HPT-01 పౌలు మరియు అతని ధర్మశాస్త్రం

మీకు నిజముగా బాగా తెలుసునని మీరు భావించిన యొక స్నేహితుడు మీకెవరైనా ఉన్నారా, తరువాత ఎదో జరిగి తనలో ఎన్నడూ చూడని ఒక కోణమును మీరు చూడడం జరిగిందా? క్రైస్తవులు అపొస్తలుడైన పౌలును గూర్చి తీవ్రమైన అధ్యయనం ప్రారంభించినప్పుడు ఇలాంటివి తరచుగా జరుగుతాయి. చాలామంది క్రైస్తవులు పౌలు మరియు ఆయన పత్రికలను గూర్చిన అవగాహన కలిగినవారుగా ఉన్నారు. ఆయన పత్రికలలో నుండి అనేక సందేశాలను మనం వింటాము, మరియు బైబిలు తరగతులలో వీటి మీద ఎక్కువగా దృష్టి పెడతాము. అనేక విధాలుగా అతడు మనకు తెలిసిన స్నేహితుడిలా అనిపిస్తాడు. అయితే పౌలు జీవితము మరియు వేదాంతమును మనము లోతుగా త్రవ్వినప్పుడు, మనమ మునుపెన్నడూ గమనించని ఒక క్రొత్త కోణమును మనము గమనిస్తాము.

ఈ పాఠ్యక్రమమునకు పౌలు వేదాంతశాస్త్రము యొక్క మూలాంశము అను శీర్షికనిచ్చాము. ఈ పాఠ్యక్రమములో, అపొస్తలుని వేదాంతశాస్త దృక్కోణముల యొక్క కేంద్రమును, లేక గుండెకాయను మనము విశదీకరిద్ధాము. ఈ మొదటి పాఠమునకు మనము, “పౌలు మరియు అతని యొక్క వేదాంతశాస్త్రము” అని పేరు పెట్టాము. మరియు పౌలు యొక్క జీవితముతో సుపరిచితమగుట అతని వేదాంతశాస్త్రములోని అత్యంత ప్రాముఖ్యమైన మరియు ప్రఖ్యాతిగాంచిన విషయములను అర్థము చేసుకొనుటలో మనకు సహాయపడు విధానమును మనము చూద్దాము.

మూడు ప్రధాన అంశాలను పరిశీలన చేద్దాము. మొదటిగా, పౌలు యొక్క క్రైస్తవ నమ్మకాలను అతని నేపథ్యము ఎలా ప్రభావితం చేసినదో చూచుటకు పౌలు యొక్క సాంస్కృతిక నేపథ్యములోని కొన్ని ముఖ్యమైన విషయాలను పరిశీలిద్దాము. రెండవదిగా, పౌలు యొక్క నమ్మకాలు ఒక అపొస్తలునిగా అతని పరిచర్యకు ఎలా అనుసంధానం కలిగియున్నవో చూద్దాము. మరియు మూడవదిగా, పౌలు యొక్క కేంద్ర వేదాంత దృక్పథాలను, అనగా తాను నమ్మిన అనేక ఇతర విషయములను ఆధారితము చేసుకొనిన కీలకమైన ఆలోచనలను గుర్తించుదాము. పౌలు యొక్క సాంస్కృతిక నేపథ్యమును పరిశీలిస్తూ ఆరంభిద్దాము.

దేవుని గూర్చి మరియు మన చుట్టూనున్న ప్రపంచము గూర్చి మనము కలిగియున్న అనేక నమ్మకాలను సాధారణ అనుభవాలు ప్రభావితం చేస్తాయని మనందరికీ తెలుసు. ఏ ఒక్కరు కూడా ఇప్పటివరకు శూన్యములో నుండి వేదాంతశాస్త్రమును అభివృద్ధి చేయలేదు మరియు పౌలు విషయంలో కూడా ఇదే వాస్తవమైయుంది. పరిశుద్ధాత్ముడు పౌలును క్రైస్తవ విశ్వాసము యొక్క సత్యములోకి నడిపించినప్పటికీ, అతనిని సత్యములోనికి నడిపించే ప్రక్రియలో పౌలు నేపథ్యములోని అనేక విషయములను ఆత్మ ఉపయోగించుకున్నాడు. అనగా పౌలు వేదాంతశాస్త్రము యొక్క మూలాంశములను అర్థం చేసుకోవాలంటే, ఆయన జీవితమును గూర్చిన అవగాహన మనకు ఉండాలి.

విచారకరముగా, పౌలు యొక్క వ్యక్తిగత నేపథ్యమును గూర్చి మనకు ఎక్కువ వివరాలు తెలియదు, కాని అతడు రెండు బలమైన సంస్కృతుల ప్రభావము క్రింద పెరిగాడని మాత్రం మనకు తెలుసు. ఒకవైపు, యూదుల సంస్కృతి అతనిని బహుగా ప్రభావితం చేసింది. మరోవైపు, అన్యుజనులైన గ్రీకో-రోమన్ సంస్కృతి మధ్య పెరుగుట వలన అది అతనిని ప్రాముఖ్యమైన రీతులలో ప్రభావితం చేసింది. యూదుల సంస్కృతి అపొస్తలుడైన పౌలును ప్రభావితము చేసిన విధానమును చూస్తూ ఆరంభిద్దాము.

యేసు, ఆయన ఇతర అపొస్తలులు, మరియు మొదటి శతాబ్దములోని అనేక ఇతర క్రైస్తవుల వలె పౌలు కూడా ఒక యూదుడని ఆధునిక క్రైస్తవులు చాలా సులభంగా మరచిపోతుంటారు. తన దినమున నివసించిన అనేకమంది ఇతర యూదుల వలనే, ఇశ్రాయేలులోని సంప్రదాయములు అతని జీవితములోని ప్రతి కోణమును తాకాయి. పౌలు యొక్క యూదా పెంపకము అతడు నమ్మిన విషయములను, అతని దినచర్యలలోని ప్రాధాన్యతలను, మరియు అతని విశ్వాసము పట్ల అతడు కలిగియుండిన లోతైన భావనాత్మక సమర్పణలను ప్రభావితము చేశాయి. ఈ కారణము చేత, పౌలు మీద అతని యూదా వారసత్వము చూపిన ప్రభావమును తక్కువగా అంచనా వేస్తే, అతని వేదాంతశాస్త్రములోని ముఖ్య భాగమును కోల్పోయే అవకాశం ఉంది.

పౌలు యొక్క యూదుల సంస్కృతి అతనికి ఎందుకు ప్రధానమైయున్నదో కనీసం రెండు విధానములలో మనము చూడవచ్చు. ఒకవైపు, పౌలు క్రైస్తవుడుగా మార్చబడక మునుపే తన యొక్క యూదా వారసత్వం యెడల ఒక ఆత్మ చేతనం కలిగియున్నాడని క్రొత్త నిబంధన నివేదిక స్పష్టం చేస్తుంది. మారుమనస్సుకు ముందు తన యౌవ్వనమును గూర్చి అతడిచ్చిన వివరణ, అతడు యూదామతముకు బలముగా కట్టుబడి ఉన్నాడని తెలియజేస్తుంది. ఉదాహరణకు, ఫిలిప్పీయులకు 3:5లో, పౌలు ఇలా తెలిపాడు:

... ఎనిమిదవ దినమున సున్నతి పొందితిని, ఇశ్రాయేలు వంశపువాడనై, బెన్యామీను గోత్రములో పుట్టి హెబ్రీయుల సంతానమైన హెబ్రీయుడనై, ధర్మశాస్త్ర విషయము పరిసయ్యుడనై యుంటిని (ఫిలిప్పీయులకు 3:5).

పౌలు మతపరముగా ఒక సాంప్రదాయవాది, మరియు అతడు ఇశ్రాయేలు యొక్క సాంప్రదాయములను భద్రపరచుటకు మరియు అనుసరించుటకు పూర్తిగా సమర్పించుకున్నాడు. గలతీ. 1:14లో తనను గూర్చి తాను యేమని వర్ణించుకున్నాడో వినండి:

నా పితరుల పారంపర్యాచారమందు విశేషాసక్తి గలవాడనై, నా స్వజాతీయులలో నా సమానవయస్కులైన అనేకులకంటె యూదుల మతములో ఆధిక్యతనొందితినని నా నడవడినిగూర్చి మీరు వింటిరి (గలతీయులకు 1:14).

వాస్తవంగా చెప్పాలంటే, అతడు మారుమనస్సు పొందుటకు ముందు యూదా మతము యెడల పౌలుకు ఉన్న ఆసక్తి బహు గొప్పది గనుక సంఘమును యూదా మతము యొక్క అబద్ధబోధగా పరిగణించి దానిని ఘోరముగా హింసించాడు.

అంతేగాక, పౌలు యూదామతము యొక్క పారంపర్యాచారమందు ఉన్నత విద్యను పొందాడు. అపొస్తలుల కార్యములు 22:3 ప్రకారం, యెరూషలేములో ఒక ప్రసిద్ధిచెందిన గమలీయేలు అను రబ్బీ పాదములయొద్ద విద్యార్థిగా విద్యనభ్యసించాడు. అజ్ఞానియైన మతోన్మాదివలె కాకుండ, పౌలు యూదుల వేదాంతశాస్త్రము మరియు లేఖనముల అవగాహనలో గొప్ప శిక్షణ పొందాడు మరియు ఉన్నతమైన పరిజ్ఞానం సంపాదించాడు.

అపొస్తలుడైన పౌలు, ఒక అద్భుతమైన వ్యక్తి, ఒక వేదాంతవేత్త అయ్యున్నాడు. అతడు గమలీయేలు అను బోధకుని పాదముల యొద్ద విద్యనభ్యసించాడు. తరువాత, వేదాంతవేత్తగా, యెరూషలేములో జరుగుచున్న విషయములు అతనికి నచ్చలేదు కాబట్టి సంఘమును హింసించుట ప్రారంభించాడు, ఎందుకంటే అతడు యూదా మతమును బలముగా నమ్మేవాడు. ఇశ్రాయేలు వంశపువాడనై, బెన్యామీను గోత్రములో పుట్టినవాడనై, పరిసయ్యుడనై, ధర్మశాస్త్రమును ఆచరించువాడనైయుంటిని అని అతడు స్వయంగా తనను గూర్చి చెబుతున్నాడు — మీకు చదువుటకు సమయము ఉంటే, ఫిలిప్పీ. 3లో అతడు తనను తాను వర్ణించుకొను విధానమును మీరు చూడవచ్చు — కాబట్టి అతడు ధర్మశాస్త్రమును చాలా జాగ్రత్తగా అధ్యయనం చేసిన ఒక జ్ఞానవంతుడైన వరములుగల వ్యక్తి. తరువాత, దమస్కు మార్గమున దేవుడు అతనిని మార్చిన తరువాత, అతడు సువార్తను సమర్థించుటకు మరియు సువార్తను వ్యాపింపజేయుటకు తన జ్ఞానమును ఉపయోగించాడు... అతడు ఒక జ్ఞానియైన వేదాంతవేత్త కాబట్టి, ధర్మశాస్త్రములోని ప్రతి భాగమును అర్థము చేసుకున్నాడు కాబట్టి, దానిని త్వరితముగాను చక్కగాను వివరించగలిగాడు.

— ప్రొ. ముమో కిసవు

మరొక వైపు, క్రైస్తవునిగా మారక ముందు మాత్రమే పౌలు యొక్క యూదా సంస్కృతి అతనికి ప్రాముఖ్యమైనది కాదు; మారుమనస్సుపొందిన తరువాత కూడా ఇదే వారసత్వముకు అతడు అమితముగా ఋణపడినవాడిగా జీవించాడు. ఉదాహరణకు, క్రైస్తవునిగా కూడా అతడు యూదుల పారంపర్యాచారాలను ఆచరించుట కొనసాగించాడు. 1 కొరింథీయులకు 9:20లో అతడు చెప్పినట్లు:

యూదులను సంపాదించుకొనుటకు యూదులకు యూదునివలె ఉంటిని. ధర్మశాస్త్రమునకు లోబడినవారిని సంపాదించుకొనుటకు నేను ధర్మశాస్త్రమునకు లోబడినవానివలె ఉంటిని (1 కొరింథీయులకు 9:20).

యూదుల మధ్య క్రీస్తు సువార్తను వ్యాపింపజేయుటకు క్రైస్తవుడైన పౌలు తన పితరుల పారంపర్యాచారములను ఎంత జాగ్రత్తగా అనుసరించాడో క్రొత్త నిబంధన అనేకసార్లు పేర్కొంటుంది. క్రీస్తు యెడల పౌలు కలిగియున్న విశ్వాసమును బట్టి యూదులు అతనిని తీవ్రంగా హింసించినప్పటికీ, పౌలు యొక్క జాతీయ గుర్తింపు మరియు రాజభక్తి ఎంతో బలమైనవి గనుక వారిని ఇంకను రక్షించాలని అతడు తీవ్రంగా కోరుకున్నాడు. రోమా 9:2-5లో తోటి యూదులను గూర్చి పౌలు బయలుపరచిన భావనలను వినండి:

నాకు బహు దుఃఖమును, నా హృదయములో మానని వేదనయు కలవు. సాధ్య మైనయెడల, దేహసంబంధులైన నా సహోదరుల కొరకు నేను క్రీస్తునుండి వేరై శాపగ్రస్తుడనై యుండగోరుదును. వీరు ఇశ్రాయేలీయులు; దత్తపుత్రత్వమును మహిమయు నిబంధనలును ధర్మశాస్త్ర ప్రధానమును అర్చనాచారాదులును వాగ్దానములును వీరివి. పితరులు వీరివారు; శరీరమునుబట్టి క్రీస్తువీరిలో పుట్టెను. ఈయన సర్వాధికారియైన దేవుడైయుండి నిరంతరము స్తోత్రార్హుడైయున్నాడు (రోమీయులకు 9:2-5).

పౌలు యొక్క యూదుల సంస్కృతి ఒక కీలకమైన ప్రశ్నను లేవనెత్తుతుంది. పౌలు యొక్క యూదా వారసత్వము అతని క్రైస్తవ వేదాంతశాస్త్రమును ఏ విధంగా ప్రభావితం చేసింది? అనేక విధాలుగా, పౌలు పత్రికలలోని ప్రతి పేజిలో దాదాపు ఈ ప్రభావం స్పష్టంగా కనిపిస్తుంది, కాని రెండు విషయాలను మాత్రం జ్ఞాపకం ఉంచుకోవలసిన అవసరం ఉంది.

మొదటిగా, యూదునిగాను మరియు యూదుడైన క్రైస్తవునిగాను, పౌలు పాత నిబంధన లేఖనముల యొక్క అధికారమును నమ్మాడు. ఎటువంటి కాపట్యము లేకుండా అతడు వాటిని నమ్మాడు మరియు వాటికి లోబడినాడు. పాత నిబంధన బోధనను వ్యతిరేకించే దేనినైన పౌలు నమ్మియుండేవాడు కాదు.

పౌలు ఒక యూదుడు. అతడు ఎల్లప్పుడు ఒక యూదుడే. అతని నేపథ్యము యూదా నేపథ్యము. ఆసక్తికరమైన విషయం ఏమిటంటే, తార్సులో జన్మించి కూడా అతడు తన యూదా గుర్తింపును కొనసాగించాడు, యూదుని వలె జీవించాడు — ఇది పాలస్తీనాలో లేదు, ఇది గ్రీకు లోకములో యూదులు నివసించుట అయ్యున్నది, మరియు దీనిని వలస వెళ్లినవారు అనవచ్చు... గలతీ పత్రికలో అతడు తన నేపథ్యమును గూర్చి మాట్లాడినప్పుడు, తన పితరులను గూర్చి నేర్చుకొను విషయములో అతని అసక్తి తన తోటివారిని మించినదిగా ఉన్నది అని అతడు చెబుతున్నాడు. మరియు అక్కడ అతడు యూదా మతమును గూర్చి మాట్లాడుతున్నాడు. తనను తాను పాత నిబంధన బోధనలకు సమర్పించుకొనుటను గూర్చి, అనగా, హెబ్రీ బైబిలులోని బోధనలకు సమర్పించుకొనుటను గూర్చి మాట్లాడుతున్నాడు. మరియు అతడు అన్యుల మధ్య యేసును గూర్చి బోధించినప్పుడు కూడా అతని యూదా నేపథ్యము వెలుగులోనికి వస్తుంది. అతడు దేశములకు వెళ్లునప్పుడు, యేసు యొక్క రాక యూదుల మెస్సీయ యొక్క రాక అయ్యున్నది అని, దేశములకు సువార్త రాక అబ్రాహామునకు చేయబడిన వాగ్దానముల యొక్క నెరవేర్పు అయ్యున్నది అని వారు అర్థము చేసుకోవాలని అతడు కోరాడు... మారుమనస్సు పొందుటకు ముందు పౌలు యొక్క యూదా నేపథ్యమును గూర్చి మనము ఆలోచించినట్లయితే, అతని యూదా నేపథ్యము అతడు హింసించునట్లు పురికొల్పింది. అయితే పునరుత్థానుడైన క్రీస్తును కలుసుకొనిన తరువాత, అతని యూదా నేపథ్యమును గూర్చి, ఇప్పుడు క్రీస్తు అను అద్దము నుండి కలిగియుండిన అవగాహన, యూదుడు లేక అన్యుడు అను భేదము లేదు అని, సున్నతి ప్రాముఖ్యమైన విషయము కాదు అని చెప్పునట్లు అతనిని పురికొల్పింది.

డా. మార్క్ ఎ. జెన్నింగ్స్

పాత నిబంధనను గూర్చి తన శిష్యుడైన తిమోతిని పౌలు ఏ విధంగా ఉపదేశించాడో వినండి:

క్రీస్తు యేసునందుంచవలసిన విశ్వాసము ద్వారా రక్షణార్థమైన జ్ఞానము నీకు కలిగించుటకు శక్తిగల పరిశుద్ధ లేఖనములను బాల్యమునుండి నీ వెరుగుదువు గనుక, నీవు నేర్చుకొని రూఢియని తెలిసికొన్నవి యెవరివలన నేర్చుకొంటివో ఆ సంగతి తెలిసికొని, వాటియందు నిలుకడగా ఉండుము (2 తిమోతి 3:14-15).

