MAN-04 అనుగ్రహం యొక్క నిబంధన

1997లో స్థాపించబడిన థర్డ్ మిలీనియం మినిస్ట్రీస్ ఒక లాభాపేక్షలేని ఇవాంజెలికల్ క్రైస్తవ పరిచర్యగా లోకమునకు ఉచితముగా బైబిలు సంబంధమైన విద్యను అందించుటకు ప్రతిష్టింపబడింది.

బైబిలు విద్య. లోకము కొరకు. ఉచితముగా.

ప్రపంచవ్యాప్తముగా పరిచర్య కొరకు తగిన తర్ఫీదులేని కొన్ని వందల వేల మంది క్రైస్తవ నాయకులకు ఉచిత క్రైస్తవ విద్యను అందించుట మా లక్ష్యమైయున్నది. ఆంగ్లము, అరబిక్, మాండరిన్, రష్యన్, మరియు స్పానిష్ భాషలలో సాటిలేని మల్టీమీడియా సెమినారిని సిద్ధపరచి, విశ్వవ్యాప్తముగా పంచిపెట్టుట ద్వారా మేము ఈ లక్ష్యమును చేధించుచున్నాము. మా పరిచర్య భాగస్వాముల ద్వారా మా పాఠ్యాంశములు ఒక డజను కంటే ఎక్కువ భాషలలో ప్రస్తుతము అనువదించబడుచున్నాయి. ఈ పాఠ్యాంశములలో చిత్రములతో కూడిన వీడియోలు, ముద్రించబడిన ఉపదేశములు, మరియు ఇంటర్నెట్ వనరులు ఉన్నాయి. పాటశాలలు, సమూహములు, మరియు వ్యక్తులు ఆన్లైన్ లో మరియు అధ్యయనము చేయు సమాజములలో ఉపయోగించుటకు అనుగుణంగా ఇవి రూపొందించబడినవి.

అనేక సంవత్సరాలుగా, అవార్డులు సంపాదించిన అత్యుత్తమమైన విషయములు మరియు నాణ్యతగల మల్టీమీడియా పాఠములను ఉత్పత్తి చేయుటకు తగుమాత్రపు ఖర్చుతో కూడిన పద్ధతిని మేము అభివృద్ధి చేశాము. మా రచయితలు మరియు సంపాదకులు వేదాంతవిద్యలో తర్ఫీదు పొందిన విద్యావేత్తలు, మా అనువాదకులు వేదాంత ప్రావీణ్యతకలిగి తాము అనువదించు భాషలలో మాతృభాషా నైపుణ్యత కలిగియున్నవారు, మరియు మా పాఠములు లోకవ్యాప్తముగా అనేక సెమినారీలలో బోధించు వందలమంది గౌరవనీయులైన అధ్యాపకులు మరియు కాపరుల యొక్క మెళకువలను కలిగియున్నాయి. ఇంతేగాక, మా గ్రాఫిక్ డిజైనర్లు, ఉదాహరణలను ఇచ్చువారు, మరియు ప్రొడ్యుసర్లు అద్భుతమైన పరికరములను మరియు టెక్నిక్లను ఉపయోగించి ఉన్నతమైన ప్రమాణములతో పనిచేస్తారు.

మా డిస్ట్రిబ్యూషన్ లక్ష్యములను చేధించుటకు, సంఘములతో, సెమినారీలతో, బైబిల్ కళాశాలలతో, మిషనరీలతో, క్రైస్తవ బ్రాడ్కాస్టర్లతో, శాటిలైట్ టెలివిజన్ వారితో, మరియు ఇతర సంస్థలతో థర్డ్ మిలీనియం వ్యూహాత్మక భాగస్వామ్యములను కలిగియున్నది. ఈ భాగస్వామ్యములు ఇప్పటికే లెక్కలేనన్ని వీడియో పాఠములను స్థానిక నయాకులు, కాపరులు, మరియు సెమినరీ విద్యార్థులకు పంచుటకు కారణమైయ్యాయి. మా వెబ్సైటులు కూడా డిస్ట్రిబ్యూషన్ కు మాధ్యమాలుగా ఉండి, మా పాఠములతో పాటుగా సహాయకరముగా ఉండుటకు అదనపు వనరులను కూడా అందించుచున్నవి. ఉదాహరణకు, మీ సొంత అధ్యయన సమాజమును ఆరంభించుటను గూర్చిన వనరులు.

పంతొమ్మిదవ శతాబ్దములో ఛార్లెస్ డిక్కిన్స్ ఏ టేల్ ఆఫ్ టు సిటీస్ అను నవలను ప్రచురించాడు. కథ ముగింపులోని ఒక సందర్భములో, కథానాయకుడు చెరసాలలో బంధించబడి ఉరితీయబడుట కొరకు ఎదురుచూస్తున్నాడు. అయితే స్వతంత్రుడైన ఒక వ్యక్తి ఆ కథానయకుని యొక్క స్థానమును తీసుకొను ఒక రహస్య కార్యము ద్వారా అతడు తప్పించుకుంటాడు. బంధీ విడిపించబడ్డాడు, మరియు అతని స్థానమును తీసుకున్న ఒక స్వతంత్రుడు అతని స్థానములో మరణిస్తాడు. అనేక విధాలుగా, ఈ సందర్భము కృపా నిబంధనలో విశ్వాసుల అనుభవాలను పోలియున్నది. మానవాళి పాపములో పడిపోవుట మనందరి మరణ శిక్షకు కారణమైయ్యింది. అయితే కృపా నిబంధనలో, యేసు మన ప్రతినిధి మరియు మధ్యవర్తి అయ్యాడు. మరియు మనము చేయలేనిదానిని చేయుటకు ఆయన ఆ స్థానమును ఉపయోగించాడు. మన స్థానములో సిలువపై మరణించుట ద్వారా ఆయన మన మరణ శిక్షను తీసివేశాడు. మరియు ఆయన నీతి ద్వారా, ఆయన దేవుని నిబంధనా ఆశీర్వాదములను సాధించాడు, మరియు వాటిని మనతో పంచుకొనుచున్నాడు. కాబట్టి, మన పాపములో మనము మరణించుటకు బదులుగా, దేవుని కృప ద్వారా మనము క్రీస్తులో జీవిస్తున్నాము.

మనుష్యుడు ఏపాటివాడు? — వేదాంతశాస్త్ర మానవశాస్త్రమును విశదీకరించు పాఠ్యక్రమము — అను మన పాఠ్యక్రమములో ఇది నాల్గవ పాఠం. ఈ పాఠమునకు “కృపా నిబంధన” అని పేరు పెట్టాము, ఎందుకంటే మనము పాపములో పడిపోయిన తరువాత దేవుడు మానవాళితో స్థాపించిన కృపగల నిబంధన అనుబంధము మీద మనము దృష్టిపెడతాము.

ఆదియందు, ఆదాము ద్వారా దేవుడు మానవాళితో ఒక నిబంధన చేశాడు, మరియు దీనిని చాలాసార్లు “క్రియల నిబంధన” అని పిలుస్తారు. ఈ నిబంధన మానవాళికి జీవమునిచ్చియుండేది. అయితే ఆదాము ఈ నిబంధనలోని షరతులను ఉల్లంఘించాడు కాబట్టి, మన మానవ జాతియంతా పాపము యొక్క శాపమును అనుభవించింది. మన పాపపు స్థితిలో దేవుడు మనలను నిరీక్షణ లేకుండా విడిచిపెట్టనందుకు కృతజ్ఞతలు. బదులుగా, మానవాళితో తన అనుబంధమును శాసించుటకు ఆయన అదనపు వాగ్దానములను చేసి, వేదాంతవేత్తలు “కృపా నిబంధన” అని పిలచుదానిలో ఆ వాగ్దానములను భద్రపరిచాడు. వెస్ట్మినిస్టర్ కన్ఫెషన్ ఆఫ్ ఫెయిత్, 7వ అధ్యాయం, 3వ భాగం, కృపా నిబంధన యొక్క ఉద్దేశ్యమును ఈ విధంగా వర్ణిస్తుంది:

రెండవ [నిబంధన] చేయుటకు దేవుడు యిష్టపడ్డాడు, దీనిని సాధారణంగా కృపా నిబంధన అని పిలుస్తారు; దీనిలో ఆయన యేసు క్రీస్తు ద్వారా పాపులకు జీవమును మరియు రక్షణను ఉచితంగా ఇస్తాడు; మరియు వారు రక్షింపబడునట్లు, వారి నుండి విశ్వాసమును కోరతాడు.

ఈ నిబంధన కృపా నిబంధన అని “సాధారణంగా పిలువబడుతుంది” అని కన్ఫెషన్ చెప్పినప్పుడు, ఈ పదము బైబిలులో నుండిగాక వేదాంతవేత్తల యొద్ద నుండి వచ్చింది అని అర్థమైయున్నది. అయితే ఇది మనలను ఇబ్బందిపెట్టకూడదు, ఎందుకంటే “త్రిత్వము” వంటి అనేక ఇతర పదముల విషయములో కూడా ఇదే వాస్తవమైయున్నది. మరియు “కృపా నిబంధన” అను పదములో క్రోడీకరించబడిన ఆలోచనలు లేఖనములో బలముగా నాటబడినవైయున్నవి.

యేసు నందు రక్షింపబడు విశ్వాసము ఉన్నవారి విషయములో, కృపా నిబంధన ఆదాము పాపము వలన మనకు కలిగిన నష్టమును సరిచేస్తుంది. మరియు క్రీస్తులో దేవుని కరుణ ఆధారంగా క్షమాపణను మరియు విమోచనను ఇచ్చుట ద్వారా అది ఇలా చేస్తుంది.

