిగత విశ్లేషణలు మరియు అభిప్రాయములు అయ్యున్నది.

రెండవదిగా, ఇతర క్రైస్తవులు మనము “అనాలోచిత” ప్రేరణ అని పిలచుదానిని నమ్ముతారు. ఈ అభిప్రాయము ప్రకారం, లేఖనమును వ్రాయుచుండగా బైబిలు రచయితలు కేవలం పరోక్షంగా మాత్రమే పాలుపంచుకున్నారు. దేవుని ఆత్మ ప్రధానముగా బైబిలులోని మాటలను పలుకుచుండగా మానవ రచయితలు ఆయన తెలిపిన మాటలను వ్రాశారు అంతే.

మూడవదిగా, ఆత్మ యొక్క ప్రేరణ కార్యము “కర్బన సంబంధమైనది” అని అనేకమంది ఇవాంజెలికల్ క్రైస్తవులు ఉద్ఘాటిస్తారు. ఈ అభిప్రాయం ప్రకారం, పరిశుద్ధాత్మ మానవ రచయితలను వ్రాయునట్లు ప్రేరేపించాడు మరియు పర్యవేక్షించాడు మరియు మాటలను నిర్దేశించాడు. ఫలితంగా, లేఖనములోని మాటలు దేవుని మాటలైయున్నాయి. అదే సమయములో, పరిశుద్ధాత్మ మానవ రచయితల యొక్క రచనలను పర్యవేక్షించుచుండగా, వారి వ్యక్తిత్వములను, అనుభవములను, దృక్పధములను, మరియు ఆలోచనలను ఉపయోగించాడు. కాబట్టి, లేఖనములోని మాటలు వాటి మానవ రచయితల యొక్క మాటలు కూడా అయ్యున్నాయి. మూడవ అభిప్రాయము ప్రేరణ యొక్క స్వభావమును గూర్చి లేఖనముల యొక్క సొంత సాక్ష్యమును ఉత్తమమైన రీతిలో ప్రతిబింబిస్తుంది.

లేఖనములను చదువుట చాలా ఆసక్తిని కలిగించు ప్రక్రియ అయ్యున్నది, ఎందుకంటే వాటిని కొన్ని వందల సంవత్సరముల పాటు అనేకమంది రచయితలు కలిసి సృష్టించారు, కాబట్టి వారు వ్రాసిన విధానములో, వారి చుట్టూ ఉన్న ప్రజలతో వారు అనుబంధపరచుకున్న విధానములో, మరియు వారు ఉపయోగించిన భాషలో మీరు ఆ వ్యక్తిత్వములను చూడవచ్చు. అలాగే, వారి వ్యక్తిత్వములు దేవుని వాక్యము కొరకు ప్రాముఖ్యమైయున్నవి, ఎందుకంటే దేవుడు వాటిని అనేక విభిన్నమైన రీతులలో ఉపయోగించుకుంటాడు. ఉదాహరణకు, యాజకులు వ్రాశారు, రైతు వ్రాశాడు, గొర్రెలకాపరి వ్రాశాడు, రాజు వ్రాశాడు, వైద్యుడు వ్రాశాడు, మరియు నేడు మన సంస్కృతిలో “హెబ్రీ విశ్వవిద్యాలయము” నుండి Ph.D. సంపాదించియుండే అపొస్తలుడైన పౌలు వ్రాశాడు, అతనికి పాత నిబంధన మీద మరియు గ్రీకు సంస్కృతి మరియు గ్రీకు భాష మీద అమోఘమైన పట్టు ఉండినది మరియు అతడు గ్రీకు భాషను తీసుకొని ఇప్పటి వరకు ఉనికిలో ఉండిన అన్ని భాషల కంటే ఉత్తమమైన రీతిలో దానిలో నుండి వేదాంతశాస్త్ర ఆలోచనా వ్యక్తీకరణను వెలికి తీయగలిగాడు.

— డా. హోవార్డ్ ఐరిచ్

ఉదాహరణకు, 2 పేతురు 3:15లో కర్బన సంబంధమైన ప్రేరణను పేతురు వర్ణించిన విధానమును వినండి:

ఆలాగు మన ప్రియ సహోదరుడైన పౌలు కూడ తనకు అనుగ్రహింపబడిన జ్ఞానము చొప్పున మీకు వ్రాసియున్నాడు (2 పేతురు 3:15).

పౌలు పత్రికలను ఏ విధంగా స్వీకరించాలో పేతురు ఈ వాక్యభాగములో వ్రాశాడు. ఒక వైపున, “పౌలు వ్రాసియున్నాడు” అని అతడు తెలిపాడు. కాబట్టి, తన పత్రికలలో పౌలు యొక్క పాలుపంపులను పేతురు ఉద్ఘాటించుచున్నాడు. అయితే మరొక వైపున, పేతురు ఈ పత్రికలను కేవలం పౌలుకు ఆపాదించుట లేదు. బదులుగా, “తనకు అనుగ్రహింపబడిన జ్ఞానము చొప్పున” పౌలు వ్రాశాడు అని కూడా అతడు గుర్తించాడు. పరిశుద్ధాత్మ యొక్క నడిపింపు వలన పౌలు పత్రికలు దేవుని జ్ఞానమునకు ప్రాతినిథ్యం వహించుచున్నాయి.

దేవుని వాక్యము విషయములో ఇది నిజమైయున్నది: లేఖనములోని ప్రతి మాట పరిశుద్ధాత్మ ద్వారా ప్రేరేపించబడింది. దేవుని వాక్యము విషయములో కూడా ఇదే వాస్తవమైయున్నది: దానిలోని ప్రతి మాటను ఒక నిజమైన మానవుడు వ్రాశాడు, మరియు తన అద్భుతమైన రీతిలో, దేవుడు సార్వభౌమునిగా ఆ బైబిలు రచయితలలో ప్రతి ఒక్కరి వరములను మరియు అనుభవములను పర్యవేక్షించాడు, తద్వారా వారి వ్యక్తిత్వములు, వారి సాహిత్య శైలి దానిలో కనబడతాయి, అయితే అదే సమయములో బైబిలు ఖచ్చితముగా దేవుని వాక్యమైయున్నది. కాబట్టి, ఉదాహరణకు, మీరు యిర్మీయా గ్రంథమును చదివినప్పుడు, దేవుని ప్రజల కొరకు అతడు కలిగియున్న దుఃఖమును మరియు ఆశను గూర్చి మీకు ఒక అవగాహన కలుగుతుంది: లూకా సువార్తను మీరు చదివినప్పుడు, వైద్య వివరముల మీద అతడు పెట్టిన దృష్టి, చరిత్ర మరియు ఖచ్చితమైన చరిత్ర పట్ల అతడు కలిగియున్న ప్రేమను గూర్చి మీకు కొంత అవగాహన కలుగుతుంది. అనగా, ఈ బైబిలు రచయితల యొక్క వ్యక్తిత్వములు మరియు వారి అనుభవములు లేఖనములో కనిపిస్తాయి, కాని దేవుని వాక్యములో దేవుని సొంత అధికారము మరియు ప్రేరణ మరియు శక్తిలో ఎలాంటి తగ్గింపు లేకుండా ఇది జరుగుతుంది.

— డా. ఫిలిప్ రైకెన్

విభిన్నమైన శైలులు ఉన్నాయని మరియు పలు రచయితలు తమనుతాము పలు విధానములలో వ్యక్తపరచుకున్నారు కాబట్టి, మరియు తమ సాహిత్యములను వ్రాయుటకు ఈ రచయితలు విభిన్నమైన ఎంపికలను చేశారు కాబట్టి రచయితలు తమ సొంత వరములను ఉపయోగించుచున్నారని లేఖనములు చదువు ప్రతి ఒక్కరు గ్రహించగలుగుతారు. ఉదాహరణకు, సువార్తలలో మనకు మార్కు ఉన్నాడు, అతడు యాక్షన్ సీనులను గూర్చి పెద్దగా వ్రాయడు ... లేక యాక్షన్ సీనుల విషయములో, చాలా తక్కువ సంభాషణలను ఇస్తాడు, కాని యోహాను సువార్త నిండా సంభాషణలు ఉన్నాయి, కాబట్టి ఈ రచయితలు తమ సొంత శైలులను, సొంత నేపథ్యమును, సొంత వ్యక్తీకరణమును ఉపయోగించి వ్రాస్తున్నారు, మరియు ఈ విభాగములలో మనము చూచు అనేక పుస్తకములలో కనిపించు భిన్నత్వములలో ఇది స్పష్టమవుతుంది. వారు చెప్పువాటిని నియంత్రించుచు, వారు చెప్పువాటి వెనుక నిలువబడుచు దేవుడు వారిని ప్రేరేపించుచున్నాడు, కాని వారి సొంత శైలిలో దానిని వ్యక్తపరచుటకు ఆయన వారికి అనుమతినిచ్చుచున్నాడు.