పౌలు జీవిత కాలమంతా పాత నిబంధన పౌలునకు బైబిలుగా ఉండినది, మరియు నమ్మకమైన క్రైస్తవులందరు ఈ లేఖనములను — లేక “పవిత్రమైన రచనలను” — దేవుని వాక్యముగా పరిగణించి, వాటికి సమర్పించుకోవాలని పిలుపునిచ్చాడు.

రెండవదిగా, ఇశ్రాయేలు శ్రమలను అంతము చేసి, దేవుని రాజ్యమును అన్యజనుల మధ్య కూడా వ్యాపింపజేసే దావీదు యొక్క గొప్ప కుమారుడైన మెస్సీయను దేవుడు ఒకానొకదినమందు పంపుతాడను యూదుల నమ్మకమును పౌలు బలముగా నమ్మాడు. వాస్తవానికి, సుదీర్ఘకాలంగా వేచిచూస్తున్న మెస్సీయ యేసే అని అతడు నమ్మాడు కాబట్టే పౌలు క్రీస్తు అనుచరుడయ్యాడు. అందుకే పౌలు యేసును క్రీస్తు లేదా క్రిస్టోస్ అని పిలవడానికి వెనుకాడలేదు, ఇది మెషియాక్ లేదా మెస్సీయ అను హెబ్రీ పదము యొక్క గ్రీకు అనువాదమై ఉంది.

క్రైస్తవ్యము యూదా మతమునకు ప్రత్యామ్నాయముగా వచ్చిన మతమని పౌలు భావించలేదు. బదులుగా, క్రైస్తవ్యము అతని యూదా వారసత్వమునకు నేరవేర్పుగా ఉన్నదని అతడు బలముగా నమ్మాడు. హెబ్రీ లేఖనములకు, మెస్సీయ ద్వారా దేవుని రాజ్యము యొక్క సార్వత్రిక విజయమును గూర్చిన నిరీక్షణకు పూర్తిగా సమర్పించుకొనుట పౌలు యొక్క క్రైస్తవ దృష్టికోణములో కీలకమైన కోణములైయున్నవి. ఇవి మరియు ఇతర అనేక మార్గములలో, పౌలు యొక్క కేంద్ర క్రైస్తవ నమ్మకాలు యూదా వారసత్వము మీద ఆధారపడి ఉన్నవి.

అయితే పౌలు కేవలం యూదా వారసత్వము ద్వారా మాత్రమే ప్రభావితం చేయబడలేదు. పరిశుద్ధాత్ముడు తన వేదాంతశాస్త్రమును రూపొందించడానికి పౌలు అన్యజనుల సంస్కృతితో కలిగియున్న సంబంధమును కూడా ఉపయోగించాడు.

పాత నిబంధన యొక్క ముగింపులో ఇశ్రాయేలు వాగ్దాన భూమి నుండి చెరగొనిపోబడిననాటి నుండి, అనేకమంది యూదులు మధ్యధరా లోకములో స్థిరపడ్డారు. కొంతమంది యూదులు తమను తాము అన్యుల నుండి దూరముగా ఉంచుకొనుటకు వీలైనంత ప్రయత్నము చేశారు. ఇతరులు తాము నివసించిన దేశములలోని సాంస్కృతిక విలువలు మరియు ఆచారములను హత్తుకున్నారు. అయితే అన్యుల మధ్య జీవించుచు, పని చేయుచుండగా యూదుల ఆచారములను అనుసరించుట కొనసాగించిన భక్తిగల యూదుల సమాజములు కూడా ఉన్నాయి. మనము ఇంతకు ముందే చూసినట్లు, భక్తిగల యూదుని వలె పౌలు పెంచబడ్డాడు, కాని అతడు నివసించిన గ్రీకో-రోమన్ అన్యుల సంస్కృతి కూడా అతనికి సుపరిచితమైనదే అని క్రొత్త నిబంధన స్పష్టము చేస్తుంది.

మొదటిగా, పౌలు తన జీవితమంతా యూదుల పాలస్తీనాలో మాత్రమే కాకుండా వివిధ సమయాలలో అన్యజనుల ప్రపంచంలో కూడా నివసించాడని మనం గమనించాలి. అపొస్తలుల కార్యములు 21:39 ప్రకారం, పౌలు కిలికియలోని తార్సు పట్టణముకు చెందినవాడు. అపొస్తలుల కార్యములు 22:3 ప్రకారం, ఆయన యెరూషలేములో పెరిగాడని మనం చదువుతాము. కాని అపొస్తలుల కార్యములు 9:30 మరియు 11:25 పౌలు యౌవ్వన కాలములో కూడా తార్సులో నివాసము చేశాడని సూచిస్తున్నాయి.

అంతేగాక, పౌలు రోమా పౌరత్వాన్ని పూర్తిగా అనుభవించాడు అనే వాస్తవము అన్యజన ప్రపంచంతో అతనికి పరిచయము ఉందను విషయమును మరింత బలపరుస్తుంది. వాస్తవానికి, అపొస్తలుల కార్యములు 22:28 ప్రకారం, అతడు తన పౌరసత్వమును కొనుగోలు చేయలేదుగాని రోమా పౌరునిగా జన్మించాడు. సువార్తను వ్యాపింపజేయడానికి మరియు తననుతాను రక్షించుకోవడానికి పౌలు రోమా పౌరునిగా తన హక్కులను ఉద్ఘాటించాడని అపొస్తలుల కార్యములు పుస్తకములోని అనేక సందర్భాలలో మనం చదువుతాము.

అంతేగాక, పౌలు అన్యజనుల సంఘములకు వ్రాసిన పత్రికలు అన్యుల ఆచారములను గూర్చి అతనికి అవగాహన ఉన్నదని కనుపరుస్తాయి. 1 కొరింథీయులకు 9:21లో అతడు ఒక విశేషమైన ప్రకటన చేశాడు,

... అయినను ధర్మశాస్త్రము లేనివారిని సంపాదించుకొనుటకు ధర్మశాస్త్రము లేనివారికి ధర్మశాస్త్రము లేనివానివలెఉంటిని (1 కొరింథీయులకు 9:21).

పౌలుకు అన్యజనుల సంస్కృతి బాగుగా తెలుసు గనుక క్రీస్తు ధర్మశాస్త్రమును పాటించుచునే తన ప్రవర్తనను అన్యజనుల ఆచారములకు అనుగుణంగా మార్చుకోగలిగాడు.

చివరిగా, తనకు అధునాతన గ్రీకో-రోమన్ సాహిత్య పరిజ్ఞానం కూడా ఉన్నదని పౌలు కనుపరచుకున్నాడు. అపొస్తలుల కార్యములు 17:28 మరియు తీతుకు 1:12 వంటి వాక్యభాగములలో పౌలు అన్యజనుల తత్వవేత్తలను ఉల్లేఖించాడు మరియు సూచించాడు. గ్రీకో- రోమన్ ప్రపంచము యొక్క తత్వశాస్త్రములలో మరియు మతములలో అతడు ప్రావీణ్యత కలిగియున్నాడు.

ఇప్పుడు, మనలను మనం ఈ విధంగా ప్రశ్నించుకోవాలి: అన్యజనుల సంస్కృతి మీద పౌలుకు ఉన్న అవగాహన అతని మీద ఎటువంటి ప్రభావం చూపింది? పౌలు అన్యజనుల సంస్కృతిని నేర్చుకొనుట అతని క్రైస్తవ దృక్కోణములను ఎలా ప్రభావితం చేసింది? కొందరు చెప్పినట్లుగా, అన్యజనుల సంస్కృతి మీద పౌలుకు ఉన్న అవగాహన, అన్యజనులకు ఆమోదయోగ్యంగా చేయునట్లు క్రైస్తవ్యమును మార్చునట్లు పౌలును నడిపించలేదు. అతడు తన ప్రాథమిక ధోరణిలో స్పష్టంగా యూదునిగానే ఉన్నాడు. అయినను, అన్యజనుల ప్రపంచముతో పౌలుకు ఉన్న పరిచయం అతనిని కనీసం రెండు మార్గములలో ప్రభావితం చేసింది.

ఒకవైపు, అన్యుల సంస్కృతితో పౌలు కలిగియుండిన సంబంధము సంఘము వెలుపల ఉన్న అన్యజనులకు పరిచర్య చేయుటకు అతనిని సిద్ధపరచింది. అనేకమంది ఇతరుల కంటే ఉత్తమమైన రీతిలో, అన్యజనుల యొక్క విలువలు మరియు నమ్మకములను గూర్చి పౌలుకు తెలుసు, మరియు సువార్తను ప్రభావవంతమైన మార్గాలలో వారికి అందించుటకు అతడు ఈ జ్ఞానమును ఉపయోగించాడు. ఉదాహరణకు, అపొస్తలుల కార్యములు 14లో లుస్త్రా పట్టణములో పౌలు చేసిన ప్రసంగము, అపొస్తలుల కార్యములు 17లో ఏథెన్సులో పౌలు చేసిన ప్రసంగము, అన్యులు అర్థము చేసుకొనుటకు సిద్ధపడియున్న మార్గములలో క్రీస్తు సువార్తను అందించునట్లు తనను తాను పౌలు అనువర్తించుకొనిన విధానమును ఉదాహరిస్తాయి. రోమా. 11:13లో పౌలు తనను తాను “అన్యజనులకు అపొస్తలుడు” అని పిలచుకొనుచున్నాడు, ఎందుకంటే క్రీస్తును గూర్చిన శుభవార్తను అన్యుల మధ్యకు తీసుకొని వెళ్లుటకు దేవుడు అతనిని పిలిచాడు మరియు సిద్ధపరచాడు. అంతేకాక, సంఘములోని అన్యజనులకు పరిచర్య చేయడానికి మరియు వారి కొరకు పోరాడుటకు కూడా పౌలు సిద్ధపడ్డాడు.

అన్యజనులను క్రీస్తు కొరకు సంపాదించాలని పౌలు కలిగియుండిన ఆశ మొదటి శతాబ్దపు సంఘము యొక్క అత్యంత తీవ్రమైన వివాదములో ఒకదానికి కారణమైనది, అదేదనగా, అన్యజనులైన పురుషులకు సున్నతి అవసరమా లేదా అను ప్రశ్న. మొదటి శతాబ్దపు క్రైస్తవ విశ్వాసులలో అధిక శాతం యూదులు కాబట్టి, సంఘము స్వభావికముగానే ఈ ఆచారమును అనుసరించియుండాలి. అపొస్తలుల కార్యములు 15 ప్రకారం, అన్యజనులకు సున్నతి అవసరము లేదు అని యెరూషలేములో ఉన్న పెద్దలను మరియు అపొస్తలులను ఒప్పించుటలో పౌలు ప్రాముఖ్యమైన పాత్ర పోషించాడు. మరియు అతడు గలతీయులకు వ్రాసిన పత్రికలో, సున్నతి పొందకూడదు అను అన్యజనుల హక్కును సమర్థిస్తూ బలముగా వాదించాడు.

అయితే ఈ ఒక్క వివాదం అన్యజనుల పట్ల పౌలు కలిగియున్న మరింత విస్తృతమైన ఆందోళనను తెలియజేస్తుంది. అతని కాలములోని యూదులైన క్రైస్తవులు అన్యులను రెండవ-శ్రేణి విశ్వాసులుగా పరిగణిస్తుండగా, క్రీస్తు యూదులకు మరియు అన్యజనులకు మధ్యనున్న గోడను పడగొట్టాడని పౌలు నొక్కి చెప్పాడు. గలతీయులకు 3:28-29లో పౌలు వ్రాసినట్లు:

ఇందులో యూదుడని గ్రీసుదేశస్థుడని లేదు, దాసుడని స్వతంత్రుడని లేదు, పురుషుడని స్త్రీ అని లేదు; యేసుక్రీస్తునందు మీరందరును ఏకముగా ఉన్నారు. మీరు క్రీస్తు సంబంధులైతే ఆ పక్షమందు అబ్రాహాముయొక్క సంతానమైయుండి వాగ్దాన ప్రకారము వారసులైయున్నారు (గలతీయులకు 3:28-29).

పౌలు వ్రాసిన అనేక పత్రికలలో ఒక ముఖ్యమైన అంశము ఏమనగా, క్రీస్తునందు, దేవుని రాజ్యము ఇశ్రాయేలు నుండి భూదిగంతముల వరకు వ్యాపించుచున్నది. యేసు అన్యజనుల రక్షణకు తలుపులను తెరిచాడు, తద్వారా క్రీస్తులో ఉన్న ఏ అన్యుడైనా పరిపూర్ణమైన యూదునిగా మరియు అబ్రాహాముతో దేవుడు చేసిన వాగ్దానములకు వారసునిగా పరిగణించబడతాడు.

అన్యులు నిజమైన విశ్వాసులుగాను, యేసు క్రీస్తు అనుచరులుగాను మరియు అబ్రాహాముతో చేయబడిన వాగ్దానములకు వారసులుగాను కాగలరుగాని, గలతీయులకు వ్రాసిన పత్రిక మరియు ఇతర చోట్ల అతడు ఉపయోగించు తర్కము ప్రకారం అబ్రాహాము సంతతిగా ఉండుట అంటే అబ్రాహాముతో దేవుడు చేసిన వాగ్దానములను పొందుకొని, వాటిని నమ్మి, విశ్వాసము ద్వారా, దేవుని నిజమైన బిడ్డగా నిశ్చయతను పొందుకొనుట అయ్యున్నది అని పౌలు బోధించాడు. మరియు ఇదంతా ధర్మశాస్త్రము ఇవ్వబడుటకు ముందు, అనగా యేసు క్రీస్తునకు నిజమైన అనుచరునిగా ఉండుటకు సున్నతి పొందవలసియున్నది అను యూదుల అవగాహన ఆరంభమగుటకు ముందే జరిగినది. కాబట్టి, వాస్తవానికి, నమ్ము మరియు విశ్వసించు విశ్వాసమును దేవుని మీద కలిగియుండు ప్రతి నిజమైన విశ్వాసి తాను అబ్రాహాము సంతానము అని చెప్పుకోవచ్చు.

—రెవ. డా. సైమన్ వైబర్ట్

కాబట్టి, పౌలు యొక్క యూదుల మరియు అన్యజనుల నేపథ్యము అతనిని అనేక మార్గములలో ప్రభావితం చేసింది అని మనం చూస్తాము. ఈ ద్వంద్వ నేపథ్యమును మనస్సులో ఉంచుకొని, మన పాఠములోని రెండవ ప్రధానమైన అంశమును చూచుటకు మనము సిద్ధముగా ఉన్నాము: పౌలు వేదాంతశాస్త్రము అతని అపొస్తలత్వ పరిచర్యను ఏ విధంగా ప్రభావితము చేసింది?

నేటి దినములలో, గంభీరమైన వేదాంతవేత్తలు నిశబ్దమైన ఆఫీసులలో కూర్చొని, సంక్షేపమైన, అధ్యయన విషయములకు తమను తాము అంకితం చేసుకొను పండితులు అని మనము ఊహించుకుంటాము. ఇందువలనే క్రైస్తవులు అనుదినము ఎదుర్కొను సమస్యలను గూర్చి వేదాంతవేత్తలు అవగాహన లేనివారైయుంటారు అని అనేకమంది అనుకుంటారు. అయితే పౌలు యొక్క వేదాంత బోధలు నిజ జీవితముతో సంబంధములేనివి కావు. బదులుగా, క్రీస్తు అపొస్తలునిగా అవిశ్వాసులతో, వ్యక్తిగత విశ్వాసులతో, మరియు అనేక స్థలములలోని సంఘములతో పౌలుకున్న అనుభవాలు అతని నమ్మకములను లోతుగా ప్రభావితము చేశాయి. మరియు ఈ కారణం చేత, పౌలు వేదాంతశాస్త్రము యొక్క మూలాంశములను అర్థం చేసుకోవాలంటే, అతని జీవితమును గూర్చిన అవగాహన మనకు ఉండాలి.

పౌలు అపొస్తలత్వ పరిచర్యలోని మూడు కోణాలను మనం ప్రత్యేకంగా పరిశీలిద్దాము: అతని పదవి, అతని పరిచర్య మరియు అతని రచనలు. అపొస్తలత్వ పదవితో మనం ఆరంభిద్దాం.

కనీసం ఇరవై సందర్భములలో, పౌలు ఎల్లప్పుడు “యేసుక్రీస్తు అపొస్తలుడను” అనే అర్హతను ఉపయోగిస్తూ తననుతాను “అపొస్తలుని”గా వర్ణించుకున్నాడు. అపొస్తులత్వమును గూర్చిన ఈ ప్రకటన చాలా ముఖ్యమైనది ఎందుకంటే తన పక్షమున అధికారికముగా మాట్లాడుటకు క్రీస్తు అపొస్తలులను నియమించాడు. ఇప్పుడు, యేసు తన భూలోక పరిచర్య కాలములో నియమించిన అపొస్తలులలో పౌలు ఒకడు కాదు అని మనందరికీ తెలుసు. అయినను, క్రీస్తు యొక్క అధికారికమైన ప్రతినిధిగా పౌలు తననుతాను వర్ణించుకున్నాడు. నిజమైన అపొస్తలులతో సమానముగా తాను కూడా అపొస్తులత్వమును పొందానని పౌలు నొక్కి చెప్పాడు. అయితే ఇది ఎలా సాధ్యం? అపొస్తులత్వము కొరకు నిర్ణయించబడిన అర్హతలను పౌలు కలిగియున్నాడు అనే వాస్తవంలో ఈ ప్రశ్నకు సమాధానం ఉంది.

పెంతెకొస్తు దినమందు అపొస్తలులు ఆత్మాభిషేకం కొరకు వేచిచూస్తున్నప్పుడు, యూదా స్థానములో ఒక నూతన అపొస్తలుడు ఉండాలని పేతురు నిర్థారించాడు. మరియు అధికారికమైన క్రీస్తు అపొస్తలులు మూడు ప్రమాణాలను కలిగియుండాలని పేతురు వివరించాడు. మొదటిగా, అపొస్తలుల కార్యములు 1:21 ప్రకారం, అపొస్తలులు క్రీస్తు యొక్క భూలోక పరిచర్యలో నేరుగా ఆయన నుండి బోధన అందుకొనిన వారిగా ఉండాలి. రెండవదిగా, అపొస్తలుల కార్యములు 1:22లో వారు యేసు పునరుత్థానమునకు ప్రత్యక్ష సాక్షులుగా ఉండాలి అని మనము చదువుతాము. మరియు మూడవదిగా, అపొస్తలుల కార్యములు 1:23-26లో, నూతన అపొస్తలులు తమ పదవి కొరకు ప్రభువు ద్వారా మాత్రమే నియమించబడి ఉండాలి అని మనము కనుగొంటాము.