కృపా నిబంధనను గూర్చిన మన పాఠం నాలుగు భాగములుగా విభాగించబడుతుంది. మొదటిగా, దేవుని నిత్య ఆలోచనలో దాని యొక్క నేపధ్యమును చూద్దాము. రెండవదిగా, దేవుని దైవకృతము దృష్ట్యా దాని యొక్క ఆరంభమును చూద్దాము. మూడవదిగా, దానిలోని మూలకాలను వర్ణించుదాము. మరియు నాల్గవదిగా, దాని యొక్క చారిత్రిక నిర్వహణను విశ్లేషిద్దాము. దేవుని నిత్య ఆలోచనతో ఆరంభిద్దాము

కృపా నిబంధన యొక్క మూలములు చరిత్ర కొరకు దేవుడు కలిగియున్న నిత్య ప్రణాళికలో నాటబడియున్నవి, మరియు దీనిని వేదాంతవేత్తలు “నిత్య ఆలోచన” లేక “నిత్య శాసనం” అని పిలుస్తారు. దేవుని నిత్య శాసన దృష్టికోణంలో, త్రిత్వములోని పురుషమూర్తుల మధ్య జరుగు ఒక ఏర్పాటులో నుండి కృపా నిబంధన వెలువడుతుంది.

దేవుడు లోకమును సృజించక ముందే, మానవాళి పాపములో పడుతుంది అని ఆయనకు తెలుసు. మరియు ఈ వాస్తవికత వెలుగులో, మనలను రక్షించు ప్రణాళికను ఆయన సిద్ధపరచాడు. మరియు ఈ ప్రణాళికలో త్రిత్వములోని ముగ్గురు పురుషమూర్తులు పాలుపంచుకున్నారు మరియు మన రక్షణలోని వేర్వేరు విషయములకు తమను తాము సమర్పించుకున్నారు. వారు కలిగియుండిన ఖచ్చితమైన సమర్పణలను గూర్చి ఇవాంజెలికల్ సంప్రదాయములు కొంత అసమ్మతిని వ్యక్తపరుస్తాయి. అయితే మన పక్షమున క్రీస్తు యొక్క మరణము ద్వారా పాపులను విమోచించుటకు దేవుడు ప్రణాళికను సిద్ధపరిచాడని అందరు ఒప్పుకుంటారు.

లోకము యొక్క ఆరంభము, సృష్టి ఆరంభములో దేవుడు మానవునితో ఏమి చెయ్యాలో నిర్ణయించాడు... కాబట్టి, తన సృష్టిలో యేసు క్రీస్తు కొరకు ప్రణాళికను యేర్పరచుట ఆయన తరువాత చేసిన ఆలోచన కాదు; ఉదాహరణకు, పాపము యొక్క సమస్యకు పరిష్కారమును ఇచ్చి ప్రజలను విమోచించుటకు వచ్చువాడు యేసే అని ముందుగానే నిర్ణయించబడింది... కాబట్టి మనము బైబిలులో ఏమి చదువుతామంటే, సర్పము యొక్క తలను చితకద్రొక్కు స్త్రీ సంతతిని ఆయన అప్పటికే విమోచించాడు, మరియు పాపమును చితకద్రొక్కువాడు ఆయనే. మరియు స్త్రీ సంతతి అనగా, మనము క్రిస్మస్ వృత్తాంతము ద్వారా ఎరిగియున్నట్లు ఆయన యేసు క్రీస్తు యొక్క జననమును సూచిస్తున్నాడు... ఇది నిత్యత్వము నుండి దేవుడు కలిగియుండిన ప్రణాళిక.

— ప్రొ. ముమో కిసౌ

ఈ పాఠంలో మన ఉద్దేశ్యముల కొరకు, మన విమోచనకు అనుసంధానముగా ఉన్న దేవుని నిత్య ఆలోచనలోని మూడు అంశములను మాత్రమే మనము పరిశీలన చేద్దాము. మొదటిగా, దేవుని ఆలోచన యొక్క సమయమును మనము చూద్దాము. రెండవదిగా, త్రిత్వములోని పురుషమూర్తులకు పురమాయించబడిన పాత్రలను మనము పరిగణిద్దాము. మూడవదిగా, కృపా నిబంధనలో దేవుని నిత్య ఆలోచన యొక్క నెరవేర్పు మీద దృష్టిపెడదాము. ఈ ఒప్పందం యొక్క సమయమును మొదట చూద్దాము.

భ్రష్టత్వము మరియు పాపము యొక్క పరిణామముల నుండి మానవాళిని విమోచించుటకు దేవుని ప్రణాళిక సర్వలోకమును సృజించుటకు ముందే నిర్ణయించబడింది. ఎఫెసీ. 3:11 వంటి చోట్ల దీని సమయము ప్రస్తావించబడింది, మరియు దేవుని “నిత్యసంకల్పము” చారిత్రికముగా యేసులో నెరవేర్చబడింది అని అక్కడ వ్రాయబడియున్నది. రక్షణ కొరకు “ఆదినుండి” మనము యేర్పరచబడియున్నామని 2 థెస్స. 2:13 సెలవిస్తుంది. “ఆనాదికాలములోనే” మనకు ఇవ్వబడిన కృపను గూర్చి 2 తిమోతి 1:9, 10 మాట్లాడుతుంది.

ఎఫెసీ. 1:3-6లో పౌలు వ్రాసిన మాటలను వినండి:

మన ప్రభువైన యేసుక్రీస్తుయొక్క తండ్రియగు దేవుడు... మనము తన యెదుట పరిశుద్ధులమును నిర్దోషులమునై యుండవలెనని జగత్తు పునాది వేయబడకమునుపే, ప్రేమచేత ఆయన క్రీస్తులో మనలను ఏర్పరచుకొనెను (ఎఫెసీ. 1:3-6).

ఇక్కడ, జగత్తుకు పునాది వేయబడకమునుపే మన విమోచన నిర్ణయించబడింది అని పౌలు చెబుతున్నాడు. మరియు ఎఫెసీ. 1:12లో మనము ఇలా చదువుతాము:

దేవుడు తన చిత్తప్రకారమైన సంకల్పమునుబట్టి మనలను ముందుగా నిర్ణయించి, ఆయన యందు స్వాస్థ్యముగా ఏర్పరచెను. ఆయన తన చిత్తానుసారముగా చేసిన నిర్ణయముచొప్పున సమస్తకార్యములను జరిగించుచున్నాడు (ఎఫెసీ. 1:12).

క్రొత్త నిబంధనలోని ఈ వాక్య భాగములో మరియు అనేక ఇతర వాక్యభాగాలలో, దేవుని రక్షణ శాసనం ప్రొరిజో అను గ్రీకు పదము ద్వారా సూచించబడింది. ఈ పదమును అత్యంత సాధారణంగా, “పూర్వనిర్థారణ” అని అనువదిస్తారు. ఈ నేపధ్యములో, దేవుని నిత్య రక్షణ శాసనం లోకము ఆరంభించబడక మునుపు నిర్ణయించబడింది లేక ముందుగా నిర్థారించబడింది అని దీని అర్థం. రోమా. 8:29, 30 మరియు ఎఫెసీ. 1:5 వంటి చోట్ల కూడా ప్రొరిజో అను పదము ఉపయోగించబడింది.

రక్షణను గూర్చి దేవుని యొక్క నిత్య ఆలోచనను పలు వేదాంతశాస్త్ర పరంపరలు పలు విధములుగా అర్థము చేసుకుంటాయి. దేవుడు కొంత మంది విశేషమైన ప్రజలను ఎన్నుకోలేదని, క్రీస్తును నమ్మిన ప్రతి ఒక్కరు రక్షణ పొందుతారని కొందరు ప్రకటిస్తారు. దేవుడు కాలమును ముందుగానే చూసి విశ్వసిస్తారని ఆయన చూసిన ప్రజలను ముందుగానే గుర్తించాడని ఇతరులు నమ్ముతారు. దేవుడు తన స్వచిత్తము చొప్పున కొందరు వ్యక్తులను ఏర్పరచుకున్నాడని, మరియు ఆయన వారిని ఎన్నుకొనుట వారు క్రీస్తునందు విశ్వాసముంచుతారు అనుటకు నిర్థారణగా ఉన్నదని ఇంకొందరు విశ్వసిస్తారు. అయితే పాపులను రక్షించుటకు దేవుడు తీసుకున్న నిర్ణయం జగత్తుకు పునాది వేయబడకముందు ఆయన యొక్క నిత్య ఆలోచనలో భాగమైయున్నదని మనమంతా ఒప్పుకుంటాము.

సమయము దృష్ట్యా దేవుని నిత్య ఆలోచనను మనము చూశాము కాబట్టి, త్రిత్వములోని సభ్యులు స్వీకరించిన పాత్రలను ఇప్పుడు చూద్దాము.

దేవుని నిత్య విమోచన ప్రణాళికలో త్రిత్వములోని ముగ్గురు పురుషమూర్తుల యొక్క కార్యము ఇమిడియున్నది. పతనమైన మానవులను పాపము యొక్క శాపము నుండి విమోచించాలను కోరికలో తండ్రి ఈ ఒప్పందమును ఆరంభించాడు. విశేషముగా, మనలను రక్షించుట దేవుని ప్రణాళిక అయ్యున్నది అని లేఖనము సెలవిస్తుంది. ఉదాహరణకు, ఎఫెసీ. 3:10-11లో పౌలు ఇలా బోధించాడు:

శోధింపశక్యము కాని క్రీస్తు ఐశ్వర్యమును అన్యజనులలో ప్రకటించుటకును, సమస్తమును సృష్టించిన దేవునియందు పూర్వకాలమునుండి మరుగైయున్న ఆ మర్మమును గూర్చిన యేర్పాటు ఎట్టిదో [దేవుడు] అందరికిని తేటపరచుటకును... (ఎఫెసీ. 3:10-11).