— డా. డారెల్ ఎల్. బోక్

వ్యాఖ్యాన కార్యములో మనకు సహాయము చేయు కర్బన సంబంధమైన ప్రేరణలోని రెండు ప్రాముఖ్యమైన కోణములను మనము చూద్దాము: మొదటిగా, పరిశుద్ధాత్మ లేఖనము యొక్క దైవిక మూలము అయ్యున్నాడు అను వాస్తవము; మరియు రెండవదిగా, లేఖనమును ఉత్పత్తి చేయుటకు ఆయన మానవ మాధ్యమాల ద్వారా కార్యము చేశాడు అను వాస్తవము. ఆత్మ బైబిలు యొక్క ఉన్నతమైన దైవిక మూలమైయున్నాడు అను ఆలోచనను మొదట చూద్దాము.

లేఖనమంతటిని ప్రేరేపించినవానిగా, బైబిలు అర్థమును గూర్చి మరియు ఆ అర్థమును అది తెలియపరచు విధానమును గూర్చి పరిశుద్ధాత్మకు సన్నిహిత జ్ఞానము ఉన్నది. కాబట్టి, లేఖనములను వ్యాఖ్యానించుట కొరకు సిద్ధపడుటలో వాటి యొక్క ఉన్నతమైన రచయితగా పరిశుద్ధాత్మతో వ్యక్తిగతముగా వ్యవహరించుట ఒక భాగమైయున్నది. ఆయనకు పూర్తిగా విధేయత చూపుతూ మనము లేఖనములను వినయముతో ఆశ్రయించాలి.

బైబిలు యొక్క విశేషమైన, లోతైన అవగాహన కొరకు పరిశుద్ధాత్మ మీద ఆధారపడుట చాలా అవసరము అని నా ఆలోచన. బైబిలు సందేశమును ఏదో ఒక విధంగా అర్థము చేసుకొనుటకు ఒకడు పరిశుద్ధాత్మ మీద ఆధారపడవలసిన అవసరము లేదని స్పష్టమవుతుంది అని నేననుకుంటాను. ఒకవేళ ఇలా జరిగితే, బైబిలులో సువార్త ప్రకటన కార్యము ఉండదు. అయితే దీనిని లోతుగా అర్థము చేసుకొనుటకు, పరిశుద్ధాత్మ మీద ఆధారపడుట చాలా కీలకమని ఆలోచించుటకు మంచి కారణము ఉన్నది. అవును, ఆ కారణం ఏమిటంటే సంఘము విశ్వసిస్తుంది, మరియు లేఖనము యొక్క రచయితలను పరిశుద్ధాత్ముడు ప్రేరేపించాడు అను దాని మాటకు నేను పూర్తిగా సమ్మతి చూపుతాను. మరియు ఈ రచయితల ద్వారా పరిశుద్ధాత్ముడు చెప్పిన మాటలను పూర్తిగా అర్థము చేసుకొనుటకు, ఆ ఆత్మీయ మూలముతో మనము సంబంధము కలిగియుండాలి.

— డా. డేవిడ్ ఆర్. బౌర్

అనేక సందర్భాలలో, వారు లేఖనములను గూర్చి మాట్లాడుతుండగా పరిశుద్ధాత్మ యొక్క ప్రేరణను గూర్చి చాలా బాహాటముగాను, సూటిగాను బైబిలు రచయితలు మాట్లాడారు. మానవ రచయితల యొక్క భూమికను తిరస్కరించకుండా, పరిశుద్ధాత్మ లేఖనముల యొక్క ఉన్నతమైన రచయిత అని వారు గుర్తించారు. ఉదాహరణకు, అపొ. 4:25లో, పేతురు యోహాను సంఘమును 2వ కీర్తనను ఒప్పుకొనుటలోనికి నడిపిస్తూ, ఇలా పలికారు:

నీవు పరిశుద్ధాత్మ ద్వారా మా తండ్రియు నీ సేవకుడైన దావీదు నోట పలికించితివి (అపొ 4:26).

ఇదే భావనలో, హెబ్రీ. 3:7-8 కీర్తనలు 95:7-8ని గూర్చి ఈ విధంగా మాట్లాడుతుంది:

మరియు పరిశుద్ధాత్మ ఇట్లు చెప్పుచున్నాడు: “నేడు మీరాయన శబ్దమును వినినయెడల, ... మీ హృదయములను కఠినపరచుకొనకుడి” (హెబ్రీ. 3:7-8).

ఇది మరియు అనేక ఇతర వాక్యభాగములలో, బైబిలు రచయితలు పరిశుద్ధాత్మను ప్రేరేపించువానిగా గుర్తించారు, కాబట్టి, ఆయన లేఖనము యొక్క ఉన్నతమైన రచయిత అయ్యున్నాడు. మరియు లేఖనములను చదువుటకు, వ్యాఖ్యానించుటకు మరియు అనువర్తించుటకు వారు తమనుతాము సిద్ధపరచుకొనుచుండగా వారు ప్రేరణను గూర్చిన ఈ అవగాహన మీద ఆధారపడ్డారు.

బైబిలు యొక్క నిస్సందేహమైన ప్రామాణికత లేఖనము యొక్క దైవిక మూలములకు అత్యంత ప్రాముఖ్యమైన అంతర్భావములలో ఒకటైయున్నది. విచారకరముగా, లేఖనము యొక్క ప్రేరణలో ఆత్మ పాలుపంపులను వారు నమ్ముతారుగాని, లేఖనములలో తప్పిదములు లేకుండా పరిశుద్ధాత్మ భద్రపరిచాడు అను విషయమును మాత్రం వారు ఒప్పుకోలేరు అని చాలాసార్లు సద్భావన గల ప్రజలు అంటుంటారు. అయితే యోహాను 14:16-17లో పరిశుద్ధాత్మను గూర్చి యేసు పలికిన మాటలను వినండి:

మీ యొద్ద ఎల్లప్పుడు నుండుటకై [తండ్రి] వేరొక ఆదరణకర్తను, అనగా సత్యస్వరూపియగు ఆత్మను మీకనుగ్రహించును (యోహాను 14:16-17).

యేసు పరిశుద్ధాత్మను “సత్యస్వరూపియగు ఆత్మ” అని పిలచినప్పుడు, పరిశుద్ధాత్మ పూర్తిగా సత్యుడు అని ఆయన సూచించాడు. కాబట్టి, ఆత్మ ప్రేరేపించిన లేఖనములు కూడా పూర్తిగా సత్యములైయున్నవి అను నిశ్చయతను మనము కలిగియుండవచ్చు. అవి అబద్ధమాడవు; వాటికి అవి వ్యతిరేకముగా నిలువబడవు. కాబట్టి, వ్యాఖ్యానము కొరకు మన సిద్ధపాటులో ఒక భాగము పరిశుద్ధాత్మ యొక్క ఖచ్చితమైన నమ్మకత్వమును మరియు ఆయన ప్రేరేపించిన లేఖనములను ఉద్ఘాటించునదిగా ఉండాలి.

దేవుని వాక్యము ప్రేరేపించబడింది అని - థియోప్న్యుస్టోస్ - అది దైవావేశము వలన కలిగినది అని పౌలు తిమోతికి తెలిపాడు. మరియు అది దైవావేశము వలన కలిగినది అయితే, దాని మూలము పరిపూర్ణమైనది అని, మూలము పొరపాటులేనిదని మనకు తెలుసు, మరియు ఆయనలో నుండి వెలువడు ప్రతిది ఆయనను పోలిన విధముగానే పరిపూర్ణముగాను, పొరపాటులేనిదిగాను ఉండాలి. దీనినే ప్రేరణ అంటారు. దానిని ఆత్మ ప్రేరేపిస్తే, మరియు ఆ ఆత్మ ఇప్పుడు నాలో నివసించుచుంటే, నేను వాక్యమును చదువునప్పుడు, నాకు జ్ఞానోదయమును మరియు అవగాహనను అందించుటకు నేను ఆత్మను నమ్మి ఆయన మీద ఆధారపడాలి, ఎందుకంటే ముందుగా వాక్యమును ప్రేరేపించిన వాని యొక్క అవగాహన మీద నా అధ్యయనము ఆధారపడు విధముగా ఆయన దానిని ప్రేరేపించాడు. ఒక గ్రంథము యొక్క రచయిత కంటే ఉత్తమమైన బోధకుడు మరియొకడు ఉండడు మరియు గ్రంథము యొక్క రచయిత ఆత్మయే. కాబట్టి, మన మనస్సులకు జ్ఞానమును కలిగించు బోధకుడు ఆత్మ అయినప్పుడు, తెలుపబడిన విషయములను గూర్చి, ప్రేరేపించబడిన విషయములను గూర్చి వాటిని ముందుగా వ్రాసిన బోధకుడు తప్ప మరియొకడు నాకు ఉత్తమమైన అవగాహనను ఇవ్వలేడు.