అయితే పౌలు విషయం ఏమిటి? మొదటిగా అపొస్తులత్వముకు ఉండవలసిన మొదటి అర్హతను నెరవేర్చుటలో అతడు విఫలమయ్యాడు; ఎందుకంటే, యేసు యొక్క భూలోక పరిచర్య కాలములో అతడు ఆయనను వెంబడించలేదు. అయితే దగ్గరగా పరిశీలించినట్లైతే అతడు ఈ అర్హత కలిగియున్నాడు అని అర్థమౌతుంది. గలతీయులకు 1:11-18లో, మారుమనస్సు పొందిన వెంటనే పౌలు అరేబియా అరణ్యములో మూడు సంవత్సరాలు గడిపాడని మనము చూస్తాము. ఇతర అపొస్తలులు యేసుతో గడిపిన అదే కాలవ్యవధిని అక్కడ గడిపినట్లు సూచించుటకు కాలమును అతడు ప్రస్తావించాడు. ఆ సంవత్సరాలలో, యేసు తానే స్వయంగా పౌలుకు సువార్తను బయలుపరచాడు. గలతీయులకు 1:11-12లోని పౌలు మాటలను వినండి:

నేను ప్రకటించిన సువార్త మనుష్యుని యోచనప్రకారమైనది కాదని మీకు తెలియజెప్పుచున్నాను. మనుష్యునివలన దానిని నేను పొందలేదు, నాకెవడును దాని బోధింపనులేదు గాని యేసుక్రీస్తు బయలుపరచుటవలననే అది నాకు లభించినది (గలతీయులకు 1:11-12).

పౌలు రెండవ అర్హతను కూడా నెరవేర్చాడు. అపొస్తలుల కార్యములు 9:3లో, దమస్కు మార్గమందు పౌలు పునరుత్థానుడైన క్రీస్తు యొక్క వెలుగును, అనగా “ఆకాశము నుండి యొక వెలుగు”ను చూశాడని మనం చదువుతాము. పునరుత్థానుడైన రక్షకుని అతడు ఒక విశేషమైన రీతిలో చూశాడు.

మరియు చివరికి, స్వయంగా ప్రభువే అతనిని ఎన్నుకున్నాడు కాబట్టి పౌలు మూడవ అర్హతను కూడా నెరవేర్చాడు. అపొస్తలుల కార్యములు 9:15 ప్రకారం, యేసు తానే స్వయంగా పౌలును ఆ పదవికి నియమించాడు. ఆలకించుడి,

అన్యజనుల యెదుటను రాజుల యెదుటను ఇశ్రాయేలీయుల యెదుటను నా నామము భరించుటకు ఇతడు నేను ఏర్పరచుకొనిన సాధనమై యున్నాడు (అపొస్తలుల కార్యములు 9:15).

పౌలు అపొస్తులత్వము యొక్క మాన్యతను గూర్చి ఎటువంటి సందేహములు మనకు కలుగకుండు నిమిత్తము మూల అపొస్తలులు పౌలు యొక్క పిలుపును మరియు తన అపొస్తులత్వమును ధృవపరచినట్లుగా గలతీయులకు 2:7-8 సూచిస్తుంది. పౌలు ఇలా వ్రాశాడు:

అయితే సున్నతి పొందినవారికి బోధించుటకై సువార్త పేతురుకేలాగు అప్పగింపబడెనో ఆలాగు సున్నతి పొందనివారికి బోధించుటకై నా కప్ప గింపబడెనని వారు చూచినప్పుడు, అనగా సున్నతి పొందినవారికి అపొస్తలుడవుటకు పేతురునకు సామర్థ్యము కలుగజేసిన వాడే అన్యజనులకు అపొస్తలుడనవుటకు నాకును సామర్థ్యము కలుగజేసెనని వారు గ్రహించినప్పుడు... (గలతీయులకు 2:7-8).

ఇక్కడ మనము చూస్తునట్లు, పౌలు యొక్క అపొస్తులత్వము పేతురు అపొస్తులత్వముతో పోల్చదగినదని ఇతర అపొస్తలులు గుర్తించారు. 2 పేతురు 3:15-16లో పేతురు మాటలను వినండి:

పౌలు కూడ తనకు అనుగ్రహింపబడిన జ్ఞానము చొప్పున మీకు వ్రాసియున్నాడు ... అయితే వాటిలో కొన్నిసంగతులు గ్రహించుటకు కష్టమైనవి. వీటిని విద్యావిహీనులును, అస్థిరులైనవారును, తక్కిన లేఖనములను అపార్థముచేసినట్లు, తమ స్వకీయ నాశనమునకు అపార్థము చేయుదురు (2 పేతురు 3:15-16).

పేతురు మాటల ప్రకారం, పౌలు పత్రికలు “ఇతర లేఖనములతో” సమానంగా ఉన్నాయి.

ఆదిమ సంఘములో పౌలు బోధనలను వ్యతిరేకించిన అనేకమంది అబద్ధ బోధకులు ఉన్నారు. కాబట్టి, ఈ అబద్ధ బోధకులను ఎదుర్కొనుటకు, పౌలు చట్టబద్ధమైన అపొస్తలుడని క్రొత్త నిబంధన స్పష్టం చేసింది. అంతేగాక, గ్రహించుటకు కష్టమైన మరియు అంగీకరించుటకు కూడా కష్టమైన దృక్కోణములను పౌలు సంఘముకు అందించాడు. అయినను, క్రీస్తు రాయబారిగా పనిచేసినప్పుడు, పౌలు ఇతర అపొస్తలులు కలిగియున్న అదే అధికారముతో మాట్లాడాడు మరియు లేఖనము యొక్క అధికారముతో వ్రాశాడు. ఎవరు ఏది చెప్పినా, వారి దృక్కోణములను పౌలు బోధనలు అను ప్రమాణం ఆధారంగా నిర్ణయించాల్సి ఉంటుంది. అతని రచనలు వాస్తవానికి క్రీస్తు అధికారమును కలిగి ఉంటాయి. మనము పౌలును అనుసరించకుండా క్రీస్తును అనుసరించలేము. నేడు కూడా నమ్మకమైన క్రైస్తవులు తమ వేదాంతశాస్త్రమును అతనికి ఆనుగుణ్యం చేయాలి.

ఇప్పుడు పౌలు యొక్క అపొస్తులత్వ అధికారము మన మనస్సులో ఉంది కాబట్టి, ఇప్పుడు అతని అపొస్తులత్వ పరిచర్యను చూద్దాము. ఒక అపొస్తలునిగా పౌలు ఏమి చేశాడు? సంఘము యొక్క పరిచర్యలో అతని భూమిక ఏమిటి?

క్రీస్తు యొక్క అధికారిక అపొస్తలునిగా, సంఘములో పౌలు ఒక ప్రత్యేకమైన భూమికను కలిగియుండినాడు. ఎఫెసీ పత్రికలో అతడు వ్రాసినట్లు, యేసు అపొస్తలులు మరియు ప్రవక్తలు దేవుని సంఘము నిర్మించబడిన పునాదులైయున్నారు. ఇశ్రాయేలు సరిహద్దులకు ఆవల అన్య దేశములలోనికి ప్రయాణము చేసి, సువార్తను ప్రకటించి, సంఘములను ఆరంభించి, అతడు వెళ్లిన ప్రతి చోట దేవుని ప్రజలకు బోధించుటకు దేవుడు పౌలును పిలచాడు.

అపొస్తలునిగా అతడు చేసిన నాలుగు యాత్రలను — అనగా మూడు పరిచర్య యాత్రలు మరియు రోమా పట్టణమునకు అతడు చేసిన నాల్గవ యాత్రను — పరిగణించుట ద్వారా క్రీస్తు పౌలును పిలచిన పనిని గూర్చి మంచి అవగాహనను మనము పొందవచ్చు. క్రీస్తు అపొస్తలునిగా పౌలు యొక్క మొదటి పరిచర్య లేక మిషనరీ యాత్రను పరిశీలన చేస్తూ ఆరంభించుదము.

అపొస్తలుల కార్యములు 13, 14లో పౌలు యొక్క మొదటి మిషనరీ యాత్రను గూర్చి మనం చదువుతాము. పౌలును మరియు బర్నబాను ఒక ప్రత్యేకమైన పని కొరకు వేరుచేయమని దేవుడు సిరియాలోని అంతియొకయ సంఘముకు చెప్పినప్పుడు ఇది ఆరంభమౌతుంది. ఇది జరిగిన వెంటనే పరిశుద్ధాత్ముడు కుప్ర ద్వీపములో నుండి ఈ మనుష్యులను నడిపించాడు. అక్కడ పరిచర్యకు అనేకమైన అవకాశములు తరువాత, వారు చిన్న ఆసియలో సువార్త పర్యటన కొరకు వెళ్లారు. పౌలు యొక్క ఆరంభ పద్ధతి ఏమిటంటే ప్రధానంగా యూదుల సమాజమందరిరములలో ప్రకటించుట. అయితే యూదుల నుండి ప్రతిఘటన ఎదుర్కొన్న తరువాత, అతడు అన్యజనులకు కూడా ప్రకటించుట మొదలుపెట్టాడు.

ఈ యాత్రలో పౌలు గలతీ ప్రాంతములో కూడా కొన్ని సంఘాలతో సహా విజయవంతంగా అనేకమైన సంఘాలను స్థాపించాడు. దెర్బే వరకు తూర్పున ప్రయాణము చేసిన తరువాత, పౌలు మరియు బర్నబా వెనుదిరిగారు. వారు గలతీ పట్టణముల నుండి తిరిగివస్తూ, తుదకు సముద్ర మార్గమున ఇంటికి చేరుకున్నారు.

క్రీస్తు అపొస్తలునిగా పౌలు యొక్క మొదటి మిషనరీ యాత్ర చిన్నది మరియు సరళమైనది. కాని అతని రెండవ మిషనరీ యాత్ర పాలస్తీనా దేశము నుండి అతనిని మరింత దూరము తీసుకువెళ్లింది.

పౌలు యొక్క రెండవ మిషనరీ యాత్ర అపొస్తలుల కార్యములు 15:36-18:22లో ఉన్నది. యెరూషలేములోని అపొస్తలులు మరియు సంఘ నాయకులు, అంతియొకయలో ఉన్న సంఘములకు ఒక పత్రికను అందించుటకు పౌలును మరియు బర్నబాను ఎన్నుకున్నప్పుడు ఈ యాత్ర ఆరంభమౌతుంది. అన్యజనులు రక్షణ పొందాలంటే సున్నతి పొందవలసిన అవసరత లేదని లేక మోషే ధర్మశాస్త్రముపై ఆధారపడియున్న యూదుల ఆచారములను పాటించవలసిన అవసరత లేదని ఈ పత్రిక వివరించింది. ఇప్పుడు, అంతియొకయలో ఈ పత్రికను అందించిన తరువాత, పౌలు బర్నబాలు తాము మునుపు సువార్త అందించిన ప్రతి పట్టణములోని విశ్వాసులను మరలా దర్శించాలని నిర్ణయించుకున్నారు. అయితే పౌలుకు మరియు బర్నబాకు వాదము కలుగుట వలన వారు విడిపోయారు మరియు పౌలు సీలను ఏర్పరచుకున్నాడు.

పౌలు సీలలు మొదటిగా సిరియాలో నుండి, తరువాత కిలికియ మీదిగా ప్రయాణించారు గలతీయ ప్రాంతమునకు చేరుకున్నారు. ఈ ప్రాంతములోని లుస్త్రలోనే తిమోతి పౌలు ప్రయాణంలో భాగమైయ్యాడు. పౌలు కొనసాగుతుండగా, అతడు ఉత్తర ఆసియ మరియు బితూనియలో సువార్త ప్రకటించాలని ఆశించాడు, కాని పరిశుద్ధాత్ముడు అతనిని ఆటంకపరచాడు. కాబట్టి పౌలు తీరప్రాంత పట్టణమైన త్రోయకు వెళ్లాడు.

అక్కడ, పరిశుద్ధాత్ముడు అతనిని ఆటంకపరచుటకు కారణము పౌలు యొక్క “మాసిదోనియ దర్శనం” ద్వారా స్పష్టం చేయబడింది. ఈ దర్శనములో ఆధునిక గ్రీసు దేశము యొక్క ఉత్తర ప్రాంతమైన మాసిదోనియలో సువార్త ప్రకటించమని ఒక వ్యక్తి అతనిని వేడుకున్నాడు. కాబట్టి, పౌలు మరియు అతని బృందము వెంటనే ఆ ప్రాంతముకు వెళ్లుట ద్వారా ఈ దర్శనముకు స్పందించారు. పౌలు గ్రీసులో అనేక సంఘములను స్థాపించాడు, వాటిలో ఫిలిప్పీ మరియు ఉత్తరమున థెసలొనీక కూడా ఉన్నాయి. చివరకు అతడు దక్షిణదిక్కున ప్రయాణము చేసి, ఏథెన్సును దర్శించి, కొరింథులో సంఘమును స్థాపించాడు. తరువాత పౌలు ఎఫెసుకు వెళ్లాడు, అక్కడ కొంతకాలము గడిపిన పిమ్మట, అతడు పాలస్తీనాకు తిరిగివెళ్లాడు.

పౌలు యొక్క రెండవ మిషనరీ యాత్ర తరువాత వెంటనే అతడు మూడవ యాత్రలో మరల పశ్చిమ దిక్కున చాలా దూరం ప్రయాణించాడు.

పౌలు యొక్క మూడవ మిషనరీ యాత్ర అపొస్తలుల కార్యములు 18:23-21:17లో కనిపిస్తుంది. ఈ ప్రయాణములలో పౌలు సిరియ అంతియొకయ నుండి గలతీయ మరియ ఫ్రుగియ మీదుగా వెళ్లి, తరువాత ఎఫెసులో గొప్ప పరిచర్యను స్థాపించాడు. ఇది జరిగిన తరువాత అతడు గ్రీసు ప్రాంతములో ఉత్తర దిక్కు నుండి దక్షిణ దిక్కుకు, తిరిగి ఉత్తర దిక్కుకు ప్రయాణిస్తూ చాలా నెలలు గడిపాడు. మునుపటి యాత్రలో అతడు నాటిన సంఘములను దర్శించాడు. తరువాత అపొస్తలుడు భూమి మరియు సముద్రము మీదిగా యెరూషలేము వైపు తిరిగి ప్రయాణం చేశాడు.

మూడవ మిషనరీ యాత్ర తరువాత పౌలు యెరూషలేముకు తిరిగి వచ్చినప్పుడు రాజద్రోహము చేశాడని యూదులు అతని మీద నేరము మోపారు మరియు రోమీయులు అతనిని పట్టుకున్నారు. చెరసాలలో రెండు సంవత్సరములు గడిపిన తరువాత, తన కేసును కైసరు యెదుట విచారించాలని పౌలు ఒక రోమా పౌరునిగా తన హక్కులను ఉపయోగించుకున్నాడు. కైసరుకు విన్నపించుకోవాలను ఈ విజ్ఞాపన నాల్గవ ప్రయాణమునకు దారితీసింది, అది అతనిని రోమాకు తీసుకువెళ్లింది.

ఈ యాత్రను గూర్చిన నివేదిక అపొస్తలుల కార్యములు 27-28లో కనిపిస్తుంది. పౌలు ఈ యాత్రలో ఎక్కువ శాతం ఓడలో ప్రయాణించాడు. క్రేతు మరియు మెలితే ద్వీపముకు మధ్య, ఒక భయంకరమైన తుఫాను పౌలు మరియు ఇతర ఖైదీలు ఉన్నటువంటి ఒక ఓడను ధ్వంసం చేసింది. సిబ్బంది, కాపలాదారులు, పౌలు మరియు అతని సహచరులు రోమాకు చేరుకొనుటకు ముందు మూడు నెలలు మెలితే ద్వీపంలో ఓడ బ్రద్దలగుట వలన చిక్కుబడియున్నారు. క్రీ.శ. 60-62 వరకు పౌలు రోమాలో గృహ నిర్బంధంలో ఉన్నాడు. ఈ సమయములో అతడు నిరాటంకంగా పరిచర్య చేయగలిగాడు.

పౌలును నీరో నిర్దోషిగా ప్రకటించాడు, ఆ తరువాత సువార్త ప్రకటించుటకు అతడు స్పెయిన్ వైపు వెళ్లాడని పరంపర చెబుతుంది. అతడు సంఘములను స్థాపించుటకు మరియు వాటిని ప్రోత్సహించుటకు తూర్పుదిక్కున ప్రయాణించాడని తిమోతి మరియు తీతుకు వ్రాసిన పత్రికలలో కొన్ని ఆధారాలు ఉన్నాయి. కాని బహుశా క్రీ.శ. 65, లేక కొంతకాలము తరువాత, నీరో పౌలును మరోసారి అరెస్టు చేసి తుదకు అపొస్తలుని ఉరితీశాడు.

యెరూషలేము మరియు రోమా మధ్య ఉన్న ప్రాంతమును ఒకసారి పరిశీలిస్తే పౌలు అనేక స్థలములను దర్శించాడు అని బయలుపడుతుంది. పౌలు ఇరవై-ఐదుకంటే ఎక్కువ పట్టణములలో వేలాదిమంది వ్యక్తులను పరిచయం చేసుకున్నాడు. అతడు ఇటువంటి విస్తృతమైన ప్రయాణములను చేశాడను వాస్తవము నుండి మనం ఏమి నేర్చుకోవాలి? పౌలు వేదాంతశాస్త్రము యొక్క మూలాంశము గూర్చి అవి మనకు ఏమి చెబుతాయి?