పౌలు ఆలోచన ప్రకారం, క్రీస్తు ద్వారా మన విమోచనను సాధించుట తండ్రి యొక్క నిత్య సంకల్పమైయున్నది. ఎఫెసీ. 1:4; 2 థెస్స. 2:13; మరియు 1 పేతురు 1:20లో మనము ఇదే విషయమును చూస్తాము.

తదనుగుణంగా, పాపుల కొరకు మరణించుటకు, తన పరిపూర్ణమైన దైవిక స్వభావమునకు పరిపూర్ణమైన మానవ స్వభావమును జతకలుపుటకు కుమారుడు అంగీకరించాడు. ఇందుమూలముగానే, అనాదికాలములో మనము కుమారుని యొక్క కృపను పొందుకున్నామని 2 తిమోతి 1:9లో పౌలు చెబుతాడు. ఇలాంటి మాటలనే మనము యోహాను 17:4, 5లో కూడా చూస్తాము.

దేవుని నిత్య ఆలోచన తండ్రికి మరియు కుమారునికి బాధ్యతలను నిర్ణయించిన విధముగానే, అది పరిశుద్ధాత్మ యొక్క బాధ్యతను కూడా నిర్థారించింది. కుమారుని కార్యమును పురికొల్పుటకు మరియు బలపరచుటకు, కుమారుడు విమోచించినవారికి రక్షణను అనువర్తించుటకు పరిశుద్ధాత్మ అంగీకరించాడు. 2 థెస్స. 2:13లో పౌలు వ్రాసిన మాటలను వినండి:

ప్రభువువలన ప్రేమింపబడిన సహోదరులారా, ఆత్మ మిమ్మును పరిశుద్ధపరచుటవలనను, మీరు సత్యమును నమ్ముటవలనను, రక్షణపొందుటకు దేవుడు ఆదినుండి మిమ్మును ఏర్పరచుకొనెను గనుక మేము మిమ్మునుబట్టి యెల్లప్పుడును దేవునికి కృతజ్ఞతాస్తుతులు చెల్లింప బద్ధులమైయున్నాము (2 థెస్స. 2:13).

ఈ వాక్యభాగములో, తండ్రి చేసిన ఎంపిక ఆదినుండి, అనగా సృష్టికి ముందు నుండి జరిగింది అని పౌలు సూచించాడు. మరియు ఆ ప్రణాళికలో మనకు రక్షణను అనువర్తించు పవిత్రపరచు కార్యమును చేయుటకు పరిశుద్ధాత్మ చేసిన ఒప్పందం కూడా ఇమిడియున్నది. అంతేగాక, ఇక్కడ “ప్రభువు” అను పదము యేసును సూచిస్తున్నట్లు ఉంది, కాబట్టి త్రిత్వములోని ముగ్గురు పురుషమూర్తులు ఇక్కడ ప్రస్తావించబడ్డారు.

త్రిత్వములోని ముగ్గురు పురుషమూర్తులు, తండ్రి మరియు కుమారుడు మరియు పరిశుద్ధాత్మ, మన రక్షణలో పాలుపంచుకున్నారు మరియు పాలుపంచుకుంటున్నారు. నిత్యత్వము నుండి తండ్రి మన రక్షణకు ప్రణాళికను సిద్ధపరచాడు, మనము ఏమైయున్నను తన ప్రజలగా ఎన్నుకున్నాడు, కృపలో మనలను ఎన్నుకున్నాడు, క్రీస్తులో మనలను ఎన్నుకున్నాడు, మరియు కుమారుడు మనలను విమోచించుటకు వచ్చుటకుగాను కుమారునితో నిబంధన చేశాడు. ఆయన మనలను తన కుమారునికి ఇచ్చాడు, యోహాను 17లో యేసు ప్రార్థించుచున్నట్లు, అనాదికాలములో — సృష్టి ఆరంభించబడక ముందు — తండ్రి మనలను ఆయనకు ఇచ్చాడు. మరియు కుమారుడు వచ్చాడు, మన మానవ స్వభావమును తీసుకున్నాడు, మనము ప్రమాణము చేసి నెరవేర్చుటకు విఫలమైన విధేయతను చూపాడు, తనను తాను బలిగా అర్పించుకున్నాడు, మరియు తిరిగిలేచాడు. కాబట్టి, మన విమోచనను సాధించువానిగా ఆయన వచ్చాడు. తండ్రి ప్రణాళికకర్త, ఆలోచనకర్త, కుమారుని ఇచ్చినవాడు. కుమారుడు మన రక్షణను సాధించినవాడు, మరియు పరిశుద్ధాత్ముడు మన రక్షణను అనువర్తించువాడు మన రాతి గుండెలను జీవింపజేసి, దేవుని వాక్యమును స్వీకరించునట్లు మృదువుగా చేయువాడు ఆయనే, మరియు క్రీస్తును నమ్ముటకు మరియు విశ్వసించుటకు మనకు సామర్థ్యమునిచ్చి క్రీస్తుతో బలముగా ఐక్యపరుస్తాడు.

— డా. డెన్నిస్ ఈ. జాన్సన్

దేవుని నిత్య ఆలోచనను సమయము మరియు త్రిత్వములోని పురుషమూర్తుల దృష్ట్యా చూశాము కాబట్టి, కృపా నిబంధనలో ఈ ఆలోచన యొక్క నెరవేర్పును చూద్దాము.

దేవుని నిత్య ఆలోచన చరిత్రలో జరుగు కార్యములను గూర్చి ఆయన ప్రణాళిక అయ్యున్నది. మరియు కృపా నిబంధన ఆ ప్రణాళికలోని ఒక భాగమును నెరవేర్చుతుంది. మానవాళి పాపములోనికి పడిపోతుంది అని త్రిత్వములోని పురుషమూర్తులకు ఎల్లప్పుడు తెలుసు. మరియు క్రీస్తు జీవితము, మరణము, సమాధి, పునరుత్థానము మరియు ఆరోహణము ద్వారా మానవులను విమోచించాలని వారు ఎల్లప్పుడు ఉద్దేశించారు. వారు తమ నిత్య ఆలోచనలో ఈ విషయములు శాసించారు. మరియు కృపా నిబంధన ద్వారా వారు వాటిని చరిత్రలో అనువర్తించారు.

ఉదాహరణకు, క్రీస్తులో మన విమోచనను తండ్రి నిత్యత్వములో శాసించాడు అని చూడండి. తరువాత తమ బాధ్యతను నెరవేర్చుటకు కుమారుని మరియు ఆత్మను పంపుట ద్వారా కృపా నిబంధనలో ఆయన ఈ శాసనమును నెరవేర్చాడు. తన విమోచనా కార్యమునకు అవసరమైన మెస్సీయ లేక క్రీస్తు అను స్థానమునలో ఆయన కుమారుని నియమించాడు. అపొ. 2:36లో పేతురు యూదులకు ఇలా సెలవిచ్చాడు:

మీరు సిలువవేసిన యీ యేసునే దేవుడు ప్రభువుగాను క్రీస్తుగాను నియమించెను (అపొ. 2:36).

యోహాను 5:36లో స్వయంగా యేసు ఇలా సెలవిచ్చాడు:

నేను నెరవేర్చుటకై తండ్రి యే క్రియలను నా కిచ్చియున్నాడో, నేను చేయుచున్న ఆ క్రియలే తండ్రి నన్ను పంపియున్నాడని నన్నుగూర్చి సాక్ష్యమిచ్చుచున్నవి (యోహాను 5:36).

యోహాను 6:38లో, యేసు ఇలా జోడించాడు:

నా యిష్టము నెరవేర్చుకొనుటకు నేను రాలేదు; నన్ను పంపిన వాని చిత్తము నెరవేర్చుటకే పరలోకము నుండి దిగి వచ్చితిని (యోహాను 6:38).

స్పష్టముగా, కుమారుడైన దేవుడైన యేసు క్రీస్తు తన రక్షణ కార్యమును నెరవేర్చుటకు వచ్చినప్పుడు, ఆయన తండ్రి ప్రణాళికను నెరవేర్చుచుండెను. యోహాను 3:34లో మనము నేర్చుకొనునట్లు తండ్రి కుమారునికి తన బలమైన ఆత్మను కూడా హద్దులు లేకుండా ఇచ్చాడు. మరియు హెబ్రీ. 10:5లో నమోదు చేయబడినట్లు, కుమారుని యొక్క పరిపూర్ణ మానవ స్వభావమును ఆయన సిద్ధపరచాడు.

తన బాధ్యతగా, కుమారుడైన దేవుడు మానవాళిని విమోచించుటకు ఆయన నిత్య ఒప్పందమును నెరవేర్చాడు. ఆయన తన దైవిక మహిమను కప్పిపుచ్చి, ఆయన సంపూర్ణ దైవిక స్వభావమునకు సంపూర్ణ మానవ స్వభావమును జతపరచాడు, పూర్ణమైన జీవితమును జీవించాడు, మరియు ప్రాయశ్చిత్త మరణమును పొందాడు. ఫిలిప్పీ. 2:5-8లో పౌలు ఇచ్చిన వివరణను వినండి:

క్రీస్తుయేసు . . . దేవుని స్వరూపము కలిగినవాడైయుండి, దేవునితో సమానముగా ఉండుట విడిచిపెట్టకూడని భాగ్యమని యెంచుకొనలేదు గాని మనుష్యుల పోలికగా పుట్టి, దాసుని స్వరూపమును ధరించుకొని, తన్ను తానే రిక్తునిగా చేసికొనెను. మరియు, ఆయన ఆకారమందు మనుష్యుడుగా కనబడి, మరణము పొందునంతగా, అనగా సిలువమరణము పొందునంతగా విధేయత చూపినవాడై, తన్నుతాను తగ్గించుకొనెను (ఫిలిప్పీ. 2:5-8)

మన పాపముల నుండి మనలను రక్షించుటకు సిలువ మీద మరణించు విశేషమైన ఉద్దేశము కొరకు యేసు నరావతారిగా వచ్చాడు. దేవుని నిత్య ఆలోచనను నెరవేర్చుటకు పతనమైన మానవులకు ఆయన కృపను అనుగ్రహించాడని 2 తిమోతి 1:9, 10 సూచిస్తుంది. హెబ్రీ. 2:13-17 దీనిని ఎలా వర్ణిస్తుందో వినండి:

[యేసు] “ఇదిగో నేనును దేవుడు నాకిచ్చిన పిల్లలును అనియు చెప్పుచున్నాడు.” కాబట్టి ఆ పిల్లలు రక్తమాంసములు గలవారైనందున, ఆ ప్రకారమే ఆయనకూడ రక్తమాంసములలో పాలివాడాయెను... కావున ప్రజల పాపములకు పరిహారము కలుగజేయుటకై... (హెబ్రీ 2:13-17).