— డా. మిగుయేల్ నునెజ్, అనువాదము

హిప్పో పట్టణ బిషప్ అయిన అగస్టిన్, తాను వ్రాసిన 82వ లేఖ, 1వ అధ్యాయము, 3వ పేరాలో ఈ మాటలు వ్రాస్తూ తాను కలిగియున్న నిశ్చయతను వ్యక్తపరచాడు:

నేను ఇట్టి గౌరవమును మరియు ను లేఖనములోని ప్రామాణిక గ్రంథములకు మాత్రమే ఇచ్చుటను నేర్చుకున్నాను: వీటి రచయితలు మాత్రమే పూర్తిగా ఏ విధమైన లేని వారైయున్నారు అని నేను గట్టిగా

అగస్టిన్ యొక్క మాటలు లేఖనముల యొక్క వాస్తవికతను గూర్చి ఆదిమ సంఘములో ఉనికిలో ఉండిన అభిప్రాయమును ఉదహరిస్తాయి మరియు స్వయంగా బైబిలులో బోధించబడిన అభిప్రాయమును ప్రతిబింబిస్తాయి.

ఇప్పుడు, ఉత్తమమైన వ్యాఖ్యానకర్తల యొక్క జ్ఞానమును కూడా సవాలుచేయు అనేక లేఖన భాగములు ఉన్నాయని బైబిలు తెలిసిన అందరికీ తెలుసు. పలు సందర్భములలో, లేఖనములు విజ్ఞానమును, మన వ్యక్తిగత అనుభవములను మరియు లేఖనములోని ఇతర వాక్యభాగమును కూడా వ్యతిరేకించుచున్నాయన్నట్లు కనిపిస్తాయి. ఇట్టి స్పష్టమైన సమస్యలతో మనము ఏ విధంగా వ్యవహరించాలి? సరే, ఇట్టి సమస్యలతో వ్యవహరించుట కొరకు వ్యాఖ్యానకర్తలు అనేక విధానములను ఉపయోగిస్తారు. మరియు చాలా వరకు, వారు ఇచ్చు పరిష్కారములు లేఖనము యొక్క స్వభావము వలన భిన్నముగా ఉండవుగాని, దేవుని పట్ల వ్యాఖ్యనకర్తలు కలిగియున్న వైఖరుల వలన భిన్నముగా ఉంటాయి.

ఒక వైపున, పరిశుద్ధాత్మ బైబిలును అధికారికముగా ప్రేరేపించాడు అను విషయమును నిరాకరించువారు లేఖనములను విమర్శనాత్మకముగా వ్యాఖ్యానించి, ఆత్మ అధికారము కంటే తమ సొంత అవగాహనకు ఎక్కువ ప్రాధాన్యతనిస్తారు. మరొక వైపు, ఆత్మ యొక్క అధికారిక ప్రేరణను గుర్తించువారు బైబిలును సమర్పణతో చదివి, దాని యొక్క సత్యతను వారు కనుపరచలేనప్పటికీ లేక రుజువు చేయలేనప్పటికీ అది సత్యమైనదని మరియు సామరస్యముగలదని నమ్ముతారు.

మనము బైబిలును ఆశ్రయించినప్పుడు, మనము కేవలం మరొక మానవుడు రచించిన పుస్తకమును ఆశ్రయించుటలేదు. దేవుని ద్వారా అద్భుతమైన రీతిలో ప్రేరేపించబడిన పుస్తకమును మనము ఆశ్రయించుచున్నాము. మరొక పుస్తకమును చదువు విధముగా మనము బైబిలును చదవలేము. ఇప్పుడు, దేవుడు మన భాషలో, మన శైలులలో తనను తాను బయలుపరచుకున్నాడు అని మనము చెప్పవలసియున్నది, కాబట్టి మనము దానిలో ఉన్న విషయముల యొక్క ఒక సులువైన సాహిత్య వ్యాఖ్యానముతో ఆరంభిస్తాము. కాని ఒకవేళ మనము అక్కడే ఆగిపోతే, ఇది దేవుడు ఆరంభములో ప్రేరేపించుట మాత్రమేగాక, మన హృదయములలో ప్రేరేపించుటను కొనసాగించుచున్న ఒక పవిత్రమైన గ్రంథము అను విషయమును మనము మరచిపోతాము, కాబట్టి నా మానవ బలహీనత, నా మానవ పాపము లేఖనము యొక్క సత్యమును అధిగమించకుండా ఉండుటకు, ఈ వాక్యభాగము ద్వారా దేవుడు నాకు తెలియజేయాలని కోరుచున్న విషయములను ఒక పాఠకునిగా మరియు వ్యాఖ్యానకర్తగా అర్థము చేసుకొనుటకు పరిశుద్ధాత్మ నిత్యము నాయందు కార్యము చేయవలసియున్నది.

— డా. జాన్ ఒస్వల్ట్

వ్యాఖ్యానములో పరిశుద్ధాత్మ యొక్క భూమిక ఏమిటి? చాలా ప్రాముఖ్యమైన ప్రశ్న. ఒక విషయానికొస్తే, పరిశుద్ధాత్మ లేఖనములను ప్రేరేపించాడు, కాబట్టి లేఖనము యొక్క ప్రధానమైన రచయిత ఎవరు మరియు ఆయనను గూర్చి మనము ఏమి తెలుసుకోగలము అను విషయములను గూర్చి మనము కొంత అవగాహనను పొందాలని ఆశిస్తాము. దేవుని గూర్చి పరిశుద్ధాత్మ మనకు వాక్యము ద్వారా బోధిస్తాడు. అలాగే, లేఖనము యొక్క సరియైన అవగాహన కొరకు పరిశుద్ధాత్మ ఖచ్చితముగా అవసరమైయున్నాడు అనునది రెండవ విషయము. 1 కొరింథీ 2వ అధ్యాయము ఈ విషయమును గూర్చి మాట్లాడుతుంది. 14వ వచనములో ఇలా వ్రాయబడియున్నది:

ప్రకృతి సంబంధియైన మనుష్యుడు దేవుని ఆత్మ విషయములను అంగీకరింపడు, అవి అతనికి వెఱ్ఱితనముగా ఉన్నవి, అవి ఆత్మానుభవముచేతనే వివేచింపదగును గనుక అతడు వాటిని గ్రహింపజాలడు (1 కొరింథీ. 2:14).

పరిశుద్ధాత్మను కలిగియున్నవాడు అట్టివాడు. కాబట్టి ఆయన తన వాక్యములో ఏమి బోధించుచున్నాడో నమ్మకముగా స్వీకరించుట కొరకు పరిశుద్ధాత్మను పంపమని మరియు ఆయన ఆత్మతో నింపమని మనము దేవుని అడగాలి.

— డా. వెర్న్ పోయిత్రెస్స్

పరిశుద్ధాత్మ లేఖనము యొక్క దైవిక మూలము అయ్యున్నాడు అను వాస్తవమును చూశాము కాబట్టి, కర్బన సంబంధమైన ప్రేరణలోని రెండవ విషయముగా లేఖనములను సిద్ధము చేయుటకు పరిశుద్ధాత్మ మానవ మాధ్యమాలను ఉపయోగించుకున్నాడు అను విషయమును ప్రస్తావిద్దాము.

మొర్మన్లు మరియు ముస్లింలు తమ పవిత్ర గ్రంథాలను పొందుకున్నారు అని దావా చేయు విధానములో, దేవుడు మనకు కూడా బైబిలును సూటిగా ఇచ్చియుంటే బాగుండేది అన్నట్లు కొంతమంది క్రైస్తవులు వ్యవహరిస్తుంటారు. దేవుడు మొర్మన్ల గ్రంథమును జోసెఫ్ స్మిత్ కు పూర్తి చేసి అందించాడు అని మొర్మన్లు నమ్ముతారు, అలాగే కురాన్ పరలోకము నుండి వచ్చింది అని ముస్లింలు నమ్ముతారు. అయితే దేవుడు మనకు బైబిలును ఈ విధంగా ఇవ్వలేదు.