వాస్తవానికి, అన్నిటి కంటే ఎక్కువగా పౌలు ఒక మిషనరీ అయ్యున్నాడు. పౌలు ప్రయాణించుచు సంఘములను స్థాపించుచుండగా, ఆ సంఘములలో ఉన్న సమస్యలను పరిష్కరిస్తూ, వారు దేనిని నమ్ముటకు పిలువబడిరో, ఏమి చేయుటకు పిలువబడిరో అను విషయములను గూర్చి వారికి మరియెక్కువ అవగాహనను ఇచ్చుటకు వారితో తరచుగా సంభాషించుట వలన నేడు అతని పత్రికలు మనకు అందుబాటులో ఉన్నాయి. అయితే పౌలు యొక్క ప్రధానమైన కార్యము పత్రికలను వ్రాయుట కాదుగాని, సంఘములను స్థాపించుట, సంఘములను ఆరంభించుట అయ్యున్నది. పౌలు వేదాంతశాస్త్రము మిషనరీ వేదాంతశాస్త్రము అయ్యున్నది, అనగా నేడు మన విషయములో మన వేదాంతశాస్త్రము దేవుడు మనలను పిలచుచున్న పరిచర్యలో నాటబడిలేని యెడల, వాస్తవానికి అది నిజమైన వేదాంతశాస్త్రము కాదు.

డా. డొనాల్డ్ విట్నె

పౌలు యొక్క పదవి మరియు పరిచర్యను మనస్సులో ఉంచుకొని పౌలు యొక్క అపొస్తలత్వ పరిచర్యలోని మూడవ అంశమును పరిశీలన చేసే స్థితిలో మనం ఉన్నాము: అతని అపొస్తులత్వ రచనలు లేక క్రొత్త నిబంధన పత్రికలు.

క్రొత్త నిబంధనలో పౌలు వ్రాసిన ఒకటి కంటే ఎక్కువ పత్రికలు ఎందుకు ఉన్నాయి అని మీరు ఎప్పుడైనా అనుకున్నారా? అతడు ఒకే పత్రికను వ్రాసి దానిని ఒక సంఘము నుండి మరొక సంఘమునకు ఎందుకు పంపియుండకూడదు? దీనికి సమాధానం స్పష్టంగా ఉంది. పౌలు స్థిరమైన త్యాగపూరిత పరిచర్య యొక్క కందకాలలో నివసించాడు కాబట్టి, అతడు సందర్శించిన సంఘములను ఇబ్బంది పెట్టే ప్రతి సమస్య అతనికి బాగా తెలుసు.

ఇప్పుడు మొదటి శతాబ్దములో ఉన్న క్రైస్తవులందరు ఎదుర్కొనిన కొన్ని సామాన్య సమస్యలు కూడా ఉన్నాయని మీరు ఊహించవచ్చు. గలతీయలోని సమస్యలు ఎఫెసులోని సమస్యలకు భిన్నంగా ఉన్నాయి. మరియు ఎఫెసులోని సమస్యలు కొరింథులోని సమస్యలకు భిన్నముగా ఉన్నాయి. ప్రతి సంఘము వాటి వాటి సమస్యలను ఎదుర్కొన్నది. ఫలితంగా, ఈ పరిస్థితులలో ఉన్న విశ్వాసుల యొక్క పలు అవసరతలను గూర్చి మాట్లాడుటకు విభిన్నమైన ఉద్ఘాటనలతో పౌలు పలు పత్రికలను వ్రాశాడు.

అతని పరిచర్యలోని వివిధ కాలములలో పౌలు వ్రాసిన పదమూడు పత్రికలు క్రొత్త నిబంధన గ్రంథములో ఉన్నాయి. ఇప్పుడు, పౌలు పత్రికలు సందర్భానుసారమైనవి గనుక — అనగా నిర్దిష్ట సమస్యలను ఉద్దేశించి వ్రాయబడినవి గనుక — ఏ పత్రిక కూడా అతని వేదాంతశాస్త్రము యొక్క మూలాంశమును క్రమముగా లేదా క్రమబద్ధమైన పద్ధతిలో చెప్పలేదు. బదులుగా, అతని పత్రికలలో అతని వేదాంతశాస్త్రము యొక్క కాపరి అనువర్తనములు ఉన్నాయి. ఎక్కువ సందర్భములలో, సంఘములోని విశేషమైన సమస్యలను గూర్చి పౌలు మాట్లాడాడని స్పష్టమవుతుంది, కాని పౌలు వేదాంతశాస్త్రము యొక్క మూలాంశము అంతటిని ఒకే పత్రికలో నుండి వెలికితీయుటకు అనేకమంది క్రైస్తవులు ప్రయత్నిస్తారు.

మొదటిగా, రోమా పత్రికను చూద్దాము. అనేక సార్లు, ఈ పుస్తకము పౌలు వేదాంతశాస్త్రము యొక్క క్రమబద్ధమైన, సంక్షేపమైన వివరణగా వ్రాయబడియున్నట్లు అనేకమంది ఇవాంజెలికల్ ప్రొటెస్టెంట్లు అపార్థము చేసుకుంటారు. మరియు రోమా పత్రికలో మనము చూచు విషయములను ఉపయోగిస్తూ, మన వ్యక్తిగత ఇవాంజెలికల్ వేదాంతశాస్త్రము యొక్క ఉద్ఘాటనను సమర్థించాము. ఖచ్చితముగా, ఇ వేదాంతశాస్త్రములోని కేంద్ర విషయములను గూర్చి, ముఖ్యముగా పాపము మరియు రక్షణ వంటి అంశములను గూర్చి, రోమా పత్రిక మాట్లాడుతుంది. అయితే రోమా పత్రికను క్షుణ్ణంగా పరిశీలన చేసినయెడల పౌలు ఈ పత్రికను కూడా నిర్దిష్టమైన సమస్యలను గూర్చి మాట్లాడుటకు వ్రాశాడని అర్థమౌతుంది. ప్రాధమికముగా, మొదటి శతాబ్దపు రోమా సంఘములో యూదా మరియు అన్య క్రైస్తవుల మధ్య తలెత్తిన సమస్యలను పరిష్కరించుటకు పౌలు రోమా పత్రికను వ్రాశాడు.

రోమా పత్రిక నిర్మాణము యొక్క అవలోకనము అతని కాపరి దృష్టిని మరింత స్పష్టం చేస్తుంది. మొదటి మూడు అధ్యాయములలో, మనము ఇ ప్రజల మధ్య తరచుగా వినునట్లు పౌలు కేవలం పాపము మీద మాత్రమే దృష్టిపెట్టలేదు. బదులుగా, యూదులు మరియు అన్యులు ఇద్దరూ కూడా పాపులే అని, ఒకరిపై మరొకరు ఆధిపత్యము పొందే హక్కు ఎవరికీ లేదని నిరూపించడము మీద పౌలు దృష్టి పెట్టాడు.

4-8 అధ్యాయములలో, ఇవాంజెలికల్ క్రైస్తవులు చాలాసార్లు బోధించునట్లు పౌలు కేవలం రక్షణ మార్గమును గూర్చి మాత్రమే మాట్లాడలేదు. బదులుగా, యూదులకు మరియు అన్యులకు దేవుడు ఒకే విధమైన రక్షణ మార్గమును ఏ విధంగా అనుగ్రహించాడో అతడు ఉద్ఘాటించాడు. క్రీస్తునందు విశ్వాసము మరియు ఆత్మ ద్వారా పవిత్రపరచబడుట యూదులను మరియు అన్యులను సమానులుగా నిలబెడుతుంది. దీని వెలుగులో, రోమా 9-11 మానవ చరిత్ర కొరకు దేవుడు కలిగియున్న ప్రణాళికలో యూదులు మరియు అన్యుల యొక్క పరిపూరకరమైన పాత్రలను పౌలు ఉద్ఘాటించుట ఆశ్చర్యం కలిగించదు. మరియు రోమా. 12-16లో, యూదులు మరియు అన్యుల మధ్య వివాదములకు సంబంధించిన కొన్ని అభ్యాసిక సమస్యలను గూర్చి పౌలు మాట్లాడాడు అను విషయము కూడా ఆశ్చర్యము కలిగించదు. ఉదాహరణకు, 12వ అధ్యాయములో, క్రైస్తవుల మధ్య జాతి భిన్నత్వములు ఉన్నప్పటికీ ఏక శరీరము వలె పనిచేయాలని అతడు నొక్కి చెప్పాడు. 13వ అధ్యాయములో, యూదా మరియు అన్య క్రైస్తవులు దేవుడు నియమించిన అన్యజనుల పౌర ప్రభుత్వాలకు లోబడాలని కోరాడు. మరియు 14-16 అధ్యాయములలో, ఈ పత్రిక ముగించుటకు ముందు, యూదులు మరియు అన్యజనుల ఆచారములకు సంబంధించి యూదులు మరియు అన్యజనులు పరస్పర అవగాహన కలిగియుండాలని అతడు చెప్పాడు.

రోమీయులు తన నమ్మకములను సిద్ధాంతపరమైన ఒక తలంపుగా మాత్రమే భావించకూడదని పౌలు ఉద్దేశించినట్లు పౌలు రోమాకు వ్రాసిన ఈ పత్రిక యొక్క క్లుప్త అవలోకనము వెల్లడిచేస్తుంది. బదులుగా, ఈ పత్రిక ప్రధానంగా రోమా పట్టణములోని క్రైస్తవ సంఘములో ఉన్న యూదులు మరియు అన్యజనులకు మధ్య ఉన్న సంబంధమునకు పౌలు వేదాంతశాస్త్రమును అనువర్తిస్తుంది. రోమా పత్రిక కొన్ని విశేషమైన అవసరతలకు పౌలు వేదాంతశాస్త్రమును అనువర్తించుట అయ్యున్నది.

క్రీ.శ. 57 యొక్క మొదటి మాసములలో, దక్షిణ గ్రీకు ప్రాంతములో ఉన్న కొరింథు పట్టణములో పౌలు మూడు నెలలు గడిపాడు అని అపొస్తలుల కార్యములు 20లో మనము చదువుతాము. మరియు ఇది అతనికి ఒక సుదీర్ఘమైన అధ్యయన సెలవు వలెను, అతని ప్రయాణములలో ఒక చిన్న విరామము తీసుకొనుటకు అవకాశము వలెను ఉన్నది, మరియు ఆ సమయములోనే అతడు రోమా సంఘమునకు పత్రిక వ్రాశాడు అని ఇంచుమించు నిశ్చయతతో చెప్పవచ్చు. అతడు దానిని ఎందుకు వ్రాశాడు? సరే, ఒక కారణం ఏమిటంటే, అతడు రోమాలో ఉన్న సంఘమునకు వెళ్లగోరాడుగాని, ప్రస్తుతము అతడు మరొక దిక్కున యెరూషలేమునకు వెళ్లవలసి, యెరూషలేమునకు తాను పోగుచేసిన కానుకలను తీసుకొని వెళ్లవలసియుండినది... రోమీయులకు ఈ పత్రికను వ్రాయునట్లు ఇతర విషయములు కూడా పౌలును ప్రేరేపించియుండవచ్చు. క్రీ.శ. 49లో రోమా పట్టణము నుండి బహిష్కరించబడి, తరువాత క్రీ.శ. 54లో తిరిగివచ్చిన యూదులను గూర్చి అతడు వినియుంటాడు — ఇది అతడు పత్రికను వ్రాయుటకు మూడు సంవత్సరముల క్రితం జరిగిన సన్నివేశం — వారు ఈ పట్టణములోనికి తిరిగివచ్చుచున్నారు అని అతడు వినియుంటాడు, మరియు యూదా క్రైస్తవులు మరియు అన్య క్రైస్తవుల మధ్య కొంత ఉద్రిక్తత ఉన్నట్లు అనిపిస్తుంది. ఎవరు అధికారము కలిగియున్నారు? ఎవరిది పైచేయి? వారు ఒకరినొకరు గౌరవించాలా? వారు సమాజముగా కూడుకొనుచున్నారా — ఇలాంటి ప్రశ్నలు. కాబట్టి, అక్కడ అతడు వ్రాసిన కొన్ని విషయములు ఈ ఉద్దేశ్యము ద్వారా పురికొల్పబడినవి, అనగా క్రీస్తునందు యూదులు మరియు అన్యుల మధ్య ఉన్న ఐక్యతను చూపుట, బలహీనులు మరియు బలవంతులు ఒకరిని గూర్చి ఒకరు పట్టించుకోవాలని చూపుట, ఇంకా, “ఓహ్, మేము ఇప్పుడు ఎక్కువ ప్రాముఖ్యతను కలిగియున్నాము, యూదా క్రైస్తవులు ఎవరికి కావాలి? మా సమస్యలను మేమే పరిష్కరించుకోగలము” అని అన్యజనులు ఆలోచించుట మానుకోవాలని తెలుపుటకు అతడు వ్రాసియుండవచ్చు. కాబట్టి, అతని రచనలో ఇట్టి విషయములు కూడా ఉన్నాయి. అతడు పత్రిక వ్రాయుట వెనుక పూర్తి ఉద్దేశ్యము ఇది అని నేననుకొనుట లేదు, కాని అతడు నిశ్చయముగా ఈ విషయమును గూర్చి కూడా మాట్లాడాలని ఆశించాడు.

డా. పీటర్ వాల్కర్

ఇప్పుడు, పౌలు బాగుగా-ఏర్పడిన, తార్కికమైన వేదాంత నమ్మకముల సమూహమును లేదా మనం క్రమబద్ధమైన వేదాంతశాస్త్రము అని పిలుచుదానిని కలిగియున్నాడని మనం నమ్మడం సరైనదే. కాని పౌలు వేదాంతశాస్త్ర విధానము అతని పత్రికలో కనబడునప్పటికీ అది వ్రాతపూర్వకముగా ఇవ్వబడలేదు. మనకు తెలిసినంతవరకు, పౌలు వేదాంతశాస్త్రము యొక్క క్రమబద్ధత పూర్తిగా వ్రాతపుర్వక రూపమును పొందలేదు. అయినప్పటికీ, అతడు వ్రాసిన పత్రికల ఆధారముగా, మనము దానిని చాలా వరకు పునర్నిర్మించగలము.

పౌలు వేదాంతశాస్త్ర వ్యవస్థను పునర్నిర్మించడానికి, అతడు తన పత్రికలలో ఎక్కువగా ఉద్ఘాటించిన అంశాలను మాత్రమే మనము చూడనవసరం లేదు. మనము ఇంతకు ముందే చర్చించినట్లు, తన పత్రికలలో ఉన్న వేదాంతశాస్త్రమును తన దినమున ఉన్న సంఘముల యొక్క అవసరతలను తీర్చునట్లు అనువర్తించుటకు పౌలు ఎక్కువ సమయమును గడిపాడు. కాబట్టి, మనం ఈవిధంగా అడగాలి: పౌలు వ్రాసిన విశేషమైన విషయాలకు ఏ విధమైన వేదాంతశాస్త్ర దృక్కోణాలు మద్దతిచ్చాయి? అతని పత్రికలలో మనము చూచు విషయములను ఎట్టి పొందికైన నమ్మకముల పద్ధతులు ఉత్తమమైన రీతిలో వివరిస్తాయి? పౌలు విభిన్నమైన సంఘములకు వ్రాసిన విశేషమైన విషయములన్నిటిని ఏ తార్కిక సిద్ధాంతపరమైన వ్యవస్థ అనుసంధానపరుస్తుంది? ఇటువంటి ప్రశ్నలకు సమాధానమిచ్చుట ద్వారా, పౌలు వేదాంతశాస్త్రమును మనం పునర్నిర్మించగలుగుతాము.

పౌలు యొక్క నేపథ్యము మరియు పరిచర్యను ఇప్పటి వరకు మనము చూశాము కాబట్టి, ఇప్పుడు పౌలు యొక్క కేంద్ర వేదాంతశాస్త్ర దృక్పథములను చూచుటకు సిద్ధంగా ఉన్నాము.

ఏదో ఒక విధముగా, క్రీస్తు అనుచరులందరు తమ క్రైస్తవ నమ్మకములను క్రమపరచుకుంటారు. ఇలా మనము ఎలా చేస్తామో ఏనాడు నిర్దేశించనప్పటికీ, దేవుని గూర్చి, మనలను గూర్చి మనము, మరియు మన చుట్టూ ఉన్న లోకమును గూర్చి మనము ఆలోచనచేయు విషయములను రూపుదిద్దు కొన్ని మౌలిక నమ్మకములను మనము కలిగియుంటాము. మరియు ఈ మౌలిక నమ్మకములు మనము నమ్ము ప్రతి విషయమును ప్రభావితము చేస్తాయి. మన అనుదిన జీవితములలో అవి మనలను నడిపిస్తాయి. అపొస్తలుడైన పౌలు విషయములో కూడా ఇదే వాస్తవమై ఉంది. అతని మౌలిక నమ్మకములు ఏవి? ఏ విధమైన వేదాంతశాస్త్ర దృక్పథాలు అతడు తన పత్రికలలో వ్రాసిన విషయములను నిర్దేశించాయి?

శతాబ్దములుగా, పౌలు వేదాంతశాస్త్రము యొక్క కేంద్ర దృక్పథములను పండితులు అనేక విధములుగా వర్ణించారు. అయితే పౌలు వేదాంతశాస్త్రము యొక్క మూలాంశమును గూర్చిన రెండు బహు ప్రఖ్యాతిగాంచిన అవగాహనలకు మాత్రమే మనము పరిమితమవుదాము. మొదటిది, పౌలు వేదాంతశాస్త్రముపై సంస్కరణ దృష్టికోణము; మరియు రెండవది, “యుగాంతశాస్త్ర దృష్టికోణము.” పౌలును గూర్చిన సంస్కరణ దృష్టికోణమును మొదటిగా చూద్దాము. పౌలు వేదాంతశాస్త్రములోని కేంద్ర విషయములను ప్రొటెస్టెంట్ సంస్కర్తలు ఎలా అర్థం చేసుకున్నారు?