ఇక్కడ, వారి నిత్య ఆలోచన చొప్పున, తండ్రి ఆయనకిచ్చిన ప్రజల యొక్క ప్రాయశ్చిత్తము కొరకు మరణించుటకు కుమారుడు వచ్చాడు అను అర్థమునిచ్చునట్లు రచయిత యెషయా 8:18ని అనువదించాడు. రోమా. 8:3, 4 మరియు గలతీ. 4:4, 5లో మనము ఇలాంటి కథనములనే చూస్తాము.

మరియు దేవుని నిత్య ఆలోచనలో పరిశుద్ధాత్మ తన బాధ్యతను కూడా నేరవేర్చుతాడు. మత్తయి 1:20 మరియు లూకా 1:34, 35లో నివేదించబడినట్లు, కుమారుని యొక్క మానవ స్వభావమును అతని తల్లియైన మరియ గర్భములో ఉంచుట ద్వారా ఆయన కుమారుని నరావతారమును మరియు మిగిలిన కార్యములను పురికొల్పాడు మరియు బలపరచాడు. హెబ్రీ. 9:14లో తెలియజేయబడినట్లు, సిలువ మీద క్రీస్తు మరణమును కూడా పరిశుద్ధాత్మ సాధికారం చేశాడు. మరియు రోమా. 8:11లో పౌలు బోధించినట్లు, ఆయన క్రీస్తు పునరుత్థానములో కూడా ముఖ్య భూమికను పోషించాడు.

అంతేగాక, మనకు రక్షణను అనువర్తించుటకు చేయబడిన ఒప్పందమును కూడా పరిశుద్ధాత్మ తరచుగా నెరవేర్చుతాడు. యోహాను 3:5-8, మరియు తీతు 3:5-7లో మనము చూచునట్లు, ఆయన మన ఆత్మలను పునరుత్తేజపరుస్తాడు. రోమా. 7:6లో మనము నేర్చుకొనునట్లు, పాపమును ఎదురించు శక్తిని ఆయన మనకిస్తాడు. 1 కొరింథీ. 12:11 సెలవిచ్చుచున్నట్లు, మన రక్షణలో భాగమైన ఆత్మీయ వరములను ఆయన మనకిస్తాడు. మరియు ఎఫెసీ. 1:13, 14 బోధించుచున్నట్లు ఆయన మన రక్షణను భద్రపరుస్తాడు. ఆయన ఈ లోకములో కుమారుని యొక్క రక్షణ కార్యమును పురికొల్పు, బలపరచు మరియు అనువర్తించు త్రిత్వములోని పురుషమూర్తి అయ్యున్నాడని మనము ఆత్మ కార్యమును క్రోడీకరించవచ్చు. దేవుని శక్తి కనుపరచబడిన ప్రతిసారి, మరియు రక్షణ నెరవేర్చబడిన ప్రతిసారి, మన విమోచన విషయములో పరిశుద్ధాత్మ దేవుని యొక్క నిత్య ఆలోచనను నెరవేర్చుచున్నాడు.

మన విమోచన విషయములో దేవుని యొక్క నిత్య ఆలోచన విశ్వాసులకు గొప్ప ఆదరణ కలిగించునదిగా ఉండాలి. యేసు క్రీస్తు యొక్క హత్యతో సహా చరిత్రలో మనము చూచు విషాదములను పరిష్కరించుటకు దేవుడు సంఘర్షించడని అది మనకు జ్ఞాపకము చేస్తుంది. అవి ఆయన సృష్టించు పరిష్కారముల యొక్క అవసరత కలిగియున్న ముందుగా ఊహించని సమస్యలు కాదు. బదులుగా, ఆయన ఉన్నతమైన విమోచన ఉద్దేశ్యములను సాధించుటకు అవి ఆయన రూపించిన ఆటంకములు కాబట్టి, జీవితములో మనకు ఏమి సంభవించినా — అనేక ఘోరమైన విషయములు జరుగుతున్నాయి మరియు జరుగుతాయి కూడా — దేవుడు ఒక ప్రణాళిక కలిగియున్నాడు. మరియు ఆ ప్రణాళిక తప్పిపోకుండా కృపా నిబంధన ద్వారా విశ్వాసులను రక్షణ మరియు మహిమలోనికి నడిపిస్తుంది.

దేవుని నిత్య ఆలోచనలో కృపా నిబంధన యొక్క నేపథ్యమును ఇప్పటి వరకు మనము చూశాము కాబట్టి, దేవుని దైవకృతము దృష్ట్యా దాని యొక్క ఆరంభమును చూద్దాము.

జగత్తుకు పునాది వేయబడక ముందు నిర్ణయించబడిన దేవుని నిత్య ఆలోచనకు వ్యత్యాసముగా, దైవకృతము చరిత్రలో దేవుడు సృష్టిని భద్రపరచుట మరియు పాలించుట అయ్యున్నది. ఇది సర్వలోకముతో, విశేషముగా ఆయన సృష్టములు మరియు వారి క్రియలతో ఆయన చేసిన పాలుపంపులకు సంబంధించినదైయున్నది. కాబట్టి, దేవుడిచ్చిన రక్షణ మానవాళి యొక్క పాపమునకు స్పందనగా ఉన్నదని మనము ఆలోచన చేసినప్పుడు, దైవకృతము దృష్ట్యా మనము కృపా నిబంధనను చూచుచున్నాము.

రెండు ఆలోచనలను చూచుట ద్వారా దైవకృతము దృష్ట్యా కృపా నిబంధనను మనము వివరిద్దాము. మొదటిగా, మానవ పాపము కృపా నిబంధన యొక్క అవసరతకు కారణము ఎలా అయినదో చూద్దాము. రెండవదిగా, కృపా నిబంధనలో మధ్యవర్తిగా క్రీస్తు యొక్క పాత్రను చూద్దాము. ముందుగా మన పాపము కృపా నిబంధనకు ఎలా కారణమైనదో చూద్దాము.

చారిత్రికముగా, ఆది. 1:26-28లో ఇవ్వబడిన సాంస్కృతిక ఆజ్ఞను నెరవేర్చుటకు మానవుల సామర్థ్యమును పునరుద్ధరించుటకు కృపా నిబంధన అవసరమైయుండెను. ఇంతకు ముందు పాఠంలో మనము చూసినట్లు, మంచి చెడ్డల తెలివినిచ్చు వృక్ష ఫలమును తినుట ద్వారా ఆదాము హవ్వలు దేవుని నిబంధనలోని షరతులను ఉల్లంఘించారు. మరియు మానవాళిని శపిస్తూ దేవుడు స్పందించాడు. ఇది మన అస్తిత్వముల భ్రష్టత్వమునకు, దేవుని నుండి మరియు ఇతర ప్రజల నుండి దూరమగుటకు, భౌతిక మరియు ఆత్మీయ మరణమునకు కారణమైయ్యింది.

మానవులు న్యాయముగానే దేవుని శాపములకు యోగ్యులైయుండిరి. అయితే ఆ శాపములు సమస్యను సృష్టించాయి; ఆయన మహిమను ప్రతిబింబించు స్వరూపములుగా దేవుడు మానవాళిని సృజించాడు కదా, మరియు నాయకులుగా వారు ఆయన పరలోక రాజ్యమును భూమియందంతటా వ్యాపింపజేయవలసియుండెను. మన పతనమైన స్థితిలో, ఆయనకు నచ్చిన విధంగా మనము ఏ పనులను చేయలేము. మన భ్రష్టత్వము మనలను ఆయనను సంతోషపరచలేకుండా, మరియు ఆయనను సంతోషపరచుటకు ఇష్టపడలేకుండా చేసింది. మన ఎడబాటు మనలను ఆయన సన్నిధి నుండి దూరముగా ఉంచింది, మరియు లోకమంతటా మానవ సంస్కృతిని నిర్మించుటకు సహకరించకుండా మనలను చేసింది. మరియు మరణము మనలను ఆయన రాజ్యములోని దీవెనలను ఆస్వాదించకుండా చేసింది.