బదులుగా, మానవ రచయితల ద్వారా దేవుడు లేఖనములను వ్రాయించాడు; పలువురు మానవుల యొక్క వరములు మరియు సామర్థ్యతల ద్వారా ఆయన తనను తాను బయలుపరచుకున్నాడు. నిస్సందేహముగా, లేఖనములో మానవ రచయితల యొక్క ప్రభావమును లేక ఉనికిని పరిశుద్ధాత్ముడు తీసివేసియుండవచ్చు. ఒక భాగమును ఒకరు వ్రాశారు, మరొక భాగమును మరొకరు వ్రాశారు అని మనము ఎన్నడును చెప్పలేని విధముగా ఆయన ప్రతి వాక్యభాగమును బయలుపరచియుండవచ్చు. కాని ఆయన అలా చేయలేదు. తన అపారమైన జ్ఞానములో, ఆయన మానవ రచయితల యొక్క ఆలోచనలను, ఉద్దేశములను మరియు వ్యక్తిత్వములను ఉపయోగించగోరాడు. కాబట్టి, మన లేఖన వ్యాఖ్యానములో పరిశుద్ధాత్మ మీద ఆధారపడుటలోని ఒక భాగము, ఆయన లేఖనమును కర్బన సంబంధమైన రీతిలో ప్రేరేపించుటను మరియు ఆయన ప్రేరేపించుచుండగా మానవ రచయితలను నమ్ముట అయ్యున్నది. కాబట్టి, ఆయన ఉద్దేశించిన విధముగా మనము బైబిలును వ్యాఖ్యానించాలని కోరితే, లేఖనములను పలువురు విభిన్నమైన ప్రజలు వ్రాశారని, మరియు వారు ఆ మానవ కర్తృత్వము యొక్క భిన్నత్వమును ప్రతిబింబిస్తారని మనము అర్థము చేసుకోవాలి.

ఉదాహరణకు, సువార్త రచయితలైన మత్తయి, మార్కు, లూకా మరియు యోహానులు యేసు జీవితము, మరణము మరియు పునరుత్థానము అనే అవే సన్నివేశములను గూర్చి వ్రాశారు. అయితే వారి గ్రంథములు ఒకే విధముగా ఉండవు. మత్తయి మార్కు కంటే భిన్నముగా ఉంటుంది. మార్కు లూకా కంటే భిన్నముగా ఉంటుంది. లూకా యోహాను కంటే భిన్నముగా ఉంటుంది. మరియు ఇది లేఖనము యొక్క బలహీనత కాదు. ఇది పరిశుద్ధాత్మ లేఖనములను ప్రేరేపించుటకు ఎంపిక చేసుకున్న విధానముల యొక్క ఫలితమైయున్నది.

లేఖనములు కర్బన సంబంధమైన రీతిలో ప్రేరేపించబడినవి కాబట్టి, మనము ఎల్లప్పుడూ వాటి యొక్క దైవిక కర్తృత్వమును మరియు మానవ కర్తృత్వమును గుర్తించాలి. బైబిలును వ్యాఖ్యానించుటకు మనలను మనము సిద్ధపరచుకొనునప్పుడు, పరిశుద్ధాత్మ తెలిపిన అర్థమును వెదకుటకు మనము ప్రయత్నించుచున్నామని గ్రహించుట చాలా అవసరము. అయితే ఇక్కడే మనము ఆగిపోతే, మన సిద్ధపాటు పూర్తైనట్లు కాదు. మానవుల ద్వారా, వారి వ్యక్తిత్వముల ద్వారా, వారి అనుభవములు, దృక్కోణములు మరియు ఉద్ఘాటనల ద్వారా ఆత్మ కార్యములు చేయు విధానములను కూడా మనము పరిగణలోనికి తీసుకోవాలి. లేఖనములోని ప్రతి మాట దేవుని వాక్యమైయున్నది. అయితే ఆత్మ ద్వారా ప్రేరేపించబడిన మానవుల ద్వారా దేవుని వాక్యము మన యొద్దకు వచ్చుచున్నది, మరియు వారు పలు కాలములలో పలు విధములుగా వ్రాశారు. కాబట్టి, బైబిలులోని పలు మానవ రచయితల ద్వారా దేవుని ఆత్మ విభిన్నమైన విధానములలో మాట్లాడాడు అను అవగాహనతో మనలను మనము ఎల్లప్పుడూ సిద్ధపరచుకోవాలి.

లేఖనము యొక్క ప్రేరణ పరిశుద్ధాత్మ మీద ఆధారపడుటను కోరుతుంది అని చూశాము కాబట్టి, ఇప్పుడు వెలిగింపజేయు ఆయన కొనసాగు కార్యము మీద మనము ఆధారపడవలసియుండిన విధానము మీదికి మన దృష్టిని మళ్లిద్దాము.

బైబిలు వ్యాఖ్యానశాస్త్రము యొక్క నేపథ్యములో, వెలిగింపజేయుటను ఈ విధంగా నిర్వచించవచ్చు:

మానవునికి లేఖనమును గూర్చిన సరియైన అవగాహనను కలిగించు పరిశుద్ధాత్మ కార్యము

మనము రెండు కార్యముల మధ్య వ్యత్యాసమును చూపవచ్చు. ఒకటి పరిశుద్ధాత్మ లేఖనము యొక్క వాస్తవిక మానవ రచయితల యొద్దకు వచ్చి వారిని బలపరచు ప్రేరణ కార్యము, తద్వారా వారు వ్రాయునది దేవుని వాక్యమైయుంటుంది, దేవుడు పలికిన మాటైయుంటుందిగాని, మానవులు పలికిన మాటగా ఉండదు. వెలిగింపజేయుటలో పరిశుద్ధాత్మ మనతో నిలిచియుంటాడు. ఆయన క్రైస్తవ విశ్వాసులలో నివసిస్తూ, బైబిలులో అయన ప్రేరేపించిన విషయములను అర్థము చేసుకొని, వాటిని పొందుకొనుటకు మన మనస్సులను తెరుస్తాడు.

— డా. వెర్న్ పోయిత్రెస్స్

ఆయన వెలిగింపజేయుట ద్వారా, పరిశుద్ధాత్మ మనకు ఆయన వాక్య జ్ఞానమును ఇస్తాడు. మరియు ఈ జ్ఞానము పూర్తిగా అభిజ్ఞా జ్ఞానము కాదు. ఇది మన ఊహను, సహజ జ్ఞానమును, భావములను, చిత్తమును, ప్రేరణను, ఆశను, నైతిక మనస్సాక్షిని కూడా ప్రభావితము చేస్తుంది — మన లేఖన అవగాహనకు తోడ్పడు మనలోని ఏ భాగమైన ఆత్మ ద్వారా వెలిగించబడుతుంది.

మనము కేవలం జాగ్రత్తగా ఆలోచన చేస్తే, లేఖనములు బోధించునది మనము అర్థము చేసుకోగలమని కొన్నిసార్లు క్రైస్తవులు ఊహిస్తారు. కాని వాస్తవానికి, మానవులు పాపము ద్వారా ఎంత లోతుగా ప్రభావితము చేయబడ్డారు అంటే, మన సొంత శక్తితో మనము దేవుని గూర్చిన విషయములను అర్థము చేసుకోలేము. మనలను వెలిగింపజేయుట కొరకు మనకు స్వయంగా దేవుని — పరిశుద్ధాత్మ — యొక్క అవసరత ఎంతో ఉన్నది. 1 కొరింథీ. 2:11-13లో ఆత్మ అనుగ్రహించు జ్ఞానమును గూర్చి పౌలు మాట్లాడిన విధానమును వినండి:

దేవుని సంగతులు దేవుని ఆత్మకే గాని మరి ఎవనికిని తెలియవు. దేవునివలన మనకు దయచేయబడినవాటిని తెలిసికొనుటకై మనము లౌకికాత్మను కాక దేవుని యొద్దనుండి వచ్చు ఆత్మను పొందియున్నాము. మనుష్య జ్ఞానము నేర్పు మాటలతో గాక ఆత్మ సంబంధమైన సంగతులను ఆత్మ సంబంధమైన సంగతులతో సరిచూచుచు, ఆత్మ నేర్పు మాటలతో వీటిని గూర్చియే మేము బోధించుచున్నాము (1 కొరింథీ. 2:11-13).