సంస్కరణకు ముందు శతాబ్దములలో, రక్షణ పొందుటకు దేవుని కృప మరియు మానవ యోగ్యత రెండూ అవసరమని రోమన్ కాథలిక్ సంఘము బోధించింది. ఈ బోధన ప్రకారంగా, నీతిమంతునిగా తీర్చబడుట — లేక దేవుని దృష్టిలో నీతిమంతులగుట — సుదీర్ఘమైన ప్రక్రియ, మరియు దీని ద్వారా దేవుడు కృపను విశ్వాసికి అనుగ్రహిస్తాడు. తరువాత, ఈ కృప సత్క్రియల ద్వారా విశ్వాసి మరింత నీతిమంతునిగా అగుటకు అవకాశం ఇస్తుంది. ఈ అభిప్రాయం ప్రకారం, నిజముగా నీతిమంతులుగా తీర్చబడుటఉ కావలసినన్ని సత్క్రియలను చేయుట ద్వారా ప్రజలు దేవుని ఎదుట పూర్తిగా నీతిమంతులుగా తీర్చబడతారు.

అయితే మార్టిన్ లూథర్, అల్రిచ్ జ్విన్గ్లి, మరియు జాన్ కెల్విన్ వంటి ప్రముఖ సంస్కర్తలు పౌలు పత్రికలను చదివినప్పుడు, పౌలును గూర్చి న్యాయపరమైన కాథలిక వివరణ తప్పు అని వారు చెప్పారు. నీతిమంతునిగా తీర్చబడుట అనునది మానవ కృషితో సుదీర్ఘకాలము పాటు ఆపాదించబడదు అను అగస్టిన్ బోధనను వారు అనుసరించారు. బదులుగా, అది ఒకే సారి మానవ క్రియలతో నిమిత్తం లేకుండా ఆపాదించబడుతుంది.

నీతిమంతులుగా తీర్చబడుట తరువాత పరిత్రపరచబడుట జరుగుతుంది అని — ఇది క్రైస్తవ జీవితము యొక్క సుదీర్ఘ ప్రక్రియ — ఇది విశ్వాసి యొక్క జీవితకాలమంతా కొనసాగుతుంది అని ప్రొటెస్టెంట్లు నమ్మారు. కాగా నీతిమంతులుగా తీర్చబడుట అనేది ఒక విశ్వాసి పాప దోషము నుండి విడిపింపబడియున్నాడనియు మరియు క్రీస్తు యొక్క నీతిని పొండుకున్నాడనియు చెప్పుటకు దేవుడు అన్నికాలములకు ఒకేసారి ఇచ్చే న్యాయసంబంధమైన ప్రకటన అయ్యున్నది. ఈ నమ్మకము సోలా ఫిడేగా పిలువబడుతు వచ్చింది – అనగా విశ్వాసము మాత్రమే – ఎందుకనగా క్రీస్తునందు విశ్వాసము ద్వారానే తప్ప మన సత్క్రియలతో కూడిన విశ్వాసము ద్వారా మనము నీతిమంతులముగా తీర్చబడము.

నిస్సందేహంగా, పౌలు యొక్క రచనలలో ఈ సిద్ధాంతమును సంస్కర్తలు సరిగానే కనుగొన్నారు. ఆదిమ సంఘములో యూదామతవాదులుగా పిలువబడే యూదా విశ్వాసులలో ఒక వర్గము వారు రక్షణ అనేది దైవిక కృప మరియు మానవ క్రియల మిశ్రమ ఫలితము అని వాదించేవారు. అయితే, ఆదిమ సంఘములో పౌలు ఈ న్యాయవాదమును వ్యతిరేకించి నీతిమంతులుగా తీర్చబడుట అనేది ఒక ప్రత్యేకమైన సంఘటన అనియు అది ధర్మశాస్త్ర సంబంధమైన క్రియలతో పనిలేకుండా జరుగుతుందనియు వక్కాణించాడు.

సంస్కరణలోని వివాదములకు మరియు పౌలు ఎదుర్కొన్న వివాదములకు మధ్యగల పోలికలు చాలా స్పష్టముగా ఉన్నాయి. రోమన్ కాథలిక్ సంఘము యూదామతవాదుల యొక్క న్యాయవాదమును పోలినదిగా ఉన్నది. మరియు సంస్కరణ కాలమునకు చెందిన సోలా ఫిడే — అనగా విశ్వాసము ద్వారా మాత్రమే నీతిమంతునిగా తీర్చబడుట — క్రీస్తునందు రక్షింపబడు విశ్వాసము ఉన్న పురుషుడు, స్త్రీ, మరియు చిన్న బిడ్డను దేవుడు నీతిమంతునిగా ప్రకటిస్తాడు అను పౌలు బోధను పోలియున్నది.

ఈ పోలికలకు ఫలితంగా, వ్యక్తిగత విశ్వాసులకు రక్షణ ఎలా కలుగుతుంది అనునది పౌలు వేదాంతశాస్త్రమునకు కేంద్రమైయున్నది అని సాంప్రదాయిక, ఇవాంజెలికల్ ప్రొటెస్టెంట్లు అనేక శతాబ్దముల పాటు నమ్మారు. వేదాంతశాస్త్ర పదములలో, పౌలు యొక్క వేదాంతశాస్త్రము అంతా ఓర్డో సాలుటిస్, లేక “రక్షణ క్రమము” — అనగా క్రీస్తునందు రక్షణ నీకును నాకును అన్వయింపబడే ప్రక్రియ — చుట్టూ నిర్మితమైయున్నట్లుగా భావింపబడింది. కాబట్టి, సంస్కరణ సంప్రదాయంలో, ఓర్డో సాలుటిస్, మరియు ముఖ్యముగా విశ్వాసము ద్వారానే నీతిమంతులుగా తీర్చబడుట అనేది పౌలు యొక్క వేదాంతశాస్త్రములో అత్యంత కేంద్రమైన, సమగ్రమైన భావనగా ఉన్నట్లుగా అనేకమంది ప్రొటెస్టెంట్లు నమ్ముతున్నారు. ఇదే అతని వేదాంతశాస్త్రము యొక్క మూలాంశము అని వారు నమ్ముతున్నారు.

అవును, పౌలు అనేక ఇతర విషయములను కూడా నమ్మాడని ప్రొటెస్టెంట్లు గుర్తిస్తారు. ఉదాహరణకు, బైబిలు చరిత్ర క్రీస్తు యొక్క మరణ పునరుత్థానములలో ముగింపునకు వచ్చిన విధానముపై అతడు విశేషమైన ఆసక్తిని చూపాడు. వేదాంతశాస్త్ర పదములలో, తన బోధలోని ఈ కోణమును హిస్టోరియా సాలుటిస్, లేక “రక్షణ చరిత్ర” అంటారు. కానీ చాలా వరకు, ఇటీవలి సంవత్సరముల వరకు కూడా రక్షణ క్రమము కంటే రక్షణ చరిత్ర అనేది తక్కువ ప్రాముఖ్యత గలిగినది అనేది పౌలు వేదాంతశాస్త్రము అయ్యున్నది అని సాంప్రదాయక ప్రొటెస్టెంట్లు అర్థము చేసుకున్నారు.

పౌలు యొక్క కేంద్ర వేదాంతశాస్త్ర దృక్పథములను వ్యాఖ్యానించటలో సంస్కరణ అభిప్రాయము ప్రఖ్యాతిని పొందినప్పటికీ, అది కూడా సవాళ్లను ఎదుర్కొన్నది. ఇటీవల దశాబ్దాలలో మరొక పరిపూరకరమైన ఆలోచన విధానము వెలుగులోకి వచ్చింది, దానిని మనము పౌలు వేదాంతశాస్త్రములోని యుగాంతశాస్త్ర దృష్టికోణము అని పిలుస్తాము.

పౌలు వేదాంతశాస్త్రముపై యుగాంతశాస్త్ర దృష్టికోణము, బైబిలు చరిత్ర క్రీస్తునందు నెరవేర్పునకు ఎలా చేరుకున్నది అను విషయము పౌలు వేదాంతశాస్త్రములో అత్యంత కేంద్రితమైన లక్షణము అని ఉద్ఘాటిస్తుంది. కాగా, పౌలు వేదాంతశాస్త్రము మీద అనేక ఇతర దృక్పథములు కూడా ఇటీవల దశాబ్దాలలో సూచింపబడినవనేది వాస్తవము. తన యూదామత సంబంధమైన నేపధ్యమును గ్రీకు తత్వశాస్త్రములతో మిళితముచేయడమనే విషయము మీదనే పౌలు యొక్క వేదాంతశాస్త్రము ప్రధానంగా దృష్టినిలిపిందని కొంతమంది ప్రసిద్ధిగాంచిన వేదాంతపండితులు వాదించారు. ఇతరులైతే పౌలు శరీరము యొక్క ఇచ్చలకు పైగా హేతుబద్ధమైన నైతిక జీవితమునే పౌలు ప్రధానంగా ప్రతిపాదిస్తున్నట్లుగా చూచారు. ఇంకా కొందరు పౌలు యొక్క వేదాంతశాస్త్రము హెలెనిస్టిక్ మర్మ ధర్మముల ద్వారా లోతుగా ప్రభావితం చేయబడినదని వాదించారు. ఈ ఆలోచనలలో కొన్ని పౌలు వేదాంతశాస్త్రమును గూర్చి కొన్ని దృక్కోణములను అందిస్తాయి, కానీ వాటిలో ఏవీ కూడా అతని వేదాంతశాస్త్రముపై యుగాంతశాస్త్ర దృష్టికోణమంత సహాయకరంగా ఉన్నట్లుగా ఋజువుపరచబడలేదు.

పౌలు వేదాంతశాస్త్రముపై యుగాంతశాస్త్ర దృష్టికోణమును పరిశీలించుటకు మనము మూడు అంశములను విశదీకరిద్దాము: మొదటిగా, ఈ దృష్టికోణమును చర్చించుటకు ఉపయోగించబడిన పదజాలము; రెండవదిగా, పౌలు యుగాంతశాస్త్రము యొక్క నిర్మాణము; మరియు మూడవదిగా, అతని వేదాంతశాస్త్రము అంతటి మీద పౌలు యుగాంతశాస్త్రము యొక్క అంతర్భావములు. మొదటిగా మనము “యుగాంతశాస్త్రము” అనే పదమును చూద్దాము.

“యుగాంతశాస్త్రము” లేక “ఎస్కటాలాజి” అను పదము గ్రీకు పదమైన ఎస్కటోస్ (ἔσχατος) నుండి, అనగా “చివరి” లేదా “అంతము” అని అర్థం, మరియు లోగోస్ (λόγος) అను పదము నుండి, అనగా “వాక్యము” లేక “అధ్యయనము” నుండి వస్తుంది. కాబట్టి, యుగాంతశాస్త్రము అనగా:

అంత్య దినములను గూర్చిన అధ్యయనము లేక సిద్ధాంతము అయ్యున్నది

చివరిగా మెస్సీయ భూమిమీదకి వచ్చి చరిత్ర అంతటి కొరకు దేవుని ఉద్దేశ్యములను నెరవేర్చినప్పుడు సంభవించు చరిత్ర యొక్క గొప్ప ముగింపును సూచించుటకు పాత నిబంధన గ్రంథము తరచూ “అంత్య దినములు” లేదా “అంత్యకాలము” అను పదములను ఉపయోగిస్తుంది. మరియు అనేక సందర్భాలలో, ఈ పాత నిబంధన “అంత్య దినములు” లేదా “అంత్యకాలములు” మెస్సీయ అయిన యేసులో నెరవేర్చబడినవని క్రొత్త నిబంధన గ్రంథము సూచిస్తుంది.

ఇప్పుడు సాంప్రదాయక క్రమబద్ధమైన వేదాంతశాస్త్రములో, “యుగాంతశాస్త్రము” అనే పదము ప్రధానంగా క్రీస్తు రెండవ రాకడను గూర్చిన బైబిలు బోధను సూచిస్తుంది. అయితే పౌలు వేదాంతశాస్త్రములో “యుగాంతశాస్త్రము”ను గూర్చి మనము మాట్లాడేటప్పుడు, ఈ పదము క్రీస్తు రెండవ రాకడ కంటే మరింత ఎక్కువ సూచించునట్లు దీని అర్థమును మనము విస్తరింపజేయాలి. మనము చూడబోవుచున్నట్లుగా, క్రీస్తును గూర్చిన సమస్తమును, అనగా ఆయన మొదటి రాకడ నుండి రెండవ రాకడ వరకు కాలమును, పౌలు యుగాంతముగా, లేక అంత్య దినములుగా అర్థము చేసుకున్నాడు; ఇది చరిత్ర యొక్క ముగింపు అయ్యున్నది.

యుగాంతశాస్త్రము అను పదము సాంప్రదాయకముగా ఎస్కటోస్ మరియు లోగోస్ — ఎస్కటోస్ అనగా “చివరి విషయములు” అని అర్థం — అను పదముల ఆధారముగా “చివరి విషయములను గూర్చిన సిద్ధాంతము” అని నిర్వచించబడింది మరియు ఇది సాంప్రదాయకముగా వ్యక్తిగత యుగాంతశాస్త్రము మరియు సార్వత్రిక యుగాంతశాస్త్రముతో సంబంధము కలిగియున్నది. వ్యక్తిగత యుగాంతశాస్త్రము మరణం మరియు మధ్య స్థితిని గూర్చి మాట్లాడుతుంది; సార్వత్రిక యుగాంతశాస్త్రము, క్రీస్తు రెండవ రాకడ, అంత్య తీర్పు, సామాన్య పునరుత్థాణము మరియు నిత్య గమ్యము, పరలోకము మరియు నరకము వంటి విషయములకు సంబంధించినది. అయితే, యుగాంతశాస్త్రమును గూర్చి నేను విస్తృతమైన భావనలో చూడగోరుచున్నాను. యుగాంతశాస్త్రము కేవలం రెండవ రాకడతో మాత్రమే ముడిపడియుంటే, సువార్తలు మరియు పౌలు బోధనలలో అనేక యుగాంతశాస్త్ర విషయములను మనము కోల్పోతాము... క్రీస్తు మొదటి రాకడ ఎంతగా అంత్య దినములకు సంబంధించినదో రెండవ రాకడ కూడా అంతే అంత్య దినములకు సంబంధించినది, మరియు మనము దానిని చూడగలిగితే మరియు అర్థము చేసుకోగలిగితే, యుగాంతశాస్త్రమును గూర్చి మనము విస్తృతమైన బైబిలానుసారమైన వేదాంతశాస్త్ర అభిప్రాయమును కలిగియుండవచ్చు, మరియు అంత్య విషయములు క్రీస్తు యొక్క మొదటి రాకడతో ఆరంభమవుతాయి. దీనిని మనము అర్థము చేసుకోగలిగితే, పాత నిబంధన అంతా కూడా క్రీస్తు యొక్క మొదటి రాకడ కొరకు సిద్ధపడుతూ, దాని కొరకు ఎదురుచూచుట కూడా యుగాంతశాస్త్రము అయ్యున్నది అని మనము గ్రహించగలుగుతాము.

డా. కీత్ మతిసన్

పౌలు వేదాంతశాస్త్రములో యుగాంతశాస్త్రము అను పదము క్రీస్తు మొదటి రాకడ నుండి ఆయన రెండవ రాకడ మధ్య సాధించిన విషయములన్నిటిని కలిగియుంటుంది అని అర్థము చేసుకొనుటకు, పౌలు యొక్క యుగాంతశాస్త్ర అభిప్రాయముల యొక్క నిర్మాణము వైపు మన దృష్టిని త్రిప్పవలసియున్నది. పౌలు అంత్య దినములు లేదా క్రీస్తునందు కాలము ముగింపును గూర్చి ఎలా అర్థం చేసుకున్నాడు?

పౌలు యుగాంతశాస్త్రము యొక్క నిర్మాణములోని మూడు కోణములను మాత్రమే మనము చూద్దాము: దాని మూలములు, దాని అభివృద్ధి, మరియు దానిలోని కొన్ని ముఖ్య అంశములు. పౌలు ఎస్కటాలజి యొక్క మూలములను మొదటిగా చూద్దాము.

మూలములు పౌలు యుగాంతశాస్త్రము పాత నిబంధనలో నుండి పుట్టిన తన దినములలో సుపరిచితమైన యూదుల దృక్పథములో నాటబడియున్నది. పాత నిబంధన ప్రపంచ చరిత్రను రెండు గొప్ప యుగాలుగా విభజించింది అని యూదులైన వేదాంతవేత్తలు సాధారణంగా భావించారు. ఈ రెండు యుగములలో మొదటిది ప్రస్తుత యుగము — పాపము, సమస్యలు మరియు మరణముతో నిండియున్న యుగమును యూదా బోధకులు “ఈ యుగము” అని లేదా రబ్బీలు హెబ్రీలో ఓలాం హజెహ్ (עוֹלָם הַזֶּ֗ה) అని పిలిచారు. వాగ్దాన భూమి నుండి బహిష్కరించిన దైవిక శాపములతో ఇశ్రాయేలు కఠినముగా బాధపడుచున్నప్పుడు “ఈ యుగము” దాని యొక్క కనిష్ట స్థాయికి చేరుకుంది. యూదులైన వేదాంతవేత్తలు “ఈ యుగము”ను గూర్చి ప్రతికూలంగా మాట్లాడతారని చెప్పడంలో ఆశ్చర్యం లేదు.

కాని ఈ కష్ట యుగము తరువాత భవిష్యత్తులో దేవుని నుండి అద్భుతమైన ఆశీర్వాదములు కలుగు యుగము ఉంటుందని పౌలు దినములలోని రబ్బీలు విశ్వసించారు. ఈ భవిష్యత్ యుగమును వారు “రాబోవు యుగము,” అని లేదా రబ్బీలు హెబ్రీలో ఓలాం హబ (עוֹלָם הבא) అని పిలచారు. రాబోవు యుగములో, దేవుడు ఇశ్రాయేలుకు చేసిన వాగ్దానములన్నిటిని నెరవేర్చి, తన రాజ్యమును భూదిగంతముల వరకు వ్యాపింపజేస్తాడు.

పౌలు కాలములోని అనేక యూదుల సమూహాలు మెస్సీయ ప్రత్యక్షత చరిత్రలోని ఈ రెండు గొప్ప యుగాల మధ్య ఒక కీలకమైన మలుపుగా నిలుస్తుందని భావించాయి. మెస్సీయ వచ్చినప్పుడు, ఆయన “ప్రభువు దినమును,” దేవుడు సర్వలోకములో ఉన్న ఆయన ప్రజలను ఆశీర్వదించి, ఆయన శత్రువులను నాశనము చేసే దినమును తెస్తాడు. ఆ దినము రాబోవు యుగములోనికి, అంతిమ లేక అంత్య దినముల యుగములోనికి నడిపిస్తుంది.