అయితే మన దౌర్భాగ్య పరిస్థితిలో దేవుడు మనలను నిరీక్షణలేకుండా విడిచిపెట్టలేదు. ఈ భయంకరమైన సమస్యల మధ్యలో, మనలను విమోచించుట దేవుడిచ్చిన పరిష్కారమైయున్నది. ఆయన ఆదాము హవ్వలకు తన నిబంధన తీర్పును ఇవ్వకుండా మానలేదు. అయితే వారు అక్కడికక్కడే మరణించకుండా దేవుడు దానిని ఆలస్యం చేశాడు. అంతేగాక, వారిని కృపతో విమోచించుటకు ఆయన ప్రతిపాదించాడు. దేవుడు సర్పమును శపించుటలో ఈ విమోచన ప్రతిపాదన కనిపిస్తుంది. ఆది. 3:15లో, దేవుడు సర్పముతో ఇలా పలికాడు:

మరియు నీకును స్త్రీకిని నీ సంతానమునకును ఆమె సంతానమునకును వైరము కలుగజేసెదను. అది నిన్ను తలమీద కొట్టును; నీవు దానిని మడిమె మీద కొట్టుదువని చెప్పెను (ఆది. 3:15).

నిబంధన తీర్పును ఇచ్చుటలో, హవ్వ యొక్క మానవ వారసుడు తుదకు సర్పము యొక్క తలను చితకద్రొక్కుతాడని దేవుడు వాగ్దానము చేశాడు. ప్రకటన 12:9 ఈ సర్పమును సాతానుగా గుర్తిస్తుంది. కాబట్టి, ఒక మానవుడు తుదకు సాతాను యొక్క పాపభరితమైన రాజ్యమును జయిస్తాడని ఆదికాండములోని వాగ్దానము ఒక విధంగా దేవుడు చేసిన ప్రవచనమైయున్నది. ఆ వ్యక్తి మానవాళిని విమోచించి పాపము యొక్క బానిసత్వము మరియు శిక్షావిధి నుండి వారిని రక్షిస్తాడు. వేదాంతవేత్తలు ఈ ప్రకటనను ల్యాటిన్ భాష పదమైన ప్రోటోఇవాంగేలియమ్, లేక గ్రీకు పదమైన ప్రోటో-ఇవాంగెలియోన్ అను పదములతో సూచిస్తారు, “మొదటి సువార్త” అని ఈ రెండిటి యొక్క అర్థమైయున్నది. మరియు ఈ మొదటి సువార్త చారిత్రిక కృపా నిబంధనకు ఆరంభముగా ఉన్నది.

1873 నుండి 1957 మధ్య కాలములో నివసించిన లూయిస్ బెర్కాఫ్, ఈ నిబంధన యొక్క కృపా స్వభావమును తన రచనయైన సిస్టమాటిక్ థియోలాజి, 2వ భాగము, 3వ విభాగము, 3వ అధ్యాయములో ఈ విధంగా వివరించాడు. అతడు చెప్పిన మాటలను వినండి:

ఈ నిబంధనను కృపా నిబంధన అని పిలువవచ్చు, ఎందుకంటే దానిలో దేవుడు మన బాధ్యతలను నెరవేర్చుటకు నిశ్చయతను ఇస్తాడు; ఎందుకంటే, న్యాయము యొక్క షరతులను తీర్చు ఆయన కుమారుని యొక్క వ్యక్తిత్వములో ఆయన స్వయంగా నిశ్చయతను అనుగ్రహిస్తాడు కాబట్టి; మరియు ఆయన కృప ద్వారా, పరిశుద్ధాత్మ యొక్క ప్రత్యక్షత ద్వారా, ఆయన నిబంధన బాధ్యతలకు అనుగుణంగా నివసించునట్లు మానవులకు ఆయన బలమునిస్తాడు కాబట్టి. నిబంధన దేవుని కృపలో ఆరంభమవుతుంది, దేవుని కృప యొక్క మంచితనములో అమలు చేయబడింది, మరియు దేవుని కృప ద్వారా పాపుల యొక్క జీవితాలలో నెరవేర్చబడింది. పాపికి ఆరంభము నుండి ముగింపు వరకు కృపయే అయ్యున్నది.

ఆదాముతో చేసిన ఆరంభ నిబంధనలో, మానవుల ఆశీర్వాదములు మరియు శాపములు పరిపూర్ణముగా మన క్రియల మీద ఆధారపడియుండేవి. మనము విధేయులమైతే, దీవించబడేవారము; అవిధేయులమైతే, శపించబడేవారము. ఇందుమూలముగానే, మానవాళితో దేవుడు చేసిన మొదటి నిబంధనను “క్రియల నిబంధన” అని పిలుస్తారు. అయితే కృపా నిబంధన భిన్నముగా ఉన్నది. అది మన కార్యముల మీద ఆధారపడుటకు బదులుగా, యేసు చేసిన కార్యముల మీద ఆధారపడుతుంది. మన పక్షమున ఆయన దేవుని నిబంధనలోని షరతులను నెరవేర్చుతాడు. తరువాత ఆయన నిబంధన ఆశీర్వాదములను తాను రక్షించిన ప్రజలకు కృపతో పంచుతాడు.

మన వేదంతశాస్త్రములో, కొన్నిసార్లు మనము పతనమునకు ముందు దేవుడు ఆదాముతో చేసిన క్రియల నిబంధనను గూర్చి, మరియు యేసు క్రీస్తులో గొప్ప రక్షణను మనకు ఇచ్చుటకు పతనము తరువాత పాపులైన మానవులతో దేవుడు చేసిన కృపా నిబంధనను గూర్చి మాట్లాడతాము. ఈ రెండు నిబంధనల మధ్య వ్యత్యాసమును చూపుట చాలా ప్రాముఖ్యమైయున్నది. ఈ రెండు నిబంధనలలో వేర్వేరు విషయములు జరుగుచున్నాయి, అయినను కొన్ని ప్రాముఖ్యమైన కర్బన సంబంధమైన మార్గాలలో ఇవి అనుబంధం కలిగి కూడా ఉన్నాయి. వీటి మధ్య ఉన్న వ్యత్యాసములను అర్థము చేసుకొనుటకు, “క్రియలు” మరియు “కృప” అను పదముల మీద దృష్టి పెట్టుట అత్యంత ప్రాముఖ్యమైన విషయము అని నా ఆలోచన... క్రియల నిబంధన ధర్మశాస్త్ర్రమునకు సంబంధించినది అని, కృపా నిబంధన మనకు సువార్తను ప్రకటిస్తుంది అని మనము చెప్పవచ్చు. ఇలా చెప్పిన తరువాత కూడా, వాటి మధ్య ఉన్న అనుబంధమును చూచుట చాలా అవసరమైయున్నది, ఎందుకంటే మన పతనము తరువాత దేవుడు క్రియల నిబంధనను పూర్తిగా రద్దు చేశాడని ఇక్కడ అర్థము కాదు. “సరే, పాపము అంత పెద్ద విషయము ఏమి కాదు,” లేక “నా ధర్మశాస్త్రమును పాటించుట అంత ముఖ్యమైన విషయం ఏమి కాదు,” అని దేవుడు చెప్పలేదు. కృపా నిబంధన సువార్తలోని ఒక భాగము ఏమిటంటే, క్రీస్తు వాస్తవానికి వచ్చాడు మరియు దేవుని ధర్మశాస్త్రమును నెరవేర్చాడు. క్రియల నిబంధన కోరు ప్రతిదానిని క్రీస్తు చేశాడు. దేవుని ధర్మశాస్త్రమును ఆయన పరిపూర్ణముగా నెరవేర్చాడు మరియు ధర్మశాస్త్రమునకు అవిధేయత చూపుట వలన కలిగిన శిక్షను ఆయన అనుభవించాడు. కాబట్టి, కృపా నిబంధనలో మనము క్రీస్తు వైపుకు చూచుచుండగా, మనము ఆయన యొద్దకు పరుగిడుచున్నాము మరియు మానవాళి నెరవేర్చుట కొరకు దేవుడు ఉద్దేశించిన కార్యములన్నిటిని వాస్తవముగా నెరవేర్చిన ఆయనను నమ్ముచున్నాము.

— డా. డేవిడ్ వాన్ డ్రునెన్

దైవకృతము దృష్ట్యా, మానవాళి పాపము చేసినప్పుడు దేవుడు వారిని సంపూర్ణముగా శిక్షించియుండవచ్చు. అయితే మనము ఇంతకు ముందు చూసినట్లు, అలా చేయుట ద్వారా ఆయన మన కొరకు కలిగియుండిన ఉద్దేశ్యములు నెరవేర్చబడేవి కాదు. దురదృష్టవశాత్తు, క్రియల నిబంధన, నిబంధన అవిధేయతను క్షమించుటకు మార్గమును ఇవ్వలేదు. అంతేగాక, నిబంధన అనునది ఒక పవిత్రమైన ఒడంబడిక కాబట్టి, దేవుడు క్రియల నిబంధనను అలక్ష్యము చేయలేకపోయాడు. మరియు దేవుడు తన ఒడంబడికలను ఉల్లంఘించువాడు కాడు.

కాబట్టి, ఈ సమస్యకు పరిష్కారముగా దేవుడు కృపా నిబంధనను అనుగ్రహించాడు. కృపా నిబంధన క్రియల నిబంధన యొక్క పొడిగింపు మరియు కొనసాగింపు అయ్యున్నది అని మనము చెప్పవచ్చు. కృపా నిబంధనలో దేవుని దైవకృతము, మానవ స్వామిభక్తి యొక్క అవసరత, మరియు పరిణామాలతో సహా క్రియల నిబంధనలో ఉన్న షరతులు అన్ని ఉన్నాయి. ఈ విధంగా, అది క్రియల నిబంధనను భద్రపరుస్తుంది. అయితే అది అదనపు దైవిక దైవకృతమును, మానవ స్వామిభక్తి కొరకు అదనపు అవసరతలను, మరియు అదనపు పరిణామాలను పరిచయం చేస్తుంది. మరియు ఈ అదనపు విషయములు మన విమోచన కొరకు మార్గమును అందిస్తాయి.