ఇక్కడ, ఆత్మ కార్యము లేకుండా, దేవుని తలంపులను మనము అర్థము చేసుకొనవలసిన రీతిగా అర్థము చేసుకొనుట అసాధ్యమని పౌలు వివరించాడు. ఇందువలనే, మన లేఖనముల వ్యాఖ్యానము కొరకు ఆత్మ వ్యక్తిగతముగా వెలిగింపజేయుట చాలా ప్రాముఖ్యమైన విషయమైయున్నది.

ఆత్మ వెలిగింపజేయుట అను విషయమును గూర్చి చాలా అరుదుగా చర్చిస్తారు. అయితే 1616 నుండి 1683 మధ్య కాలములో నివసించిన జాన్ ఓవెన్ యొక్క సుపరిచితమైన రచనలో దీనిని గూర్చి విశేషముగా చర్చించబడింది. ఓవెన్ రచనయైన, స్పిరిచ్యువల్ ఇల్ల్యూమినేషన్ ప్రూవ్డ్ ఫ్రం స్క్రిప్చర్ లో, అతడు పరిశుద్ధాత్మ వెలిగింపజేయుటను గూర్చి ఈ విధంగా క్రోడీకరించాడు:

దేవుని కొరకు విశ్వాసముతోను మరియు విధేయతతోను జీవించుటకు లేక క్రీస్తు యొద్దకు వచ్చి ఆయనయందు నివసించుటకు మరియు శోధించువారి నుండి భద్రపరచబడుటకు యెరుగవలసిన, మరియు నమ్మవలసిన దైవిక సత్యములన్నీ లేఖనములో ఇవ్వబడినవి లేక దైవిక ప్రత్యక్షతలలో మనకు ప్రతిపాదించబడినవి. వీటిని మనంతట మనము సరిగా అర్థము చేసుకోలేము; ఒకవేళ మనము అర్థము చేసుకోగలిగితే, పరిశుద్ధాత్మ వాటిని మనకు బోధించవలసిన అవసరము ఉండదు. అయితే ఆయన మనకు ఈ విషయములన్నిటిని బోధిస్తాడు, మరియు వాటిని వివేచించి, గ్రహించి మరియు గుర్తించునట్లు ఆయన మనకు సహాయము చేస్తాడు.

“విశ్వాసము మరియు విధేయత ద్వారా దేవుని కొరకు జీవించుటకు,” “క్రీస్తు నొద్దకు వచ్చి ఆయనలో నిలిచియుండుటకు,” మరియు “శోధకుల నుండి భద్రపరచబడుటకు” మనకు కావలసిన సమస్తమును లేఖనములు మనకు అనుగ్రహిస్తాయని ఓవెన్ జ్ఞానముతో తెలియపరచాడు. అవిశ్వాసులు తమ సొంత శక్తితో బైబిలును అర్థము చేసుకోలేని విధముగానే, పరిశుద్ధాత్మ “ఈ విధంగా” లేఖనమును “వివేచించుటకు, గ్రహించుటకు మరియు గుర్తించుటకు” మనకు శక్తిని ఇవ్వని పక్షమున లేఖనమును “మనము కూడా అర్థము చేసుకోలేము.”

లేఖనమంతా దైవావేశము వలన కలిగినది అని 2 తోమోతి 3:16 మాట్లాడునప్పుడు, బైబిలు దేవుని హృదయములో నుండి ప్రేరేపించబడింది లేక మరింత ఖచ్చితమైన భాషలో “ఊదబడింది” లేక నిశ్వాసము అయ్యింది అను ఆలోచనను అది తెలియజేస్తుంది, కాబట్టి లేఖనము స్వయంగా దేవుని యొక్క వ్యక్తిత్వములో నుండి వెలువడుతుంది. ఒక విషయము ద్వారా ప్రేరేపించబడుటను గూర్చి మనము మాట్లడునప్పుడు, మనము ఒక విషయమును బట్టి ఉత్సాహపరచబడుటను గూర్చి లేక పట్టబడుటను గూర్చి మాట్లాడతాము, మరియు “వెలిగింపజేయుట” అను పదము ఆ ఆలోచనను తెలియజేస్తుంది, అనగా మన మనస్సును దేవుని జ్ఞానముతో వెలిగింపబడునట్లు, మనము దేవుని సత్యమును సరిగా అర్థము చేసుకొనునట్లు మనకు జ్ఞానమును మరియు పట్టును ఇచ్చుటకు దేవుని యొక్క పొరపాటులేని వాక్యమును ప్రేరేపించిన పరిశుద్ధాత్మ యొక్క అవసరత ఉన్నది.

— డా. సైమన్ విబర్ట్

దేవుడు రచయితను ప్రేరేపించినప్పుడు ఆయన అతనిని వెలిగింపజేశాడు కాబట్టి మనము ఇక ప్రేరణను పొందుటలేదు. అయితే మనము వెలిగింపబడుచున్నాము, అనగా పరిశుద్ధాత్మ ద్వారా దేవుడు ప్రకాశమును అనుగ్రహించుచున్నాడు, మరియు ఈ మాటలు బోధించుచున్న విషయములను అర్థము చేసుకొనుటకు మనకు ఆత్మీయ వివేకమును మరియు సామర్థ్యమును అనుగ్రహించుచున్నాడు.

రెవ. థడ్ జేమ్స్, జూ.

మనము పరిశుద్ధాత్మ మీద ఆధారపడుట ఎంత ప్రాముఖ్యమో ఇప్పటి వరకు చూశాము కాబట్టి, లేఖన వ్యాఖ్యానము కొరకు మనము చేయు సిద్ధపాటులో మానవ కృషి యొక్క అవసరతను ఇప్పుడు మనము విశదీకరిద్దాము.

మానవ కృషి కొరకు మన అవసరతను మనము రెండు భాగములలో పరిగణిద్దాము. మొదటిగా, మనము మానవ కృషి యొక్క ప్రాముఖ్యతను చూద్దాము. రెండవదిగా, మన మానవ కృషిని తెలియపరచు కొన్ని ప్రభావములను సమీక్షించుదాము. ముందుగా మానవ కృషి యొక్క ప్రాముఖ్యతను చూద్దాము.

చాలాసార్లు, బైబిలు వ్యాఖ్యానములో దేవుని ఆత్మ కార్యము మానవ కృషికి వ్యతిరేకముగా ఉన్నదని అనేకమంది సద్భావన గల క్రైస్తవులు ఆలోచిస్తారు. కొన్నిసార్లు మనము బైబిలు అధ్యయనము చేయుచుండగా ఆత్మ మన ప్రయత్నములకు మించి, మన ప్రయత్నములు లేకుండా, మన ప్రయత్నములకు విరోధముగా కార్యము చేస్తాడు అను మాట వాస్తవమే. అయితే మనము లేఖనములను వ్యాఖ్యానించుచుండగా మానవ కృషి యొక్క అవసరతను ఇది పూర్తిగా తొలగించివేయదు. మనము కష్టపడి పని చేయుట ద్వారా, లేక దానికి తోడుగా ఆత్మ మనలను వెలిగింపజేయుట అత్యంత సాధారణమైన మార్గమైయున్నది. ఈ కారణం చేత, మనము బైబిలు వ్యాఖ్యానమును కేవలం మానవ కృషిగా మాత్రమే చేయక, లేఖనములను సరిగా అర్థము చేసుకొనుటకు ప్రయత్నించుటకు ఒక ప్రాముఖ్యమైన స్థానము ఇవ్వబడింది.

విచారకరముగా, కొన్నిచోట్ల, సద్భావనగల క్రీస్తు అనుచరులు కూడా బైబిలును అధ్యయనము చేయుటకు సిద్ధపడునప్పుడు మానవ కృషికి ప్రాధాన్యతనియ్యరు. బదులుగా, బైబిలు వాక్యభాగములోని సందేశము పరోక్షముగా ఉన్న పాఠకులకు దేవుని యొద్ద నుండి సూటిగా వచ్చు “ఆత్మీయ” పద్ధతిని వారు చాలాసార్లు ఇష్టపడతారు. పరిశుద్ధాత్మ మీద ఆధారపడుటలో ఉన్న ప్రాముఖ్యతను ఈ విశ్వాసులు సరిగానే గుర్తిస్తారు. మరియు ఈ విషయములో మనము వారిని మెచ్చుకోవచ్చు. అయితే వారు మానవ కృషిని తిరస్కరించుట బైబిలు సంబంధమైనది కాదు. 2 తిమోతి 2:15లో పౌలు వ్రాసినట్లు:

దేవుని యెదుట యోగ్యునిగాను, సిగ్గుపడ నక్కరలేని పనివానిగాను, సత్య వాక్యమును సరిగా ఉపదేశించువానిగాను నిన్ను నీవే దేవునికి కనుపరచు కొనుటకు జాగ్రత్తపడుము (2 తిమోతి 2:15).