పౌలు పత్రికలను మనం చదివినప్పుడు, చరిత్రను గూర్చి ఇదే ప్రాథమిక రెండు-యుగముల దృక్పథమును ఆయన కలిగియున్నట్లు తెలుస్తుంది. వాస్తవంగా చెప్పాలంటే, అతడు నివసించుచున్న యుగమును గూర్చి కనీసం పండ్రెండు సందర్భాలలో “ఈ యుగము” అని నేరుగా అతడు ప్రస్తావించాడు. ఉదాహరణకు, 2 కొరింథీయులకు 4:4లో, సాతానును “ఈ యుగ సంబంధమైన దేవత” అని సూచించాడు. మరియు అన్యులైన తర్కవాదులను గూర్చి “ఈ లోకపు తర్కవాది” అని 1 కొరింథీయులకు 1:20లో సంబోధించాడు.

“ఈ యుగ సంబంధమైన దేవత” అని పౌలు మాట్లాడినప్పుడు, అతడు స్వాభావికముగా దేవుళ్లుకాని కొన్ని అబద్ధ దేవతలకు నాయకత్వం వహించు మోసగాడైన సాతానును గూర్చి మాట్లాడుతున్నాడు. వారు “దేవుళ్లని” పిలువబడినప్పటికీ, వారు అసలు దేవుళ్లు కాదు. పాత నిబంధనలో యెషయా ప్రవక్త ఇలా పలికాడు, “నేనుగాక ఇతర దేవతలు గలరా? నేను ఎవనిని ఎరుగను.” కాబట్టి, యెహోవాకు ఏ ఇతర దేవుని గూర్చి తెలియని పక్షమున, ఎవరు లేరని అర్థము. ఆయన మాత్రమే దేవుడు. మరియు ఈ యుగ సంబంధమైన దేవత అను మాట ద్వారా అతడు ఈ లోక శక్తులకు అధిపతియైన సాతాను గూర్చి మాట్లాడుతున్నాడు.

— రెవ. క్లెటే హక్స్

అదే విధంగా, సర్వలోకము యొక్క అంతిమ తీర్పు మరియు ఆశీర్వాదములు కలుగు భవిష్యత్ యుగమును సూచించడానికి పౌలు “రాబోవు కాలము” అను వ్యక్తీకరణమును ఉపయోగించాడు. ఎఫెసీయులకు 2:7లో “అత్యధికమైన తన కృపా మహదైశ్వర్యమును రాబోవు యుగములలో కనుపరచు నిమిత్తము,” దేవుడు క్రీస్తును మృతులలో నుండి లేపాడు అని అతడు చెప్పాడు.

పౌలు యొక్క రెండు-యుగముల ఆలోచనకు ఉత్తమమైన ఉదాహరణ ఎఫెసీయులకు 1:21లో కనిపిస్తుంది. క్రీస్తు సింహాసనాసీనుడైయున్నాడు అని వ్రాస్తూ అతడు రెండు యుగములను గూర్చి మాట్లాడాడు:

సమస్తమైన ఆధిపత్యముకంటెను, అధికారముకంటెను శక్తికంటెను ప్రభుత్వముకంటెను, ఈ యుగమునందు మాత్రమే గాక రాబోవు యుగమునందును పేరుపొందిన ప్రతి నామముకంటెను, ఎంతో హెచ్చుగా ... (ఎఫెసీయులకు 1:21).

పౌలు ఈ మౌలిక రెండు-యుగముల పద్ధతిని పాత నిబంధన నుండి మరియు తన యూదా నేపథ్యము నుండి పొందుకున్నాడు.

కాబట్టి, ఈ మూలములను మనస్సులో ఉంచుకొని, పౌలు వేదాంతశాస్త్రములో మనకు కనబడు యుగాంతశాస్త్ర అభివృద్ధిని మనము చూడాలి.

అభివృద్ధి. ఈ యుగము మరియు రాబోయే యుగము మధ్య మలుపు మెస్సీయ యొక్క ప్రత్యక్షత అయ్యున్నది అని చాలా వరకు సాంప్రదాయక యూదులు నమ్మారని మీరు జ్ఞాపకం చేసుకోవచ్చు. ఇశ్రాయేలీయులు అనేక శతాబ్దముల పాటు చెర యొక్క తీవ్రమైన పరిణామాలను అనుభవించారు. మెస్సీయ వచ్చినప్పుడు దేవుని ప్రజలు వెంటనే ఆయన యొక్క పూర్తి ఆశీర్వాదములను పొందుకుంటారు మరియు దేవుని శత్రువులు నశింపబడతారు అని వారి నమ్మకమైనవారు నిరీక్షించారు.

అయితే, క్రీస్తు అనుచరుడైన పరిసయ్యునిగా పౌలు ఈ పురాతన నమ్మకము నుండి తీవ్రమైన సవాలును ఎదుర్కొన్నాడు. యేసు ఇశ్రాయేలు యొక్క మెస్సీయ అని అతనికి తెలుసు, కాని ఇశ్రాయేలు ఆశించిన రీతిగా యేసు సృష్టినిను ముగింపుకు తీసుకురాలేదు అని కూడా అతనికి తెలుసు. కాబట్టి, పౌలు యేసు యొక్క బోధనలను అనుసరించి, సాంప్రదాయిక యూదుల దృక్పథముల నుండి అతనిని దారిమళ్లించిన ఒక విశేషమైన ప్రత్యక్షతను అతడు దేవుని నుండి పొందుకున్నాడు. పౌలు వివరించినట్లుగా, ఈ యుగము నుండి రాబోవు యుగములోనికి మారడం అనేది ఒక సామాన్యమైన, సూటైన ఒక యుగం నుండి మరొక యుగములోనికి మారుట కాదు. బదులుగా, రెండు యుగములు ఒకేసారి సంభవించినప్పుడు ఇది అతివ్యాప్తి చెందుతుంది.

ఈ దృక్కోణంలో, రాబోయే యుగము క్రీస్తు మరణం, పునరుత్థానం మరియు ఆరోహణము, మరియు మొదటి శతాబ్దపు సంఘములోని అపొస్తలుల మీద ఆత్మ కుమ్మరింపు ద్వారా ఆరంభించబడినది. సువార్త లోకమంతా వ్యాపింపబడు ఒక నిర్థారించబడని కాలము కూడా అయ్యుంటుంది అని పౌలు నిశ్చయత కలిగియుండినాడు. తరువాత క్రీస్తు మహిమలో తిరిగివచ్చినప్పుడు రాబోవు యుగము ముగించబడుతుంది. ఆ భవిష్యత్ సమయమందు, ఈ దుష్ట యుగము ముగించబడుతుంది మరియు రాబోవు యుగము సర్వ సంపూర్ణతలో, దేవుని ప్రజలకు ఆశీర్వాదములను మరియు ఆయన శత్రువులకు తుది తీర్పును తీసుకొని వస్తుంది. అయితే, ఈ సమయంలో, రెండు యుగములు – ఈ యుగము మరియు రాబోవు యుగము – ప్రక్కప్రక్కనే ఉనికిలో ఉంటాయి.

“మన మధ్యన ఉన్నది మరియు ఇంకా రాలేదు” అని మనము పిలచువాటి మధ్య ఉద్రిక్తత పౌలు అభిప్రాయములలో బలముగా కనబడుతుంది. దేవుడు ఇప్పటికే మన కొరకు ఎన్నో అద్భుతమైన కార్యములను చేశాడు: నేను నీతిమంతునిగా తీర్చబడ్డాను, నేను రక్షింపబడ్డాను, నేను విమోచించబడ్డాను, నేను దేవుని కుటుంబములోనికి దత్తతు తీసుకొనబడ్డాను. మరొకసారి, నేను ఒక దినమున స్వీకరించబడు విధముగా దేవుని కుటుంబములోనికి నేను ఇంకా పూర్తిగా దత్తతు తీసుకొనబడలేదు. నేను ఇంకా మహిమపరచబడలేదు. నేను ఇంకా పాపము, శోధన, రోగము, మరణము నుండి విమోచించబడలేదు. “మన మధ్యనే ఉన్నది, ఇంకా రాలేదు” అను దీనిని మనము కొన్నిసార్లు యుగముల యొక్క అతివ్యాప్తి అని పిలవవచ్చు; అనగా పాత యుగము కొనసాగుతుంది. బలహీనమైన శారీరమును నేను ఇంకా కలిగియున్నాను, నేను ఇప్పటికీ పాపము చేయుటకు శోధించబడుతున్నాను, నా చుట్టూ ఉన్న లోకములో దుష్టత్వము ఉన్నది, ఇదంతా మనకు బాగా తెలుసు. అయినను, నేను క్రొత్త యుగమునకు చెందినవాడను కూడా. నేను దేవుని బిడ్డను. నేను ఆయనకు చెందినవాడను నేను దానియందు ఆనందిస్తాను. నేను ఆయనను ఆరాధిస్తాను. నిశ్చయముగా నేను ఆయనతో భవిష్యత్తును కలిగియున్నాను. మరియు క్రైస్తవులమైన మనము మన జీవితములన్నిటిని ఈ పాత యుగము మరియు రాబోవు యుగము మధ్య జరుగు అతివ్యాప్తి అను ఉద్రిక్తత మధ్య జీవిస్తాము.

డా. డగ్లస్ మూ

పౌలు యుగాంతశాస్త్రము యొక్క మూలములు మరియు అభివృద్ధిని మనస్సులో ఉంచుకొని, పౌలు పత్రికలలోని కొన్ని ప్రాముఖ్యమైన అంశములు ఈ దృక్పథాలను ఏ విధముగా ఎత్తి చూపుతాయో మనము చూడాలి.

అంశములు. యుగాంతశాస్త్రమును గూర్చి పౌలు యొక్క అభిప్రాయమును “మన మధ్యనే ఉన్నది, ఇంకా రాలేదు,” అని వర్ణించడం సర్వసాధారణమైపోయింది, ఎందుకంటే అంత్యకాలములు లేదా అంత్యదినములను గూర్చిన కొన్ని విషయాలు క్రీస్తులో ఇప్పటికే జరిగినవి, ఇతర విషయాలు ఇంకా జరుగలేదు అని పౌలు విశ్వసించాడు. రాబోవు యుగమును గూర్చిన ఏ విషయములు ఇప్పటికే జరిగాయి? ఇంకా జరుగవలసినవి ఏవి? ఈ విషయములలో మొదటి-శతాబ్దపు క్రైస్తవులు తీవ్రతలలోనికి వెళ్లారు కాబట్టి ఇవి కీలకమైన ప్రశ్నలైయున్నవి. మరియు పౌలు ఈ తీవ్రతలతో వ్యవహరించవలసి వచ్చింది. నేడు నమ్మకమైన క్రైస్తవులు కూడా ఈ విషయముల మధ్య సమతుల్యతను కనుగొనుటకు ఇబ్బందిపడుతుంటారు. కాబట్టి, ఈ సమయమందు, క్రైస్తవ విశ్వాసములోని “మన మధ్యనే ఉన్నది మరియు ఇంకా రాలేదు” కోణమును గూర్చి పౌలు బోధించిన విషయములను క్లుప్తంగా చూద్దాము.

ఒక వైపున, పౌలు ఆలోచన ప్రకారం, రాబోవు యుగము, అనగా మెస్సీయ యుగము ఇప్పటికే వివిధ విధములలో ఆరంభమైనది మరియు కొనసాగుతుంది. పౌలు రచనలలో ఈ అంశము కనిపించే మూడు ప్రాముఖ్యమైన మార్గములను మనం ప్రస్తావిద్దాము.

మొదటిగా, యేసు ఆయన యొక్క పరలోక సింహాసనము మీదికి ఆరోహణమైనప్పుడు దేవుని రాజ్యము యొక్క చివరి దశ ఆరంభమైనదని పౌలు బోధించాడు. ఉదాహరణకు, ఎఫెసీయులకు 1:20-21లో పౌలు ఈ విధంగా వ్రాశాడు, తండ్రి క్రీస్తును మృతులలో నుండి లేపినప్పుడు:

... సమస్తమైన ఆధిపత్యముకంటెను అధికారముకంటెను శక్తికంటెను ప్రభుత్వముకంటెను, ఈ యుగమునందుమాత్రమే గాక రాబోవు యుగము నందును పేరుపొందిన ప్రతి నామముకంటెను, ఎంతో హెచ్చుగా పరలోకమునందు ఆయనను తన కుడిపార్శ్వ మున కూర్చుండబెట్టుకొనియున్నాడు (ఎఫెసీయులకు 1:20-21).

ప్రస్తుత కాలములో క్రీస్తు పాలన ప్రధానంగా భూమిమీద కాకుండా “పరలోకమునందు” నెరవేర్చబడుతున్నప్పటికీ, క్రీస్తు ఇప్పటికే “సమస్తమైన ఆధిపత్యముకంటెను అధికారముకంటెను ఎంతో హెచ్చుగా” పాలించుచున్నాడు అనేది వాస్తవమై ఉంది. ఈ భావనలో, రాబోవు యుగములో దేవుని పాలన లేక సార్వత్రిక దేవుని రాజ్యము ప్రస్తుత వాస్తవికతయై ఉంది.

ఇప్పటికే మన మధ్య ఉన్న రాబోవు యుగము యొక్క రెండవ కోణము ఏమిటంటే, పరిశుద్ధాత్మలో మన నిత్య స్వాస్థ్యము యొక్క ముంద రుచి. క్రీస్తు ఎంతో హెచ్చుగా పరలోకమునందు తన సింహాసము మీదికి ఆరోహణమైనప్పుడు, క్రీస్తు తిరిగి వచ్చునప్పుడు మనం పొందే పరిపూర్ణ స్వాస్థ్యమునకు ముందు రుచిగా పరిశుద్ధాత్మను సంఘము మీద కుమ్మరించాడు అని పౌలు బోధించాడు.

రోమీయులకు 8:23లో విశ్వాసులు “ఆత్మయొక్క ప్రథమ ఫలముల నొందినవారు” అని చెబుతూ పౌలు దీనిని వివరించాడు. “ప్రథమ ఫలములు” అను పదము అపార్కే (ἀπαρχὴ), అను గ్రీకు పదము యొక్క అనువాదము, మరియు ఇది కోతలోని మొదటి భాగమును సూచించుటకు పాత నిబంధన ఉపయోగించు పదము యొక్క అనువాదమై ఉంది. పాత నిబంధనలో, ప్రథమ ఫలములు భవిష్యత్తులో గొప్ప కోత రాబోతుంది అని సూచిస్తాయి. కాబట్టి, పౌలు ఆలోచన ప్రకారం, ప్రతి విశ్వాసి జీవితములో పరిశుద్ధాత్మ వరము అనేది రాబోవు యుగము యొక్క గొప్ప ఆశీర్వాదములకు ముందు రుచిగా ఉంది. అదే విధంగా, ఎఫెసీయులకు 1:14 ప్రకారం, స్వయంగా పరిశుద్ధాత్మ:

... ఈ ఆత్మ మన స్వాస్థ్యమునకు సంచకరువుగా ఉన్నాడు (ఎఫెసీ. 1:14).

“సంచకరువు” అని అనువదించబడిని గ్రీకు పదము అర్రబన్ (aἀρραβὼν). పరిశుద్ధాత్ముడు మన కొరకు దేవుని మొదటి కిస్తీ లేదా సంచకరువు అని ఈ పదము సూచిస్తుంది, మరియు భవిష్యత్తులో దేవుని నుండి మనము మరింత పొందుకుంటాము అని మనకు హామీ ఇస్తుంది. మరోసారి, పరిశుద్ధాత్ముడు దేవుడు క్రీస్తు యొక్క మహిమగల రాకడకు ముందే మనకు అనుగ్రహించిన రాబోవు యుగము యొక్క ఆశీర్వాదము అయ్యున్నాడు.

ప్రస్తుతము ఉనికిలో ఉన్న రాబోవు యుగము యొక్క మూడవ లక్షణము ఏమనగా, నూతన సృష్టి యొక్క ఆరంభము. క్రీస్తు చేసిన దానినిబట్టి, విశ్వాసులు ఇప్పుడు ప్రపంచం యొక్క పునఃసృష్టిని కొంతవరకు — తమ వ్యక్తిగత జీవితాలలో మరియు కలిసి సామూహిక జీవితములో — ఆనందిస్తున్నారు. పాత నిబంధన గ్రంథములో, అంత్యదినములలో ప్రపంచమును పునఃసృష్టిస్తానని, ఆది నుండి మానవాళి కొరకు తాను రూపొందించిన ప్రణాళికను నెరవేర్చుతాను అని దేవుడు తన ప్రజలకు వాగ్దానం చేశాడు. యెషయా 65:17లో రాబోవు యుగమును గూర్చి దేవుడు యెషయాకు ఏ విధంగా వివరించాడో వినండి:

ఇదిగో నేను క్రొత్త ఆకాశమును క్రొత్త భూమిని సృజించుచున్నాను (యెషయా 65:17).

క్రీస్తు ఇప్పటికే అపవాది శక్తులను ఓడించి, ప్రజలను రక్షించుచున్నాడు అనే పౌలు మనస్సులోని వాస్తవము ప్రపంచము యొక్క పునఃసృష్టి ఆరంభమైనది అని రుజువు చేసింది. ఆ ఆలోచనను 2 కొరింథీయులకు 5:17 చక్కగా తెలియజేస్తుంది:

కాగా ఎవడైనను క్రీస్తునందున్నయెడల వాడు నూతన సృష్టి; పాతవి గతించెను, ఇదిగో క్రొత్తవాయెను (2 కొరింథీ. 5:17).