మానవ పాపమునకు స్పందనగా దైవిక దైవకృతమునకు కృపా నిబంధన అవసరమైయుండెను అని చూశాము కాబట్టి, నిబంధన యొక్క మధ్యవర్తిగా క్రీస్తు యొక్క పాత్ర మీద ఇప్పుడు దృష్టిపెడదాము.

క్రియల నిబంధన నిబంధనలు చేసుకున్న ఇరు పక్షముల మధ్య ఒక సులువైన అనుబంధముతో ఒక ప్రభువు-సామంత ఒప్పందమును ప్రతిబింబించింది. దేవుడు ప్రభువు, మరియు మానవాళి సామంత. మరియు దేవుని సామంత ప్రజలకు శిరస్సుగా లేక ప్రతినిధిగా ఆదాము సేవించాడు.

కృపా నిబంధనలో, ఇవే పక్షములు తమ స్థానములను మరలా తీసుకున్నాయి. దేవుడు ప్రభువైయున్నాడు, మరియు మానవాళి సామంతగా ఉండినది, మరియు కనీసం ఆరంభములోనైనా, ఆదాము మానవాళి యొక్క శిరస్సుగాను లేక ప్రతినిధిగాను ఉన్నాడు. ఈ పక్షములతో పాటుగా, త్రిత్వములోని రెండవ పురుషమూర్తి అయిన కుమారుడైన దేవుడు మధ్యవర్తిగా నిబంధనలో చేరాడు. మధ్యవర్తిగా, కుమారుడు దేవుని నిబంధనా ప్రజల కొరకు విజ్ఞాపన చేస్తాడు. మన పాపముల యొక్క నిందను మరియు శిక్షను తన మీద వేసుకొని ఆయన మనలను దేవునితో సమాధానపరుస్తాడు. మన పక్షమున నిబంధనా శాపములను అనుభవించుట ద్వారా ఆయన నిబంధన యొక్క నిజాయితీని, మరియు తన ప్రజల యొక్క జీవితాలను భద్రపరుస్తాడు. అదే విధముగా, మానవ స్వామిభక్తి విషయములో నిబంధన కలిగియున్న అర్హతలకు విధేయత చూపుట ద్వారా, కుమారుడు తన కొరకు కూడా నిబంధన వాగ్దానములను సంపాదిస్తాడు. తరువాత వాటిని తాను విమోచించు పాపులతో పంచుకుంటాడు.

తాను రచించిన సిస్టమాటిక్ థియోలాజి, 2వ భాగము, 3వ విభాగము, 3వ అధ్యాయములో నిబంధనా “నిశ్చయత”ను గూర్చి మాట్లాడినప్పుడు మధ్యవర్తిగా కుమారుని యొక్క బాధ్యత లూయిస్ బెర్కాఫ్ యొక్క మనస్సులో ఉండెను. ఆయన వివరణలోని ఈ భాగమును మరొకసారి వినండి:

ఈ నిబంధనను కృపా నిబంధన అని పిలువవచ్చు, ఎందుకంటే దానిలో దేవుడు మన బాధ్యతలను నెరవేర్చుటకు నిశ్చయతను ఇస్తాడు; ఎందుకంటే, కుమారుని యొక్క వ్యక్తిత్వములో ఆయన స్వయంగా నిశ్చయతను అనుగ్రహిస్తాడు.

దేవుడు ఆదాము హవ్వలకు మొదటిగా విమోచనను ప్రతిపాదించినప్పుడు ఏదెను తోటలో మొదటిసారి చేయబడిన కృపా నిబంధనకు కుమారుడు మధ్యవర్తిగా ఉన్నాడు. ఆ దినము నుండి ఆయన మధ్యవర్తిత్వం చేయుట కొనసాగిస్తున్నాడు. పాత నిబంధన యుగమంతటిలో, ఆయన చేసిన మధ్యవర్తిత్వం పాత నిబంధన పరిశుద్ధులకు క్షమాపణను, రక్షణను అనుగ్రహించింది, ఇదంతా వాగ్దానము చేయబడిన ఆయన భవిష్యత్ కార్యముల ఆధారంగా జరిగింది. ఏ ఒక్కరు కూడా అతని లేక ఆమె సొంత యోగ్యత లేక అర్హత ద్వారా ఎన్నడును రక్షించబడలేదు, ఎందుకంటే ఏ విధమైన విధేయతా కార్యములు కూడా పాపమును తుడిచివేయలేవు. మరియు జంతువులను బలి అర్పించుట ద్వారా కూడా ఏ ఒక్కరు ఎన్నడును రక్షింపబడలేదు, ఎందుకంటే ఏ ఒక్క పశువు యొక్క మరణము కూడా మానవుల కొరకు సరియైన ప్రత్యామ్నాయం కాలేదు. హెబ్రీ పత్రిక రచయిత హెబ్రీ. 10:11లో దీనిని గూర్చి ఈ విధముగా చెబుతాడు:

మరియు ప్రతి యాజకుడు దినదినము సేవచేయుచు, పాపములను ఎన్నటికిని తీసివేయలేని ఆ బలులనే మాటిమాటికి అర్పించుచు ఉండును (హెబ్రీ. 10:11).

కొలస్సీ. 2:17లో పౌలు వివరించినట్లు:

ఇవి రాబోవువాటి ఛాయయేగాని నిజ స్వరూపము క్రీస్తులో ఉన్నది (కొలస్సీ. 2:17).

మనము క్రీస్తు యొక్క చారిత్రిక కార్యము ద్వారా రక్షించబడితిమి అని గ్రహించిన ప్రతిసారి, వెంటనే మనము అడిగే ప్రశ్న ఏమిటంటే, పాత నిబంధన పరిశుద్ధులకు ఏమి జరిగింది? వారు రక్షింపబడితిరా? అది అప్పటికి జరుగకపోయినను వారు క్రీస్తు యొక్క కార్యము ద్వారా రక్షింపబడితిరా? లేక దేవుడు ఆ కాలములో వేరొక రకమైన నియమములను ఉపయోగించాడా? వారు తమ విశ్వాసము ద్వారా, దేవుడు వారికి చేసిన వాగ్దానముల మీద విశ్వాసము ద్వారా రక్షింపబడ్డారని బైబిలు సెలవిస్తుంది. ఇప్పుడు, వారి రక్షణ కొరకు అది సరిపోతుంది, కాని దేవుడు రక్షింపబడు విశ్వాసమును వ్యక్తపరచిన పాత నిబంధన ప్రవక్తలకు దేని ఆధారంగా రక్షణను ఇచ్చాడు? ఇది వారికి తెలియదుగాని, అందరి రక్షణ కొరకు అవసరమైన మరియు ఏకైక ఆధారము యేసు క్రీస్తు యొక్క యోగ్యతలు మాత్రమే. కాబట్టి, ఒక విధంగా, వారు తెలియని క్రైస్తవులు. వారి జీవితకాలములలో వారి రక్షణ యొక్క ఆధారమును గూర్చి వారికి పూర్తి సమాచారము లభించలేదుగాని, సిలువకు ముందుగాని లేక తరువాతగాని, ఆకాశము క్రింద మనము రక్షణ పొందుటకు మరి ఏ నామము ఇవ్వబడలేదు అను నిశ్చయతను మనము కలిగియుందాము.

— డా. గ్లెన్ జి. స్కోర్గి

దేవుని ప్రజలు విశ్వాసముతో జీవించారు అనుటకు పాత నిబంధన శాసనములు చిహ్నముగా ఉన్నాయి. ఈ శాసనముల యొక్క శక్తి ద్వారా కుమారుని యొక్క మధ్యవర్తిత్వ బాధ్యత నెరవేర్చబడింది. ఇందుమూలముగానే, యోహాను 8:56లో మనము చదువునట్లు, యేసు దినమును చూసి అబ్రాహాము ఆనందించాడు. మరియు ఇందుమూలముగానే, యేసు చేయబోవుచున్న కార్యములను గూర్చి మోషే మరియు ప్రవక్తలు వివరించారని అనేకమంది క్రొత్త నిబంధన పాత్రలు తెలియజేశారు. లూకా 16:29-31లో యేసు చెప్పిన ధనవంతుడు మరియు లాజరు ఉపమానములో అబ్రాహాము ఇలా సెలవిచ్చాడు. యోహాను 1:45లో ఫిలిప్పు ఇదే విషయమును చెప్పాడు. అపొ. 26:22 మరియు 28:23లో పౌలు కూడా ఇదే మాటను చెప్పాడు. మరియు ఆయన పునరుత్థానము తరువాత, లూకా 24:27లో యేసు ఎమ్మాయి మార్గమున, మరియు లూకా 24:44లో కూడివచ్చిన శిష్యులకు దీనిని వివరించాడు.

కుమారుడు చేసిన కృపా నిబంధన మధ్యవర్తిత్వం యేసు నరావతారము, పూర్ణ విశ్వాసము మరియు విధేయతతో కూడిన ఆయన జీవితము, సిలువ మీద ఆయన మరణము, మరణము నుండి ఆయన పునరుత్థానము, మరియు పరలోకమునకు ఆయన ఆరోహరణ చుట్టూ కేంద్రీకృతమైయున్నది. కృపా నిబంధనకు మధ్యవర్తిగా, మన తరుపున ఆయన క్రియల నిబంధనను నెరవేర్చి, దాని ఆశీర్వాదములను మనము పొందుకుంటామని హామి ఇచ్చాడు.