ఈ వచనములో, సత్యవాక్యమును సరిగా ఉపదేశించువానిగా ఉండమని పౌలు తిమోతిని ప్రోత్సహించాడు. అయితే తన ఆలోచనను తెలియజేయుటకు పౌలు ఉపయోగించిన రూపకమును గమనించండి. తిమోతి ఒక “పనివానిగా” ఉండాలి. ఇక్కడ అపొస్తలుడు ఎర్గాటెస్ అను గ్రీకు పదమును ఉపయోగించాడు, మరియు ఈ పదము చాలాసార్లు పొలములో పనిచేయువారిని సూచిస్తుంది. మరియు తిమోతి వీలైనంత కృషి చేయాలి లేక ఇక్కడ వ్రాయబడినట్లు “జాగ్రత్తపడాలి.”

బైబిలు వ్యాఖ్యానకర్తను ఒక యోగ్యమైన, కష్టపడి పొలములో పనిచేయు కూలివానితో పోల్చుట ద్వారా, తన లేఖన అధ్యయనములో బలమైన కృషిని చేయమని పౌలు తిమోతిని ప్రోత్సహించాడు. అయితే ఖచ్చితముగా దీని అర్థము ఏమిటి? మరియు పరిశుద్ధాత్మ మీద మనము ఆధారపడుట మానవ కృషితో ఏ విధంగా అనుబంధం కలిగియుంటుంది?

బైబిలును అర్థము చేసుకొనుట పరిశుద్ధాత్మ చేయు ఒక కార్యమైతే మరియు మనము చేయు కార్యము కాకపోతే, బైబిలు వ్యాఖ్యానమును గూర్చి మనము ఎందుకు శ్రమపడతాము? దీనికి జవాబు చాలా సులువైనదిగా ఉన్నది. దేవుడు సోమరితనమునకు ప్రతిఫలమియ్యడు. ప్రసంగము చేయుటకు సిద్ధపడని సేవకుని దేవుడు అభిషేకింపడు. దేవుని కార్యములో పాలుపంచుకొనుటలో చురుకుదనము కావాలి ఎందుకంటే దేవుడు మన ద్వారా మాత్రమే కార్యము చేయుటలేదు, ఆయన మనలో కూడా కార్యము చేయుచున్నాడు... ఈ బైబిలు వ్యాఖ్యాన ప్రక్రియలో, మనము కేవలం బైబిలు చెప్పు మాటలను మాత్రమే అర్థము చేసుకొను అభిజ్ఞా సంబంధమైన కార్యము మాత్రమే జరుగుటలేదు, మనలో దేవుడు పవిత్రపరచు కార్యమును కూడా చేస్తున్నాడు, తద్వారా మనము ఈ లేఖనభాగము తెలుపు విషయములను మాత్రమే అర్థము చేసుకొను ప్రజలుగా గాక, మనము ఆలోచన చేయాలని దేవుడు కోరు విధముగా ఆలోచించువారిగాను, మనము ఆలోచించునట్లు ఆయన మనలను రూపించిన విధముగాను ఆలోచన చేయు ప్రజలమవుతాము.

— డా. కేరీ విన్జంట్

పరిశుద్ధాత్మ మీద ఆధారపడుట అనగా లేఖనమును వ్యాఖ్యానించునప్పుడు మనము పరోక్షముగా ఉండాలని అర్థము కాదు. వాస్తవానికి, బాధ్యతగల వ్యాఖ్యానములో కష్టపడి పని చేయుట భాగమైయుంటుంది. ఆత్మ మీద ఆధారపడుటలో ఆయన మనకు అనుగ్రహించిన పరికరములు మరియు అవకాశముల మీద కూడా ఆధారపడుట భాగమైయున్నది. ఎందుకంటే, పాఠకునిగా ఒక మానవుడు చేయు కృషితో సహా మానవ మార్గముల ద్వారా సంభాషించుటకు పరిశుద్ధాత్మ లేఖనమును రూపొందించాడు.

వాస్తవానికి, సిద్ధపాటు కొరకు మనము చేయు ప్రయత్నముల ద్వారా సాధారణంగా పరిశుద్ధాత్మ మనలను వెలిగిస్తాడు. ఆహారమును భుజించుట ద్వారా మన శరీరములు బలమును పొందుకొను విధముగానే, ఆయన వాక్యమును గూర్చి మనకు సంపూర్ణమైన అవగాహనను అనుగ్రహించుటకు ఆత్మ మన అధ్యయనము మరియు ధ్యానము ద్వారా కార్యము చేస్తాడు.

ఇప్పుడు, బైబిలులోని కొన్ని భాగములకు ఇతర భాగముల కంటే ఎక్కువ మానవ కృషి అవసరమవుతుంది అని లేఖనమును అధ్యయనము చేయు అనేకమందికి తెలుసు. ఒక వైపున, కొన్ని లేఖన భాగములు ఎంత స్పష్టముగా ఉంటాయంటే వాటిని అర్థము చేసుకొనుటకు చాలా తక్కువ కృషి అవసరమవుతుంది. శతాబ్దములుగా, రక్షణ పొందుట కొరకు నమ్మవలసిన మరియు పాటించవలసిన సమస్తము లేఖనములో ఏదో ఒక చోట ఎంత స్పష్టముగా ఉన్నదంటే ఇంచుమించు అందరు దానిని అర్థము చేసుకోగలరు అని ప్రొటెస్టెంట్లు సరిగానే నమ్మారు. అయితే మరొక వైపున, లేఖనములోని అనేక భాగములు చాలా కష్టమైనవి, మరియు కొన్ని అయితే అర్థము చేసుకొనుటకు ఇంచుమించు అసాధ్యమవుతుంది.

అయితే అభ్యాసికముగా మాట్లాడితే, లేఖనములోని ఎక్కువశాతం వాక్యభాగములు వర్ణమాలలోని ఈ రెండు తీవ్రతలకు మధ్య ఉంటాయి. లేఖనములోని స్పష్టమైన భాగముల కొరకు సిద్ధపడుటలో తక్కువ మానవ కృషి అవసరమవుతుంది. అయితే లేఖనములోని కష్టమైన వాక్యభాగములతో మనము వ్యవహరించునప్పుడు, సరియైన సిద్ధపాటు కొరకు ఎక్కువ మానవ కృషి అవసరమవుతుంది.

లేఖనమును వ్యాఖ్యానించుట కొరకు సిద్ధపడుటలో మానవ కృషి యొక్క ప్రాముఖ్యతను గుర్తించుటతో పాటుగా, మన మానవ కృషి మీద ప్రభావము చూపుటకు దేవుడు సాధారణముగా కలిగించు ప్రధానమైన ప్రభావములను గూర్చి అవగాహన కలిగియుండుట సహాయకరముగా ఉంటుంది.

నేడు సద్భావనగల బైబిలు వ్యాఖ్యానకర్తలకు ఏదైనా ఆటంకము కలిగిస్తుంది అంటే, అది తమ జీవితముల మీద ఉన్న బాహ్య ప్రభావములు ప్రతిబింబించకుండా లేఖనములను వారు అధ్యయనం చేయగలరు అని వారు ఆలోచన చేయుట అయ్యున్నది. మన జీవిత అనుభవములను ప్రక్కనబెట్టి పుర్వాలోచనలు లేకుండా మనము లేఖనములను ఆశ్రయించవచ్చు అని మనము ఆలోచన చేస్తుంటాము. అయితే బైబిలు వ్యాఖ్యానములో మన మానవ కృషిని గూర్చి మనము జ్ఞాపకముంచుకోవలసిన అత్యంత ప్రాముఖ్యమైన విషయములలో ఒకటి ఏమిటంటే, వేరే విధంగా చేయుటకు మనము ఎంత ప్రయత్నించినప్పటికీ, లెక్కలేనన్ని ప్రభావముల ద్వారా ప్రభావితము చేయబడి మనము లేఖనములను ఆశ్రయిస్తాము. మరియు మనము బైబిలును వ్యాఖ్యానించుచుండగా అవి మనకు సహాయము చేసినా లేక ఆటంకము కలిగించినా ఈ ప్రభావములను గూర్చి మనము ఎంతగా అవగాహన కలిగియుంటే, అది అనుకూలమైన విషయమైనా లేక ప్రతికూలమైనా అంతగా దానిని మనము వివేచింపగలుగుతాము.