పౌలు మరియు ఆదిమ క్రైస్తవులు కాలమును గూర్చి మరియు చరిత్రను గూర్చి ఆలోచించినప్పుడు, క్రీస్తులో జరిగిన విషయము నిజముగా ఒక విప్లవము అని వారు అర్థము చేసుకున్నారు; యుగములలో మార్పు జరిగింది... నిజముగా వాస్తవమైన ఒక వాస్తవికత మానవ చరిత్రలో చోటు చేసుకొనుచున్నది, కాని మానవ చరిత్ర ఇంకా నెరవేర్పులోనికి రాలేదు అని వారు అర్థము చేసుకున్నారు. కాబట్టి, పౌలు అవగాహనలో మనము ఏమి చూస్తాము అంటే, వాస్తవికతలు, అధికారములు, భవిష్యత్తులో యూదా మతము చూసిన విషయములు ప్రస్తుత యుగములో నెరవేర్పులోనికి వచ్చుచున్నవి... కాబట్టి, ఈ ప్రస్తుత యుగములో సంఘము నివసించుచుండగా, మనము కేవలం భవిష్యత్తులో మంచి విషయముల కొరకు మాత్రమే నిరీక్షించుటలేదుగాని, ప్రస్తుత యుగములో మన పాపముల యొక్క విమోచన కొరకు మాత్రమే ఆశించుటలేదుగాని, ఇప్పుడు భవిష్యత్తును చూచు అవకాశము మనము కలిగియున్నాము. కాబట్టి, భవిష్యత్తు కేవలం వాగ్దానము మాత్రమే చేయబడలేదుగాని, భవిష్యత్తు మనముందుంచబడినది, మరియు పౌలు సువార్తలో ఇది అతి పెద్ద భాగమైయున్నది.

డా. గ్యారీ ఎం. బర్గె

క్రీస్తు మొదటిగా వచ్చినప్పుడు రాబోవు యుగములోని అనేక విషయాలు ఆరంభించబడినవని, మరియు సంఘ చరిత్ర అంతట అవి కొనసాగుతాయని పౌలు బోధించాడు. అయితే, అంత్య దినముల ఆశీర్వాదములు ఇంకా పూర్తిగా నెరవేర్పులోనికి రాలేదు అని కూడా పౌలు నమ్మాడు. కాబట్టి, ఒక వైపున, క్రీస్తు రాకడను క్రీస్తు యొక్క తుది తీర్పులు మరియు ఆశీర్వాదములు నెరవేర్చబడే సమయముగా అతడు పరిగణించాడు. మరొకసారి, పౌలు వేదాంతశాస్త్రములో ఈ అంశము కనిపించే మూడు ప్రాముఖ్యమైన మార్గములను మనం ప్రస్తావించుదము.

మొదటి స్థానంలో, మనము చూసినట్లుగా, రాజైన క్రీస్తు ప్రస్తుతము పరలోక సింహాసనము నుండి పాలించుచున్నాడని పౌలు బోధించాడు. అయితే క్రీస్తు తిరిగి వచ్చినప్పుడు దేవుని రాజ్యమును పరిపూర్ణతకు తెచ్చు ఆ సమయము కొరకు మనము ఆశతో ఎదురుచూచుచున్నాము అని కూడా పౌలు విశ్వసించాడు. దీనిని గూర్చి 1 కొరింథీయులకు 15:24-26లో పౌలు వివరించిన విధానమును వినండి:

అటుతరువాత [క్రీస్తు] సమస్తమైన ఆధిపత్యమును, సమస్తమైన అధికారమును, బలమును కొట్టివేసి తన తండ్రియైన దేవునికి రాజ్యము అప్పగించును; అప్పుడు అంతము వచ్చును. ఎందుకనగా తన శత్రువులనందరిని తన పాదముల క్రింద ఉంచువరకు ఆయన రాజ్యపరిపాలన చేయుచుండవలెను. కడపట నశింపజేయబడు శత్రువు మరణము (1 కొరింథీయులకు 15:24-26).

పౌలు క్రీస్తు యొక్క ప్రస్తుత పరిపాలనకు మించి, దేవుని ఉద్దేశ్యములకు వ్యతిరేకంగా నిలువబడే సమస్తమైన ఆధిపత్యము, అధికారములు, శక్తుల యొక్క భవిష్యత్తు నాశనమును కూడా చూశాడని ఈ భాగం స్పష్టంగా తెలుపుతుంది. మరణముతో సహా, ప్రతి విధమైన శత్రువు నాశనమయ్యే వరకు కూడా క్రీస్తు పరలోక సింహాసనము మీద ఉంటాడు. కాబట్టి, కొన్ని విధాలుగా, క్రీస్తు రాజ్యము మన మధ్యన ఉంది అని పౌలు విశ్వసించాడు, కాని మరొక విధంగా, అది ఇక్కడ లేదు అని కూడా పౌలు నమ్మాడు.

రెండవదిగా, మనము చూసినట్లుగా, రక్షణ కోతలో పరిశుద్ధాత్ముడు ప్రథమ ఫలములుగా మరియు మన స్వాస్థ్యమునకు సంచకరువుగా ఉన్నాడని పౌలు విశ్వసించాడు. అయితే “ప్రథమ ఫలములు” మరియు “సంచకరువు” అను పదాలు భవిష్యత్తులో మనము పొందే సంపూర్ణ స్వాస్థ్యమును సూచిస్తాయి. రోమీయులకు 8:23లో పౌలు దీనిని గూర్చి వ్రాసిన విధానమును వినండి:

అంతేకాదు, ఆత్మయొక్క ప్రథమ ఫలముల నొందిన మనము కూడ దత్త పుత్రత్వముకొరకు, అనగా మన దేహము యొక్క విమోచనముకొరకు కనిపెట్టుచు మనలో మనము మూలుగుచున్నాము (రోమీయులకు 8:23లో).

ఇక్కడ పౌలు పరిశుద్ధాత్మ వరము యొక్క ప్రస్తుత వాస్తవికతను భవిష్యత్తుకు నేరుగా అనుసంధానించాడు. ఎందుకంటే రాబోవు యుగము మన మధ్యన ఉంది, మరియు మనము ఇప్పటికే ఆత్మ యొక్క కుమ్మరింపును అనుభవించాము అని అతనికి తెలుసు. అయితే “మన దేహము యొక్క విమోచనమును” ఇంకా మనం పొందుకోలేదు కాబట్టి “మనలో మనము మూలుగుచున్నాము.” అదే విధంగా, ఎఫెసీయులకు 1:14లోమనము చదువునట్లు, పరిశుద్ధాత్మను గూర్చి పౌలు ఇలా వ్రాశాడు:

... ఈ ఆత్మ మన స్వాస్థ్యమునకు సంచకరువుగా ఉన్నాడు (ఎఫెసీ. 1:14).

మనలో నివసించు మరియు మనలో మరియు మన మధ్య కార్యము చేయు ఆత్మ ఒక అద్భుతమైన ముందురుచి అయ్యున్నాడు, కాని గొప్ప విమోచనము యొక్క ముందురుచిగా మాత్రమే ఉన్నాడు: మన పూర్ణ స్వాస్థ్యము.

మూడవదిగా, విశ్వాసుల జీవితములలో నూతన సృష్టి ఒక ఆత్మీయ వాస్తవికతగా ఉన్నప్పటికీ, సృష్టి యొక్క సంపూర్ణ పునరుద్ధరణ మరియు క్రొత్త భూమిమీద మన శాశ్వత పరిపాలన కొరకు కూడా మనం ఎదురుచూచుచున్నాము. రోమా 8:21లో పౌలు వ్రాసినట్లుగా:

సృష్టి, నాశనమునకు లోనయిన దాస్యములో నుండి విడిపింపబడి, దేవుని పిల్లలు పొందబోవు మహిమగల స్వాతంత్ర్యము పొందుతుంది (రోమీయులకు 8:21).

మనము భౌతికముగా మరణములో నుండి పునరుత్థానమును చెందుచుండగా సంపూర్ణ పూర్ణతలో నూతన సృష్టి వచ్చు సమయమును క్రీస్తు రాకడగా పౌలు పరిగణించాడు మరియు దాని కొరకు ఎదురుచూచాడు.

సృష్టి యావత్తు బానిసత్వములో ఉండి, మూలుగుచున్న విధానమును గూర్చి రోమా. 8 మాట్లాడుతుంది; మనము శాపము క్రింద ఉన్నాము. మరియు కొంతమంది ప్రజలముగా మనము మాత్రమే మూలుగుట లేదుగాని, స్వయంగా సృష్టి మూలుగుచున్నదని అది చెబుతుంది... మరియు కొన్నిసార్లు, క్రీస్తు చేయునదంతా ఆత్మలను ఈ లోకములో నుండి బయటకు తీసి నిత్యము పరలోకములో ఉండునట్లు చేయుటయే అను విధముగా క్రీస్తు విమోచన కార్యమును సంకుచితము చేస్తుంటాము. మరియు ఆయన మన శరీరముల యొక్క విమోచనను గూర్చి కూడా ఆలోచించుచున్నాడు. మరియు మన ఆధీనములో ఉన్న సృష్టి, అనగా మన ప్రభావము క్రింద ఉన్న సృష్టి, మన ప్రభావములో నుండి బయటకు వచ్చి, మన విమోచన కొరకు, మన శరీరముల విమోచన — అనగా పునరుత్థానము — కొరకు ఎదురుచూచుచున్నది. మరియు ఇది దేవుని గొప్ప వాగ్దానమైయున్నది, అనగా మనము సృష్టిని నాశనములోనికి నడిపించినను, దానిని బయటకు కూడా నడిపిస్తాము — లేక మన పునరుత్థానము ద్వారా క్రీస్తు — దానిని నాశనములో నుండి బయటకు నడిపిస్తాడు, తరువాత క్రొత్త ఆకాశములు మరియు క్రొత్త భూమి, ఒక క్రొత్త విమోచించబడిన విశ్వము ఉనికిలోనికి వస్తుంది.

డా. ర్యాండి అల్కర్న్

పౌలు యుగాంతశాస్త్రము యొక్క పదజాలము మరియు నిర్మాణమును మనము చూశాము గనుక, ఇప్పుడు తన శ్రోతల కొరకు పౌలు తరచుగా ఉద్ఘాటించిన ఈ అభిప్రాయముల యొక్క కొన్ని ప్రాముఖ్యమైన అందర్భాములను మనము చూడవలసియున్నది.

మనము ఇంతకు ముందు చూసినట్లు, పౌలు పత్రికలు సంక్షేప వేదాంతశాస్త్రము మీద ఎక్కువ దృష్టిపెట్టలేదుగాని, అతని వేదాంతశాస్త్రమును స్థిరమైన మానవ అనుభవమునకు అనువర్తించుట మీద దృష్టిపెట్టాయి. పౌలు యేసు అంత్య దినములను ఏ విధముగా తీసుకొని వస్తాడు అను వివరించు తన యుగాంతశాస్త్రమును గూర్చి ఒక పుస్తకము వ్రాయలేదు. బదులుగా, తన పత్రికలలో, క్రీస్తు నందు అంత్య దినముల యొక్క రాక అభ్యాసిక క్రైస్తవ జీవితమునకు ఏ విధముగా అనువర్తించబడుతుంది అను విషయము మీద దృష్టిపెట్టాడు. సంఘము ఎదుర్కొనుచున్న అనేక ఇబ్బందులు ఈ యుగపు మరియు రాబోవు యుగపు అతివ్యాప్తిలో నివసించు ఉద్రిక్తత వలన కలుగుతున్నాయని పౌలు అర్థము చేసుకున్నాడు. కాబట్టి, క్రీస్తు యొక్క మొదటి రాకడలో దేవుడు ఇంతకు ముందే చేసిన దానికి మరియు క్రీస్తు తిరిగివచ్చునప్పుడు కలుగు మహిమకు మధ్య క్రీస్తు అనుచరులు ఏ విధముగా జీవించాలో అతడు వివరించాడు.

క్రీస్తుతో ఐక్యత. పౌలు యుగాంతశాస్త్రము యొక్క అభ్యాసిక అంతర్భావములను మనము పరిగణించుచుండగా, పౌలు రచనలలోని మూడు ప్రధానమైన విషయములను మనము చూద్దాము: మొదటిగా, క్రీస్తుతో విశ్వాసుల యొక్క ఐక్యత; రెండవదిగా, క్రీస్తు మొదటి రాకడ మరియు రెండవ రాకడకు మధ్య కాలము కొరకు దైవిక ఉద్దేశ్యము; మరియు మూడవదిగా, భవిష్యత్తు కొరకు క్రైస్తవ నిరీక్షణ. మొదటిగా క్రీస్తుతో విశ్వాసుల యొక్క ఐక్యతను గూర్చి పౌలు చేసిన బోధను మనము చూద్దాము.

క్రీస్తునందు ఉండుట అను ఆలోచన అంతా విశ్వాసి కొరకు పౌలు చేసిన బోధనలో కేంద్రమైయున్నది. క్రీస్తునందుండుట అనగా ఒక వివాహములో స్త్రీ పురుషులు ఐక్యపరచబడియున్న విధముగా మీరు క్రీస్తుతో ఒకటైయుండుట, ఆయనతో ఐక్యపరచబడి ఉండుట అయ్యున్నది అని ఉత్తమమైన రీతిలో మనము ఊహించవచ్చు. ఒక విశ్వాసి పాపము నుండి వెనుదిరిగినప్పుడు, యేసునందు విశ్వాసముంచినప్పుడు, మనము క్రీస్తుతో ఒకటవుతాము, మరియు ఆయన నీతి అంతా, ఆయన ఐశ్వర్యము అంతా, ఆయన ధన్యతలు అన్ని మనవవుతాయి. తరువాత మనము దేవుని కుటుంబములోనికి ఆహ్వానించబడతాము, స్వయంగా యేసుతో మరియు ఆయన తండ్రితో మనము బల్ల మీద కూర్చొని ఉంటాము. ఆత్మీయ భావనలో మనము బహుగా మరియు విరివిగా ధనవంతులమవుతాము. కాబట్టి, విశ్వాసులు దీనిని తమ కీలకమైన గుర్తింపుగా, తమ ప్రాముఖ్యమైన గుర్తింపుగా కలిగియుండాలని పౌలు కోరుచున్నాడు. నేను ఎవరిని? నేను ప్రధానముగా నా ప్రభువును, నా స్వామి అయిన యేసు క్రీస్తుతో ఏకమైనవాడను. మరియు క్రీస్తునందుండు ఈ గుర్తింపు ఒక వ్యక్తి కలిగియుండగల ఏ ఇతర గుర్తింపు కంటే శ్రేష్టమైనది, అది వారి కుటుంబము కావచ్చు లేక వారి సంస్కృతి కావచ్చు లేక వారి సాఫల్యత కావచ్చు లేక వారి వ్యాపారము కావచ్చు లేక ఏదైనా కావచ్చు. యేసు నందు విశ్వాసము ద్వారా మనము దేవుని బిడ్డలుగా కలిగియున్న ప్రాముఖ్యమైన గుర్తింపు ఇది.

— రెవ. డెన్ హెండ్లె

రోమీయులకు 6:3-4లో, క్రీస్తుతో మన ఐక్యత వాస్తవంగా మనలను ఈ యుగము నుండి రాబోవు యుగములోకి ఎలా నడిపిస్తుందో పౌలు సూచించాడు. ఆ వాక్యభాగములో పౌలు పలికిన మాటలను వినండి:

క్రీస్తు యేసులోనికి బాప్తిస్మము పొందిన మనమందరము ఆయన మరణములోనికి బాప్తిస్మము పొందితిమని మీరెరుగరా? కాబట్టి తండ్రి మహిమవలన క్రీస్తు మృతులలోనుండి యేలాగు లేపబడెనో, ఆలాగే మనమును నూతనజీవము పొందినవారమై నడుచుకొనునట్లు, మనము బాప్తిస్మమువలన మరణములో పాలు పొందుటకై ఆయనతోకూడ పాతిపెట్టబడితివిు (రోమీయులకు 6:3-4).

ఇంతకు ముందు మనము చూసినట్లు, ఈ యుగము నుండి రాబోవు యుగముకు మారుట అనేది క్రీస్తు యొక్క మరణము మరియు పునరుత్థానములో జరిగింది అని పౌలు నమ్మాడు. ఇప్పుడు, రాబోవు యుగము యొక్క నూతన సృష్టిలోనికి లోకము యొక్క మార్పు ఇంకా జరగలేదు అని ప్రతి ఒక్కరికి స్పష్టమవుతుంది. అయితే స్త్రీ పురుషులు రక్షించు విశ్వాసము ద్వారా క్రీస్తు యొద్దకువచ్చు ప్రతిసారి, వారు ఆయన మరణ పునరుత్థానములో క్రీస్తుతో ఐక్యమవుతారు. తత్ఫలితంగా, మనము ఇకమీదట పాపమునకు బానిసలుగా మరియు ఈ యుగము మీదికి దేవుడు తెచ్చు తీర్పు క్రింద జీవించము. బదులుగా, క్రీస్తు మరణములో నుండి లేపబడిన విధముగానే, “నూతనజీవము పొందినవారమై నడుచుకొనునట్లు” మనము కూడా లేపబడితిమి. రోమీయులకు 6:10-11లో పౌలు వివరించుట కొనసాగించినట్లుగా:

ఏలయనగా [క్రీస్తు] చనిపోవుట చూడగా, పాపము విషయమై, ఒక్కమారే చనిపోయెను గాని ఆయన జీవించుట చూడగా, దేవుని విషయమై జీవించుచున్నాడు. అటువలె మీరును పాపము విషయమై మృతులుగాను, దేవుని విషయమై క్రీస్తుయేసు నందు సజీవులుగాను మిమ్మును మీరే యెంచుకొనుడి (రోమీయులకు 6:10-11).

ఇక్కడ “[క్రీస్తు] పాపము విషయమై చనిపోయి” “దేవుని విషయమై జీవించుచున్నాడు” అను వాస్తవమును పౌలు సూచించిన విధానమును గమనించండి. అయితే ఇక్కడ పౌలు రోమాలో ఉన్న విశ్వాసులను గూర్చి కూడా మాట్లాడుతున్నాడు. వారు “క్రీస్తుయేసు నందు” ఉన్నారని, లేక క్రీస్తుతో ఐక్యత కలిగి ఉన్నారని అతడు చెప్పాడు. మరియు వారి జీవితముల కొరకు దీని అర్థము ఏమిటి? వారు తమనుతాము “పాపము విషయమై మృతులుగాను, దేవుని విషయమై ... సజీవులుగాను” ఎంచుకొనవలెను. క్రీస్తుతో వారి ఐక్యత ద్వారా, రోమా విశ్వాసులు తమనుతాము ఈ పాపపు, సమస్యల, మరియు మరణపు యుగము నుండి విడిపించబడి రాబోవు యుగములోని నూతన జీవితమును అనుభవించినవారిగా మార్పు చెందినవారిగా పరిగణించుకోవాలి.