రోమా. 5:12-19లో, పౌలు క్రియల నిబంధనలో ఆదాము యొక్క పాత్ర మరియు కృపా నిబంధనలో కుమారుని యొక్క పాత్రకు మధ్య వ్యత్యాసమును చూపాడు. మరియు మధ్యవర్తిగా కుమారుని యొక్క పాత్ర రెండు నిబంధనలను ఎలా నెరవేర్చినదో చూపుటకు అతడు ఇలా చేశాడు. ఆదాము యొక్క పాపము సర్వమానవాళికి పాపము మరియు మరణమును కొనితెచ్చింది అని చెబుతూ 12-14 వచనాలలో అతడు ఆరంభించాడు. మరియు ఈ వాక్యభాగము యొక్క ముగింపులో, ఆదాము మరియు యేసు ఒకే విధమైన నిబంధన పాత్రలను పోషించారని అతడు సూచించాడు. రోమా 5:14లో అతడు ఇలా వ్రాస్తున్నాడు:

ఆదాము రాబోవువానికి గురుతైయుండెను (రోమా 5:14).

తరువాత, రోమా. 5:15-19లో, మన నిబంధన ప్రతినిధులుగా ఆదాముకు మరియు యేసుకు సరిపోలిన కాని వ్యతిరేకమైన చరిత్రలు ఉన్నాయని పౌలు వాదించాడు. ఆదాము చరిత్ర పాపము, వైఫల్యము, శిక్ష మరియు మరణముల మీద ఎక్కువ దృష్టి పెడుతుంది. ఆదాములో, మనకు అందుబాటులో ఉన్న ఒకే నిబంధన పరిణామమును మానవాళి పొందుకుంది: అది శిక్షావిధి. రోమా. 5:15-19లో ఆదామును గూర్చి పౌలు పలికిన మాటలను వినండి:

...ఒకని అపరాధమువలన అనేకులు చనిపోయినయెడల... తీర్పు ఒక్క అపరాధమూలముగా వచ్చినదై శిక్షావిధికి కారణమాయెను;... మరణము ఒకని అపరాధమూలమున వచ్చినదై... కాబట్టి తీర్పు ఒక్క అపరాధమూలమున వచ్చినదై, మనుష్యుల కందరికిని శిక్షావిధి కలుగుటకు ఏలాగు కారణమాయెనో... ఏలయనగా ఒక మనుష్యుని అవిధేయతవలన అనేకులు పాపులుగా ఏలాగు చేయబడిరో... (రోమా. 5:15-19).

క్రియల నిబంధన పూర్తిగా న్యాయము మీద ఆధారపడియుండెను గనుక ఆదాములో సర్వమానవాళి శిక్షించబడెను. కరుణ మరియు క్షమాపణ పొందుటకు కావలసిన మార్గములను అది అనుగ్రహించలేదు. అది ఒక మధ్యవర్తిని అనుగ్రహించలేదు. కాబట్టి, ఒకసారి మనము శిక్షించబడిన తరువాత, మన శిక్షావిధిని తిరగవ్రాయుటకు క్రియల నిబంధనలో ఒకరు ఏమి చేయలేరు.

అయితే, ఈ వాక్యభాగములో, ఆదాము విఫలమైన చోట యేసు జయమును పొందాడని పౌలు వివరించాడు. కృపా నిబంధన కరుణ మరియు క్షమాపణకు అవసరమైన మార్గమును అనుగ్రహిస్తుంది కాబట్టి యేసు యొక్క నీతి కార్యములు మనకు లాభదాయకమైయ్యాయి. మరియు ఆ మార్గము దేవుని కుమారుడైన యేసు క్రీస్తు యొక్క మధ్యవర్తిత్వం అయ్యున్నది. ఫలితంగా, యేసు యొక్క చరిత్ర విధేయత, నీతి, నీతిమంతులుగా తీర్చుట మరియు జీవము మీద ఆధారపడియున్నది. ఈ విషయమై పౌలు రోమా 5:15-19లో తెలియజెప్పిన వివరమును గమనించండి:

...దేవుని కృపయు, యేసుక్రీస్తను ఒక మనుష్యుని కృపచేతనైన దానమును, అనేకులకు విస్తరించెను... కృపావరమైతే అనేకమైన అపరాధముల మూలముగా వచ్చినదై మనుష్యులు నీతిమంతులుగా తీర్చబడుటకు కారణమాయెను... కృపాబాహుళ్యమును నీతిదానమును పొందువారు జీవము గలవారై, మరి నిశ్చయముగా యేసుక్రీస్తను ఒకని ద్వారానే యేలుదురు... ఒక్క పుణ్య కార్యమువలన కృపాదానము మనుష్యులకందరికిని జీవప్రదమైన నీతి విధింపబడుటకు కారణమాయెను... ఒకని విధేయతవలన అనేకులు నీతిమంతులుగా చేయబడుదురు (రోమా 5:15-19).

యేసు కేవలం మన ప్రతినిధి మాత్రమే కాడు కాబట్టి కృపా నిబంధనలో విమోచన సాధ్యపడింది; ఆయన మన మధ్యవర్తి కూడా అయ్యున్నాడు. మరియు మన వ్యక్తిగత అపరాధమును తీసివేయుటకు అది ఆయనకు అధికారమునిస్తుంది. హెబ్రీ 9:15లో మనము చదువునట్లు:

ఈ హేతువుచేత మొదటి నిబంధన కాలములో జరిగిన అపరాధములనుండి విమోచనము కలుగుటకై ఆయన మరణము పొందినందున, పిలువబడిన వారు నిత్యమైన స్వాస్థ్యమును గూర్చిన వాగ్దానమును పొందు నిమిత్తము ఆయన క్రొత్తనిబంధనకు మధ్యవర్తియై యున్నాడు (హెబ్రీ 9:15).

1 తిమోతి 2:5-6 సెలవిచ్చుచున్నట్లు:

దేవుడొక్కడే, దేవునికిని నరులకును మధ్యవర్తియు ఒక్కడే; ఆయన క్రీస్తుయేసను నరుడు. ఈయన అందరి కొరకు విమోచన క్రయధనముగా తన్నుతానే సమర్పించుకొనెను (1 తిమోతి 2:5-6)

కృపా నిబంధన యొక్క మధ్యవర్తిగా యేసు యొక్క పాత్ర నిజముగా ఆశ్చర్యము కలిగించేదిగా ఉన్నది. మొదటిగా, మీరు కోరినట్లయితే కృపా నిబంధన, లేక క్రొత్త నిబంధనను ఆరంభించు యాజకుడు మరియు బలి ప్రభువైన యేసు అని నేను అంటాను... మరియు ప్రభురాత్రి భోజనమందు, తన బల్యార్పణ మరణమునకు రెండు స్థాయిలలో ప్రాముఖ్యత ఉన్నదని సువార్తలలోని ప్రభువైన యేసు వివరించాడు. అవును, అది మనము తప్పించుకొనుటకుగాను మన స్థానములో మన పాపముల కొరకు పరిశుద్ధ దేవుని యొక్క ఉగ్రతను అనుభవించిన ప్రాయశ్చిత్త బలి అయ్యున్నది, కాని ఆయన తన మరణమును నిబంధనను-ఆరంభించు బలిగా కూడా వర్ణించాడు. ఆయన రక్తము క్రొత్త నిబంధనను ఆరంభించింది అని మత్తయి మరియు లూకాలో ఆయన స్పష్టముగా సెలవిచ్చాడు. కాబట్టి, ఆయన మరణము క్రొత్త నిబంధన యుగమును ఆరంభించిన బలియైయున్నది. కాబట్టి, ఒకవైపున యేసు బలి అర్పించు యాజకుడైయున్నాడు, మరియు ఆశ్చర్యకరముగా మరొక వైపున, ఆయన స్వయంగా బలియైయున్నాడు.

— డా. ఛార్లెస్ ఎల్. క్వార్లెస్

మన సంపూర్ణ దైవిక మరియు సంపూర్ణ మానవ నిబంధన మధ్యవర్తిగా యేసు పాత్ర మన స్థానములో మరణించి మన పాపములకు ప్రాయశ్చిత్తము చెల్లించునట్లు యేసును చేసింది. మరియు మానవ పాపమునకు ఈ పరిష్కారం కృపా నిబంధనలో ఎల్లప్పుడూ అందుబాటులో ఉంటుంది కాబట్టి, మరొక నిబంధనను, మరొక నిబంధన ప్రతినిధిని, లేక మరొక మధ్యవర్తిని పరిచయం చేయుటకు దైవిక దైవకృతము యొక్క అవసరత ఇక ఉండనే ఉండదు.

మన పాఠంలో ఇప్పటి వరకు, దేవుని నిత్య ఆలోచన మరియు దైవిక దైవకృతము దృష్ట్యా కృపా నిబంధనను మనము పరిగణించాము. ఇప్పుడు మన మూడవ ప్రధానమైన అంశమును చూద్దాము: నిబంధనలోని మూలకములు.

మానవాళి యొక్క ఆరంభము మీద దృష్టిపెడుతూ వేదాంతశాస్త్ర మానవశాస్త్ర అధ్యయనమును మనము ఆరంభించాము. మన చర్చలో భాగంగా, మానవాళితో దేవుడు చేసిన వాస్తవిక నిబంధనను పురాతన పశ్చిమ ఆసియాలోని ప్రభువు-సామంత ఒప్పందముల మధ్య ఉన్న మూడు సామాన్య మూలకాల దృష్ట్యా వివరించాము. ఈ ఒప్పందాలలో ఇవి ఉండేవి: ప్రభువు సామంతకు చూపు దయ, సామంత నుండి ప్రభువు ఆశించు స్వామిభక్తి, మరియు నిబంధన పట్ల సామంత యొక్క స్వామిభక్తి లేక స్వామిద్రోహము వలన కలుగు పరిణామాలు. ఈ మూలకముల ఆధారంగా, పురాతన పశ్చిమ ఆసియాలోని నిబంధనలు దేశముల మధ్య కట్టబడిన నియమములయ్యేవి.