లేఖన వ్యాఖ్యానము కొరకు మనము సిద్ధపడుచుండగా మనము చేయు ప్రయత్నముల మీద ప్రభావము చూపు మూడు ప్రధానమైన ప్రభావములను మనము పరిగణిద్దాము. ఈ ప్రభావములు ఒకదానితో ఒకటి ముడిపడియున్నాయి, కాని సులువుగా ఉండుట కొరకు మనము వాటిని వేర్వేరుగా చూద్దాము. ముందుగా మనము లేఖనము యొక్క భాష్యమును ప్రస్తావిద్దాము.

ఈ పాఠ్యక్రమములోని ఉద్దేశ్యముల కొరకు, మనము భాష్యమును ఈ విధంగా నిర్వచిద్దాము:

బైబిలు భాగములలో నుండి అర్థమును వెలికితీయుట

— ముఖ్యముగా చారిత్రిక నేపథ్యము, సాహిత్య రూపములు, వ్యాకరణము మరియు పదముల ఉపయోగము, వేదాంతశాస్త్ర సందర్భము, మొదలగు వాటిని చూచుట ద్వారా. భాష్యమును గూర్చి మనము అనేక విషయములను చెప్పవచ్చుగాని, ప్రస్తుతానికి, మనము మునుపు చూసినట్లే భాష్యము వ్యాఖ్యాన కార్యము కొరకు మనలను సిద్ధపరుస్తుంది అని మాత్రం ఇప్పుడు తెలియజేద్దాము.

లేఖన భాష్యముతో మనము చేయు పాలుపంపులు మనలను బైబిలు యొక్క తదుపరి వ్యాఖ్యానము కొరకు సిద్ధపరుస్తాయి. బైబిలుతో ఒక ముఖాముఖి అనుభవములో మనము అభివృద్ధి చేసుకున్న జ్ఞానము, నైపుణ్యములు మరియు వైఖరులు మన తదుపరి లేఖన అధ్యయనము మీద ప్రభావమును చూపుతాయి. ఉదాహరణకు, బైబిలు పదములను మరియు వ్యాకరణమును మనము అధ్యయనం చేసిన ప్రతిసారి, లేఖనములోని ఈ అంశములతో వ్యవహరించు సామర్థ్యమును మనము పెంపొందింపజేసుకుంటాము. కథనములు, నియమములు, పద్యభాగము, ప్రవచనములు, సామెతలు మొదలగు సాహిత్య రకములను మనము అర్థము చేసుకొనుటకు ప్రయత్నించినప్పుడు, తరువాత కాలములో వాటిని అర్థము చేసుకొనుటకు మనము మరి ఎక్కువగా సిద్ధపడతాము. మరియు బైబిలు యొక్క ప్రాచీన చరిత్రను గూర్చి నేర్చుకొనుచుండగా, తదుపరి అవగాహన కొరకు లేఖనములను ఆశ్రయించుటకు మనము సిద్ధపడియుంటాము. లేఖనము యొక్క భాష్యము కొరకు మనము చేయు ప్రతి కృషి మనలను తదుపరి అధ్యయనము కొరకు సిద్ధపరుస్తుంది.

వ్యాఖ్యానశాస్త్రములో మన మానవ ప్రయత్నముల మీద ప్రభావము చూపు రెండవ విషయము ఏమనగా సమాజములో మన పాలుపంపులు.

ఇతరులతో పాలుపంచుకొనుట లేఖనములను అర్థము చేసుకొనుటకు మనము చేయు ప్రయత్నములలో అత్యంత ప్రభావవంతమైన, కాని చాలాసార్లు నిర్లక్ష్యం చేయబడిన, ప్రభావము అయ్యున్నది. మనమంతా బైబిలు యొక్క పలు భాష్యములలో పాలుపంచుకోవాలని కోరతాము. అయితే మనము దీనిని గ్రహించినా గ్రహించకపోయినా, ఇతర ప్రజలతో మన పాలుపంపుల ద్వారా ప్రభావితము కాకుండా బైబిలును వ్యాఖ్యానించుట ఇంచుమించు అసాధ్యమే అవుతుంది. మరియు ఇది చాలా మంచి విషయమైయున్నది.

ప్రస్తుత లోకమునకు మరియు మునుపటికి చెందిన ఇతర ప్రజలు పరిశుద్ధాత్మ నుండి అనేక గొప్ప వరములను మరియు మెళకువలను పొందుకున్నారు మరియు లేఖనమును వ్యాఖ్యానించుచుండగా అవి మనకు సహాయపడగలవు. వారు విలువైన సూచన కార్యములను అందించారు. వారు మనకు దైవికమైన సలహాలను ఇస్తారు. వారు మనకు దేవుని వాక్యమును అర్థము చేసుకొనుటకు మరియు అనువర్తించుటకు ఉపయోగపడు బైబిలు భాషలను, సాహిత్యమును, చరిత్రను మరియు అన్ని రకముల ఇతర విషయములను బోధిస్తారు. మన చేతులలో మనము పట్టుకొను బైబిళ్ళు కూడా మన యొద్దకు ఇతరుల నుండి వచ్చాయి. పండితులు, అనువాదకులు, సంపాదకులు మరియు ప్రచురణకర్తల ద్వారా అవి మనకు అందించబడినవి.

ఇంతేగాక, మన సంఘములు మరియు మన డినామినేషన్లతో సహా మనము సౌకర్యవంతముగా భావించు క్రైస్తవ సమాజములు మనకు ఉన్నాయి. మనము లేఖనమును చదువు మరియు అర్థము చేసుకొను విధానము మీద ప్రభావము చూపు కొన్ని సామాన్య పరంపరలు ఈ సమాజములలో ఉంటాయి. మరియు కాపరులు, బోధకులు మరియు ఇతర వ్యక్తిగత విశ్వాసుల నుండి మనము పొందుకొను సలహాలు కూడా మనకు అనేక విధాలుగా సహాయపడతాయి.

ఇతరుల యొక్క సఫలతలు, వైఫల్యములు మరియు మెళకువల ద్వారా మనము అనేక విలువైన విషయములను నేర్చుకుంటాము. మన వలె ఉన్నవారి నుండి మరియు మనకు భిన్నముగా ఉన్నవారి నుండి, మునుపటి వారి నుండి మరియు ప్రస్తుతము నివసిస్తున్నవారి నుండి, మనకు వ్యక్తిగతముగా సుపరిచితులైనవారి నుండి మరియు మనము ఎన్నడును కలవనివారి నుండి మనము నేర్చుకుంటాము. మనము దీనిని గుర్తించినా గుర్తించకపోయినా, మన లేఖన వ్యాఖ్యానములన్నీ ఇతర ప్రజల ద్వారా లోతుగా ప్రభావితము చేయబడాలి.

సిద్ధపడుటకు మనము చేయు ప్రయత్నములలో మూడవ ప్రధానమైన ప్రభావము మన వ్యక్తిగత క్రైస్తవ అనుభవము అయ్యున్నది.

క్రైస్తవులముగా మన జీవితములలో ఇప్పటికే మనము చర్చించిన భాష్యము మరియు ఇతరులతో పాలుపంపులతో సహా మనము ఎదుర్కొను ప్రతిది మన క్రైస్తవ అనుభవములో భాగమైయున్నది అని చెప్పుట సమంజసమే అవుతుంది. కాబట్టి మన పాఠంలో ఈ సమయమందు, మన వ్యక్తిగత క్రైస్తవ అనుభవము లేక దేవునితో మన నడక అని మనము పిలచుదానిని గూర్చి మనము సాధారణముగా ఆలోచన చేయు విషయముల మీద దృష్టిపెట్టాలని ఆశించుచున్నాము. క్రైస్తవ జీవనములో ఈ వ్యక్తిగత కోణములు మన లేఖన వ్యాఖ్యానములకు విభిన్నమైన విధానములలో తోడ్పాటునిస్తాయి.

ఉదాహరణకు, మన క్రైస్తవ ఎదుగుదల మరియు పరిశుద్ధపరచబడుట బైబిలును వ్యాఖ్యానించు మన సామర్థ్యమును బలపరుస్తాయి; మనము జీవించు విధానము మనము లేఖనములను అర్థము చేసుకొను సామర్థ్యము మీద లోతుగా ప్రభావము చూపుతుంది. క్రీస్తు అనుచరులు నమ్మకముగా ఉన్నప్పుడు దేవునిని సంతోషపరచు విధములుగా ఆలోచించుటకు, కార్యములు చేయుటకు మరియు అనుభవించుటకు ప్రయత్నించినప్పుడు వారు లేఖనముల నుండి నేర్చుకొనుటకు మరింత ఉత్తమమైన రీతిలో వారు సిద్ధపడియున్నారని కనుగొంటారు. అయితే మనము మన జీవితములను దేవుని వాక్యమునకు అనుగుణంగా మార్చుకొననట్లయితే, బైబిలు అధ్యయనము చాలాసార్లు తప్పుగా వ్యాఖ్యానించుటకు మరియు తప్పుగా అనువర్తించుటకు దారితీస్తుంది.