విశేషముగా, అపొస్తలుడైన పౌలు యొక్క బోధనలలో ఒక మూలాంశము మనము యేసు క్రీస్తుతో ఐక్యపరచబడుట అని నేననుకుంటాను; మనము ఆయనకు చెందినవారమైయున్నాము. బైబిలు ప్రత్యక్షత అంతటిని మనము చూచినప్పుడు, మనము అయితే ఆదాముతో ఉన్నాము, లేకపోతే క్రీస్తుతో ఉన్నామని బైబిలు బోధిస్తుంది అని నేననుకుంటాను. అవును, ఆదాము మొదటి మానవుడైయున్నాడు. మానవులందరు ఆదాము హవ్వలకు కుమారులుగాను, కుమార్తెలుగాను జన్మించారు. కాబట్టి వారు లోకములోనికి పాపులుగా వచ్చుచున్నారు. వారు పాపపు స్వభావమును కలిగియున్నారు. వారు దేవుని నుండి దూరము చేయబడ్డారు. రక్షింపబడుట, విమోచించబడుట మరియు క్రీస్తును నమ్ముట అంటే క్రీస్తులోనికి చేర్చబడుట, క్రీస్తుకు చెందినవారగుట అయ్యున్నది. మనము బాప్తిస్మము పొందినప్పుడు, మనము క్రీస్తుతో ఐక్యపరచబడితిమి అని రోమీయులకు 6లో పౌలు స్పష్టము చేయుచున్నాడు... క్రీస్తుకు చెందినవారు క్రీస్తును అధిపతిగా కలిగియున్నారు. కాబట్టి క్రీస్తు వారి నీతియైయున్నాడు. వారి నీతి ఇకమీదట వారిలో లేదు; వారి నీతి కొరకు వారు క్రీస్తు వైపుకు చూస్తారు.

డా. థామస్ ఆర్. శ్రైనర్

క్రీస్తుతో ఐక్యత మీద పౌలు పెట్టిన ఉద్ఘాటనతో పాటుగా, యేసు యొక్క మొదటి మరియు రెండవ రాకడలకు మధ్య ఉన్న సమయము కొరకు దైవిక ఉద్దేశ్యమును గూర్చి అతడిచ్చిన వర్ణనలలో అభ్యాసిక క్రైస్తవ జీవనము కొరకు పౌలు యుగాంతశాస్త్రము యొక్క అంతర్భావములను కూడా మనము చూస్తాము.

దైవిక ఉద్దేశ్యము. అన్యజనుల మధ్య పౌలు యొక్క మిషనరీ పరిచర్య, యుగముల అతివ్యాప్తి కొరకైన దేవుని ప్రణాళికను గూర్చి పౌలు నమ్మిన విషయములకు సాక్ష్యమిస్తుంది. ఈ సమయమందు, క్రీస్తు దేవుని రాజ్యమును ఇశ్రాయేలు యొక్క సరిహద్దుల ఆవలకు వ్యాపింపజేయుచున్నాడు, తద్వారా ప్రపంచవ్యాప్తంగా ఉన్న యూదులు మరియు అన్యులు ఒకే దేవుని ప్రజలవుతారు.

మరలా మరలా, సంఘము ఐక్యత కలిగి ఉండాలని పౌలు నొక్కి చెప్పాడు. రాబోవు యుగమును క్రీస్తు తీసుకొని వచ్చాడు కాబట్టి, యూదులు మరియు అన్యుల మధ్య విభేదములు మరియు ఇతర సామాజిక మరియు ఆర్ధిక ఆటంకములను ప్రక్కనపెట్టాలి. కొన్నిసార్లు, ఎఫెసీయులకు 2:19-22లో ఉన్నట్లుగా, దేవుని దేవాలయమును నిర్మించు దృష్ట్యా తన పరిచర్యను వర్ణించుటకు కొన్ని సందర్భాలలో పౌలు ఈ ఆలోచనను చిత్రీకరించాడు. మరికొన్నిసార్లు, ఎఫెసీయులకు 4:15-16లో ఉన్నట్లుగా, సంఘమును గూర్చి పరిపక్వమైన మానవ శరీరము దృష్ట్యా మాట్లాడాడు. సంఘము ఎదుగుచున్న ఐక్య రాజ్యముగాను, పరిశుద్ధ జనముగాను ఎలా ఉన్నదో ఈ అలంకారములు ఉదాహరిస్తాయి. లోక వ్యాప్తంగా సంఘము యొక్క ఎదుగుదల క్రీస్తు మొదటి మరియు రెండవ రాకడలకు మధ్య ఉన్న సమయము కొరకు దేవుని కేంద్ర ఉద్దేశ్యములలో ఒకటైయున్నది అని పౌలు నమ్మాడు.

అన్యజనుల లోకములో సంఘము యొక్క నిదానమైన, వ్యాపించు ఎదుగుదలకు సంబంధించిన ఈ దృక్పథము మునుపు ప్రవచించబడలేదు అని పౌలు గ్రహించాడు. వాస్తవానికి, అతడు దీనిని “మర్మము” అని పిలచి, ఇతరులకు వివరించుటకు దేవుడు దానిని అతనికి బయలుపరచాడని చెప్పాడు. రోమీయులకు 11:25లో, పౌలు ఈ మాటలు వ్రాశాడు:

సహోదరులారా, మీదృష్టికి మీరే బుద్ధిమంతులమని అనుకొనకుండునట్లు ఈ మర్మము మీరు తెలిసికొన గోరుచున్నాను. అదేమనగా, అన్యజనుల ప్రవేశము సంపూర్ణమగువరకు ఇశ్రాయేలునకు కఠిన మనస్సు కొంతమట్టుకు కలిగెను (రోమా. 11:25).

ఈ వాక్యభాగములో, అనేకమంది యూదులు సువార్తకు విముఖత చూపు ఈ సమయములో ప్రస్తుత యుగము కొరకు దేవుని ఉద్దేశ్యము “అన్యజనుల ప్రవేశమును సంపూర్ణమగుట” — లేక పూర్తి సంఖ్య కలిగియుండుట — అని పౌలు సూచించాడు. ఎఫెసీ. 3:4-6లో అతడు చెప్పినట్లుగా:

మీరు దానిని చదివినయెడల దానినిబట్టి ఆ క్రీస్తు మర్మమునుగూర్చి నాకు కలిగిన జ్ఞానము గ్రహించుకొనగలరు. ఈ మర్మమిప్పుడు ఆత్మమూలముగా దేవుని పరిశుద్ధులగు అపొస్తలులకును ప్రవక్తలకును బయలుపరచబడి యున్నట్టుగా పూర్వకాలములయందు మనుష్యులకు తెలియ పరచబడలేదు. ఈ మర్మమేదనగా అన్యజనులు, సువార్తవలన క్రీస్తుయేసునందు, యూదులతోపాటు సమానవారసులును, ఒక శరీరమందలి సాటి అవయవములును, వాగ్దానములో పాలివారలునై యున్నారనునదియే (ఎఫెసీయులకు 3:4-6).

దేవుని ఉద్దేశముల మీద పౌలు యొక్క దృక్పథం క్రీస్తు యొక్క మొదటి మరియు రెండవ రాకడలకు మధ్య నివసించు విశ్వాసులందరికీ ఒక ధోరణిని ఇచ్చింది. ఆయన తిరిగివచ్చునప్పుడు రాబోవు యుగము యొక్క పూర్ణతను తెచ్చు క్రీస్తు కొరకు కేవలం వేచియుండు సమయము కాదు ఇది. భిన్నముగా, దేవుడు ఈ యుగమును ఒక గొప్ప కార్యాచరణ కొరకు రూపొందించాడు. భూమి మీద ఉన్న ప్రతి దేశములో మనము సంఘమును నిర్మించాలి. సువార్తను వ్యాప్తిచేయడానికి మరియు సంఘమును ఐక్యత మరియు ప్రేమలో కట్టుటకు పౌలు తన జీవితమును సమర్పించుకున్నాడు. ఆ పరిచర్యలో తనతో పాలివారు కావాలని అతడు ఇతరులను కూడా పిలచాడు.

గొప్ప ఆజ్ఞలో మొదటిగా యేసు మనకిచ్చిన ఉద్దేశ్యములను సాధించుట సంఘము యొక్క పని అయ్యున్నది: పూర్ణ హృదయముతో, ఆత్మతో మరియు మనస్సుతో ఆయనను ప్రేమించుట మరియు మన వలె మన పొరుగువారిని ప్రేమించుట. తరువాత ఆయన మనకు గొప్ప ఆజ్ఞను ఇస్తాడు, మరియు లోకమునకు సువార్త ప్రకటించుట ఆ పని అయ్యున్నది. కాబట్టి, శిష్యులను చేయుట — అనగా దానిలో ముఖ్య భాగము శిష్యులను చేయుట అయ్యున్నది — కాబట్టి “వెళ్లి శిష్యులను చేయుడి” అని ఆయన చెప్పునప్పుడు, దాని అర్థము, మీరు వెళ్లుచుండగా, సమస్త దేశములను శిష్యులనుగా చేయుడి అయ్యున్నది. కాబట్టి, సంఘము యొక్క పరిచర్యను ఈ భావనలలో వర్ణించవచ్చు: మన పూర్ణ హృదయము, ఆత్మ, మనస్సు మరియు బలముతో దేవుని ప్రేమించుట మరియు మన పొరుగువారిని మన వలె ప్రేమించుట, మరియు తరువాత వెళ్లి సర్వలోకములోని ప్రజలను శిష్యులనుగా చేయుట.

— రెవ. జోసెఫ్ హ్యాండ్లె

పౌలు యుగాంతశాస్త్రము క్రీస్తుతో మన ఐక్యత మీద మరియు ప్రస్తుత యుగము మరియు రాబోవు యుగము యొక్క అతివ్యాప్తిలో దేవుని ఉద్దేశ్యము మీద మాత్రమే దృష్టిపెట్టలేదు, అంత్య దినములపై అతని దృష్టికోణము భవిష్యత్తు కొరకు క్రైస్తవ నిరీక్షణను గూర్చి అతడు బోధించిన విషయములకు ఆధారము కూడా అయ్యున్నది.

క్రైస్తవ నిరీక్షణ. ఒక అపొస్తలునిగా తన పరిచర్యలో అనేక బాధలు పౌలుకు తెలుసు, మరియు క్రైస్తవులందరు ఏదోఒక విధంగా శ్రమననుభవిస్తారని అతనికి తెలుసు. అయితే తన పత్రికలలో, కనీసం రెండు మార్గములలో క్రైస్తవులకు నిరీక్షణనిచ్చుటకు క్రీస్తు తిరిగి వస్తాడను తన నమ్మకమును పౌలు అనువర్తించాడు.

ఒకవైపు, రాబోవు యుగములోని అనేక ప్రయోజనములను క్రీస్తు అనుచరులు ఇప్పటికే అనుభవించుట ప్రారంభించారని ఉద్ఘాటించుట ద్వారా పౌలు యుగాంతశాస్త్రము భవిష్యత్తు కొరకు నిరీక్షణను ఇస్తుంది. మనం మన జీవితములను చూచినప్పుడు మరియు ఇప్పటికే మనము కలిగియున్న రాబోవు యుగపు ఆశీర్వాదములను చూచినప్పుడు, భవిష్యత్తులో గొప్ప మరియు సంపూర్ణ ఆశీర్వాదములను పొందుతామను నిరీక్షణను అది మనకు కలిగిస్తుంది. 2 కొరింథీయులకు 4:16-17లో పౌలు వ్రాసినట్లుగా:

కావున మేము అధైర్యపడము; మా బాహ్య పురుషుడు కృశించుచున్నను, ఆంతర్యపురుషుడు దినదినము నూతన పరచబడుచున్నాడు. మేము దృశ్యమైనవాటిని చూడక అదృశ్యమైనవాటినే నిదానించి చూచుచున్నాము (2 కొరింథీ. 4:16-17).

మరొకవైపు, క్రీస్తు తిరిగివచ్చినప్పుడు కలుగు ఆశీర్వాదములు ఈ జీవితములో మనము అనుభవించు శ్రమలన్నిటిని అధిగమించు విధానమును ఎత్తి చూపుట ద్వారా కూడా పౌలు క్రైస్తవులకు నిరీక్షణను ఇచ్చాడు. ఈ నమ్మకమే పౌలు రోమీయులకు 8:18లో ఇలా వ్రాయుటకు దారితీసింది:

మనయెడల ప్రత్యక్షము కాబోవు మహిమయెదుట ఇప్పటి కాలపు శ్రమలు ఎన్నతగినవి కావని యెంచుచున్నాను (రోమీయులకు 8:18).

మన ప్రస్తుత బాధలు తాత్కాలికమైనవి. యేసు తుదకు ఈ ప్రస్తుత దుష్ట యుగమును అంతము చేస్తాడు మరియు తన పిల్లలకు అద్భుతమైన బహుమతిగా లోకమును పునఃసృష్టిస్తాడు.

ఈ జీవితములో క్రీస్తు అనుచరులు శ్రమను అనుభవిస్తారని తన పత్రికలలో పౌలు అనేకసార్లు ఒప్పుకున్నాడు. అయితే మనము మన కన్నులను అదృశ్యమైనదాని మీద ఉంచుకొని, మనము ప్రస్తుతము ఎదుర్కొనుచున్న శ్రమలు క్రీస్తు తిరిగివచ్చినప్పుడు మనము పొందు మహిమ ఎదుట ఎన్నదగినవి కావు అని పరిగణించాలని అతడు ప్రకటించాడు.

మనయెడల ప్రత్యక్షము కాబోవు మహిమయెదుట ఇప్పటి కాలపు శ్రమలు ఎన్నతగినవి కావని రోమీయులకు 8లో పౌలు చెబుతున్నాడు. పౌలు ఈ భవిష్యత్ మహిమ నిరీక్షణను ప్రస్తుత శ్రమలు మరియు శోధనలు అను వాస్తవికతో ఎలా వ్యత్యాసపరచుచున్నాడో మనము గమనించగోరుచున్నాము. మనము గమనించగోరుచున్న మొదటి విషయము పౌలు చెప్పిన మాటలు... “ప్రస్తుత శ్రమలను పట్టించుకోవద్దు; అవి వాస్తవములని ఎంచవద్దు; అవి బాధాకరమైనవను విషయమును తిరస్కరించండి” అని అతడు చెప్పుటలేదు. పౌలు తర్కము దీనికి పూర్తిగా భిన్నమైనది. అతడంటాడు, “ఈ విరిగిన లోకములో బాధ, శ్రమ, ఆవేదనను గూర్చి మీకు తెలిసిన ప్రతిదానిని తీసుకొని, దానిని ఎత్తి చూపి, దానిని పూర్ణతలో చూసి, దేవుని మహిమ దాని కంటే కూడా గొప్పదని తెలుసుకోండి.” కాబట్టి, పౌలు తర్కము తక్కువ నుండి ఎక్కువకు వెళ్తుంది, అనగా మరిగొప్ప మహిమ తక్కువ బాధల వలన కలుగు కన్నీటిని తుడిచివేస్తుంది.

డా. జిమ్మీ ఆగన్

ఈ పాఠమలో పౌలు జీవితము మరియు అతని వేదాంతశాస్త్రము మధ్య ఉన్న అనుబంధములను గుర్తిస్తూ పౌలు వేదాంతశాస్త్రము యొక్క మూలాంశమును విశదీకరించుటను మనము ఆరంభించాము. యూదుల మరియు అన్యుల సందర్భములలో పౌలు యొక్క సాంస్కృతిక నేపథ్యములు అతని వేదాంతశాస్త్రమును రూపుదిద్దిన విధానమును మనము గుర్తించాము. పౌలు యొక్క అపొస్తలుల పరిచర్య తాను పత్రికలను వ్రాసిన క్రైస్తవ సంఘముల యొక్క ఆచరణాత్మక అవసరతలకు తన వేదాంతశాస్త్రమును అనువర్తించు విధముగా అతనిని పురికొల్పిన విధానములను మనము చూశాము. “ఇప్పుడు కాని ఇంకా రానిది”గా అంత్య దినములను గూర్చిన తన అభిప్రాయము, అనగా పౌలు యొక్క యుగాంతశాస్త్రము, అతడు నమ్మిన మరియు అతని పత్రికలలో వ్రాసిన ప్రతి విషయములో కనిపించు కేంద్ర వేదాంతశాస్త్ర దృక్పథములను ఎలా రూపొందించిందో మనము చూశాము.

పౌలు మరియు అతని వేదాంతశాస్త్రముపై ఈ దృక్కోణములు ఎంత కీలకమైనవో మాటలలో వర్ణించుట కూడా కష్టమవుతుంది. తన దినమున క్రైస్తవ సంఘమునకు క్రొత్త నిబంధనలోని అత్యంత ఫలబరితమైన రచయిత బోధించిన విషయముల యొక్క వాస్తవిక అర్థమును గ్రహించుటకు అవి మార్గములను తెరుస్తాయి. మన జీవితములకు అతని పవిత్రమైన మాటలను ఎలా అనువర్తించుకోవాలో కూడా అవి మనకు తెలియజేస్తాయి. పౌలు పత్రికలను మనము చదివిన ప్రతిసారి, అతని సాంస్కృతిక నేపథ్యమును, అతని అపొస్తలుల పరిచర్యను మరియు అంత్య దినములను గూర్చి అతడు కలిగియున్న కేంద్ర ఆలోచనలను మనము దృష్టిలో ఉంచుకోవాలి. అలా చేయుచుండగా, ఆదిమ సంఘమునకు పౌలు బోధించిన విషయములను గూర్చి మనము లోతైన అవగాహనను పొందుకొని, ప్రతి యుగములోని క్రీస్తు అనుచరులు పౌలు బోధలను ఎలా స్వీకరించాలో కూడా స్పష్టముగా చూడగలుగుతాము.