మన మునుపటి అనుభవములు కూడా బాధ్యతాయుతముగా వ్యాఖ్యానించు మన సామర్థ్యము మీద ప్రభావమును చూపుతాయి. మనము ఆలోచించు, భావించు, లేక వ్యవహరించు విధానముల మీద ప్రభావము చూపు అనుభవములను విశ్వాసులందరు కలిగియున్నారు. మరియు ఈ అనుభవములు లేఖనమును వ్యాఖ్యానించు మన ప్రయత్నములను ప్రభావితము చేస్తాయి. ఉదాహరణకు, ధనిక పరిసరాలలో ఎదిగినవారు లూకా సువార్తలో వ్యక్తపరచబడిన పేదల కొరకు ఆలోచన కలిగియుండవలసిన విషయమును అర్థము చేసుకొనుటలో కష్టమును ఎదుర్కొంటారు. ఘనతను ఉద్ఘాటించిన సంస్కృతిలో ఎదిగిన వ్యక్తి అవమానమునకు సంబంధించిన లేఖనభాగములను సులువుగా అర్థము చేసుకోగలుగుతాడు.

అంతేగాక, ప్రతి వ్యక్తికి విభిన్నమైన వ్యక్తిగత బలములు మరియు బలహీనతలు, విభిన్నమైన సామర్థ్యములు మరియు అసమర్థతలు, పరిశుద్ధాత్మ నుండి కలిగిన విభిన్నమైన వరములు, మరియు పలు పాపములు కూడా ఉంటాయి. ఏదో ఒక విధముగా, లేఖనమును వ్యాఖ్యానించు మరియు అనువర్తించు విషములో ఇవన్నీ మన సామర్థ్యమును ప్రభావితము చేస్తాయి.

మన పాపములు బైబిలుతో సహా సత్యమును గ్రహించు సామర్థ్యము మీద ప్రభావము చూపుతాయి. మన దుర్నీతియందు మరియు మన పాప స్వభావమందు మనము సత్యమును అణచివేస్తాము అని బైబిలు సెలవిస్తుంది. ఈ విధంగా, సత్యమును అర్థము చేసుకొను మన సామర్థ్యము మీద మన పాపము ప్రతికూలమైన ప్రభావమును చూపుతుంది. ఈ విధంగా, మనము బైబిలును ఆశ్రయించినప్పుడు, పాపము యొక్క మరల్చు ప్రభావము లేకుండా దానిని అర్థముచేసుకొనుటలో పరిశుద్ధాత్మ మనకు సహాయము చేస్తాడు, కాబట్టి మనము ఆయనకు కృతజ్ఞులమైయున్నాము.

— డా. కే. ఎరిక్ ధోయెన్స్

ప్రజలు లేఖనములో తమకు నచ్చిన విషయమును కనుగొనుటకు ప్రయత్నిస్తారు కాబట్టి పాపము మన లేఖన వ్యాఖ్యానమునకు ఆటంకమును కలిగించగలదు. ఉదాహరణకు, కొన్ని శతాబ్దముల బానిసత్వమును సమర్థించు విధముగా లేఖనమును వ్యాఖ్యానించుటకు బానిసలను కలిగియున్నవారు ప్రయత్నించారు. వారు తమ ఆర్థిక లాభముల దృష్ట్యా ఇలా చేసేవారు, కాబట్టి వారు — ఒకవేళ బానిసలకు ప్రసంగించుటకు వారికి అవకాశము లభిస్తే — బానిసలు తమ యజమానులకు నమ్మకముగా ఉండాలని వ్రాయబడియున్న ఎఫెసీ 6:5 నుండి ప్రసంగించేవారు. అయితే వారు “యజమానులారా, ... ఆప్రకారమే వారియెడల ప్రవర్తించుడి” అని చెప్పు 6:9 మీద దృష్టిపెట్టరు. అనగా, దీనిని మీరు ఖచ్చితముగా పాటిస్తే — అనగా యజమానులు తమ బానిసలకు సేవ చేయవలసి వస్తే — బానిసత్వము ఎంతో కాలము నిలువదు. ఇది ఒక విధముగా ఆర్థిక లాభములను నాశనము చేస్తుంది. అయితే ప్రజలు ఒక ఉద్దేశముతో లేఖనమును ఆశ్రయించినప్పుడు, వారు తమ జీవన విధానమును సమర్థించుటకు ప్రయత్నిస్తారు, కాబట్టి వారు ఆ విధముగానే లేఖనమును చదువుతారు. ఇప్పుడు, ప్రజలకు వ్యతిరేకమైన సమస్య ఉంటుంది. వారు ఎల్లప్పుడూ ఖండింపును ఎదుర్కొను నేపథ్యముల నుండి వారు వచ్చియుండవచ్చు లేక వారు ఎల్లప్పుడూ అపరాధ భారమును ఎదుర్కొనుచుండవచ్చు, మరియు వారు కూడా లేఖనమును అదే విధముగా చదువుతారు. మన పుర్వాలోచనల ఆధారంగా లేఖనమును అధ్యయనం చేయుటకు బదులుగా, వీలైనంత వరకు లేఖన భాగములోని సందేశము మనకు ఏమి బోధించుచున్నదో తెలుసుకొనుటకు ప్రయత్నించాలి.

— డా. క్రైగ్ ఎస్. కీనర్

వ్యాఖ్యానము కొరకు మన సిద్ధపాటును గూర్చిన ఈ పాఠములో, లేఖనమును వ్యాఖ్యానించుటకు ముందు సిద్ధపాటుకు సంబంధించి మనము దృష్టిలో ఉంచుకోవలసిన రెండు కీలకమైన విషయములను చూశాము. కర్బన సంబంధమైన ప్రేరణ మరియు ఆత్మ యొక్క వెలిగింపు అను సిద్ధాంతముల దృష్ట్యా పరిశుద్ధాత్మ మీద మన ఆధారమును మనము పరిగణించాము. మానవ కృషి యొక్క ప్రాముఖ్యతను చూచుట ద్వారా మరియు మన వ్యాఖ్యాన ప్రయత్నముల మీద దేవుడు కలిగించు కొన్ని ప్రభావములను విశ్లేషించుట ద్వారా మనము మానవ కృషి యొక్క అవసరతను ఉద్ఘాటించాము.

బైబిలును వ్యాఖ్యానించుట కొరకు సిద్ధపాటులో మనము పరిశుద్ధాత్మ మీద ఆధారపడాలి, అలాగే మానవ కృషిని కూడా విరివిగా చేయాలి. పరిశుద్ధాత్మ పట్ల ఉద్దేశపూర్వకమైన, ప్రార్థనతో కూడిన సమర్పణ ద్వారా మనము లేఖనములను ఆశ్రయించాలి, ఎందుకంటే ఆయన లేఖనములను ప్రేరేపించాడు మరియు లేఖనములను అర్థము చేసుకొనుటకు మన మనస్సులను మరియు హృదయములను వెలిగించునట్లు తండ్రి మన యొద్దకు ఆయనను పంపియున్నాడు. అయితే అదే సమయములో, చదువుట ద్వారా, అధ్యయనం చేయుట ద్వారా, ఇతరులతో పాలుపంచుకొనుట ద్వారా మరియు ప్రతి అడుగులో లేఖనములను మన సొంత జీవితములకు అనువర్తించుకొనుట ద్వారా మనము మన సొంత ప్రయత్నములను చేయునట్లు దేవుడు నిర్ణయించాడు. లేఖనములను వ్యాఖ్యానించుట మన జీవితకాలమంతా మనము చేయవలసిన ఒక సంక్లిష్టమైన కార్యమైయున్నది, కాబట్టి వీలైనంత చక్కగా మనము సిద్ధపడునట్లు జాగ్రత్తపడాలి. దేవుని ఆత్మ మీద మరియు మన మానవ కృషి మీద మనము ఎంత ఎక్కువగా దృష్టి నిలిపితే, బైబిలును వ్యాఖ్యానించుట కొరకు మనము అంత ఎక్కువగా సిద్ధపడగలుగుతాము.