మానవాళితో దేవుడు చేసిన నిబంధనలలో ఇలాంటిదే జరిగింది. ఆదాముతో చేసిన వాస్తవిక నిబంధన — క్రియల నిబంధన — మన పట్ల దేవుడు చూపిన దైవికమైన దయ మీద ఆధారపడింది. ఉదాహరణకు, ఆయన మన మొదటి తల్లిదండ్రులను సృజించాడు, సృష్టి మీద వారికి అధికారమును ఇచ్చాడు, మరియు వారికి ఆహారమును నివాస స్థలమును ఇచ్చాడు. హృదయపూర్వకమైన యాజక మరియు రాజరిక బాధ్యతల రూపములో దేవుడు మానవ స్వామిభక్తిని కూడా కోరాడు. ఇతర విషయములతో పాటుగా, ఆదాము హవ్వలు ఏదెను తోటలో ఆయనను సేవించాలని, మరియు భూమిని నింపునట్లు ఆయన రాజ్య సరిహద్దులను విశాలపరచాలని దేవుడు కోరాడు. మరియు ఆదాము హవ్వలు నిబంధనను నమ్మి, విధేయులైతే ఉన్నతమైన జీవిత ఆశీర్వాదము, మరియు వారు అపనమ్మికతో అవిధేయులైతే మరణము మరియు శిక్షావిధి అను శాపము ఈ నిబంధనకు పరిణామములైయున్నాయి. కృపా నిబంధన క్రియల నిబంధనలోని ఈ మూలకములన్నిటిని కలిగియుంటుంది. అయితే మానవుల యొక్క పాపపు స్వభావము మరియు క్రీస్తు యొక్క మధ్యవర్తిత్వము వరకు వాటిని విస్తరింపజేస్తుంది.

ఈ విస్తరించబడిన మూలకములను ఒకొక్కటిగా మనము పరిశీలన చేద్దాము. మొదటిగా, కృపా నిబంధనలో దేవుని దయను మనము చూద్దాము. రెండవదిగా, అది ఆశించు మానవ స్వామిభక్తిని మనము ప్రతిబింబించుదాము. మరియు మూడవదిగా, దాని యొక్క పరిణామాలను మనము చూద్దాము. దేవుని యొక్క దైవికమైన దయతో ఆరంభించుదాము.

అనేక విధాలుగా, దేవుని దయ అనునది కృపా నిబంధనలో అత్యంత ప్రాముఖ్యమైన లక్షణముగా ఉన్నది. కుమారుని మనకు మధ్యవర్తిగా పంపుటకు తండ్రిని, మరియు ఆ బాధ్యతలో ఆనందించుటకు కుమారుని మంచితనము మరియు దయ పురికొల్పాయి. మనము నెరవేర్చలేని షరతులను ఆయన స్వయంగా నెరవేర్చునట్లు ఒక నిబంధన ఏర్పాటును చేయునట్లు దయ దేవుని పురికొల్పింది, తద్వారా మనము ఎన్నడును సంపాదించలేని ప్రతిఫలములను మనము పొందుకోగలము. అమూల్యమైన వరములైన — క్షమాపణ మరియు జీవము మనకు ఉచితముగా లభించాయి అను వార్త — ఈ సువార్త ప్రకటనను శుభవార్తగా చేస్తుంది. మనతో మంచిగా ఉంటానని ఒక పవిత్రమైన నిబంధనా వాగ్దానమును చేసిన గొప్ప మరియు ప్రేమగల దేవుని మనము సేవించుచున్నాము.

దేవుని దయ లేఖనము బయలుపరచు కృపా నిబంధనలో మొదటి భాగమైయున్నది. ఆది. 3:14-19లో, క్రియల నిబంధన యొక్క పరిణామాలను దేవుడు మొట్టమొదటిసారి అమలుపరచినప్పుడు, ఆయన ధారాళమైన దయను కనుపరచాడు. వారు మంచి చెడ్డల తెలివినిచ్చు వృక్ష ఫలమును భుజిస్తే, ఆదాము హవ్వలు, మరియు వారితో పాటు మానవులందరు న్యాయముగా మరణిస్తారు అని క్రియల నిబంధన తెలియపరచింది. కాని దేవుడు తన తీర్పులను ప్రకటించినప్పుడు, ఆయన తన న్యాయమును కరుణతో, మంచితనముతో మరియు దయతో మార్చాడు. ఆయన మానవులను బ్రదకనిచ్చుట మొదటి దయా కార్యమైయున్నది. మనము వృద్ధి చెంది భూమిని నింపు అవకాశమును ఆయన మనకు అనుగ్రహించాడు. భూమిని సాగుచేయుటకు, మనము జీవించుటకు సరిపడు ఆహారమును ఉత్పత్తి చేయుటకు ఆయన మనకు అవకాశం ఇచ్చాడు. అన్నిటి కంటే ముఖ్యముగా, పాపపు శాపమును తిరగవ్రాయు ఒక విమోచకుని మన కొరకు పంపుతానని ఆయన వాగ్దానం చేశాడు. ఆది. 3:15లో ఆయన సర్పముతో పలికినట్లు:

స్త్రీ సంతానము...నిన్ను తలమీద కొట్టును; నీవు దానిని మడిమె మీద కొట్టుదువని చెప్పెను (ఆది. 3:15).

మీకు జ్ఞాపకమున్నట్లయితే, ఈ తీర్పు తుదకు ఒక మానవుడు సాతాను రాజ్యమును జయించి మనలను పాపము యొక్క శాపము నుండి విమోచిస్తాడు అని చిత్రాత్మక రీతిలో చెప్పినట్లుగా ఉన్నది. ఈ దైవకృతమే అద్భుతమైన దయగల బహుమానమైయ్యేది. కాని ఈ విమోచకుడు స్వయంగా కుమారుడైన దేవుడైనప్పుడు దేవుడు తన దయను మరింతగా విస్తరింపజేశాడు. సిలువ మీద తన వ్యక్తిత్వము ద్వారా మన పాపమును మోయుటకు యేసు అంగీకరించాడు. నరావతారమునకు ముందే, నిబంధనా కృపకు మధ్యవర్తిగా లేక “నిశ్చయత”గా సేవించుటకు ఆయన సమ్మతి చూపాడు. ఇంతేగాక, మనము విమోచనను పొందునట్లు, పాపులైన మానవులను విశ్వాసములోనికి నడిపించుటకు ఒప్పుకొనుట ద్వారా పరిశుద్ధాత్మ కూడా దయను చూపాడు. పరిశుద్ధాత్మ కార్యములోని ఈ కార్యమును గూర్చి మాట్లాడుతూ పౌలు 1 కొరింథీ. 2:12-14లో, ఇలా వ్రాశాడు:

దేవునివలన మనకు దయచేయబడినవాటిని తెలిసికొనుటకై మనము... దేవుని యొద్దనుండి వచ్చు ఆత్మను పొందియున్నాము... మనుష్యజ్ఞానము నేర్పుమాటలతో గాక ఆత్మ సంబంధమైన సంగతులను ఆత్మ సంబంధమైన సంగతులతో సరిచూచుచు, ఆత్మ నేర్పు మాటలతో వీటిని గూర్చియే మేము బోధించుచున్నాము. ప్రకృతి సంబంధియైన మనుష్యుడు దేవుని ఆత్మ విషయములను అంగీకరింపడు, అవి అతనికి వెఱ్ఱితనముగా ఉన్నవి, అవి ఆత్మానుభవముచేతనే వివేచింపదగును గనుక అతడు వాటిని గ్రహింపజాలడు (1 కొరింథీ. 2:12-14).

యోహాను 6:63-65 మరియు ఎఫెసీ. 2:8, 9లో కూడా మనము ఇలాంటి ఆలోచనలనే చూస్తాము.

అవును, మనలను విశ్వాసములోనికి నడిపించుటకు ఆత్మ ఏ విధంగా కార్యము చేస్తాడు అను విషయమును గూర్చి వేదాంతశాస్త్ర సాంప్రదాయాలు ఎల్లప్పుడు సమ్మతి చూపవు. రెండు దారులు లేక మార్గముల దృష్ట్యా ఆత్మ యొక్క మారుమనస్సు కార్యమును మనము ఉదహరించవచ్చు. ఒక మార్గము క్రీస్తును రక్షకునిగా అంగీకరించుటను సూచిస్తుంది. మరొక మార్గము ఆయనను నిరాకరించుటను సూచిస్తుంది. పరిశుద్ధాత్మ దైవకృతములో ప్రజలను సువార్తను ఎదుర్కొనేలా చేస్తాడని, మరియు ఈ నిర్ణయము తీసుకొను స్థానములో ఉంచుతాడని ఇవాంజెలికల్ క్రైస్తవులందరు సమ్మతించవలసిందే. అయితే ఈ ప్రక్రియలో ఆత్మ యొక్క పాలుపంపులను గూర్చి మూడు ప్రధానమైన అభిప్రాయములు ఉన్నాయి.

మొదటిగా, రక్షణ మార్గమును లేక నాశన మార్గమును ఎంపిక చేసుకొను స్వాభావిక సామర్థ్యము మానవులకు ఉంది అని కొన్ని వేదాంతశాస్త్ర సంప్రదాయములు నమ్ముతాయి. ఈ అభిప్రాయములో, ఆత్మ యొక్క దైవకృత కార్యము మనలను సువార్తను ఎదుర్కొను స్థానములోనికి తెచ్చుట మీద దృష్టిపెడుతుంది.

మనము సువార్తను ఎదుర్కొను విధముగా పరిశుద్ధాత్మ మన జీవితములను రూపుదిద్దుతాడని రెండవ అభిప్రాయం ఒప్పుకుంటుంది. అయితే సువార్తకు అనుకూలముగా స్పందించు స్వాభావిక సామర్థ్యము పతనమైన మానవులకు లేదని కూడా ఇది నమ్ముతుంది. మన పతనమైన స్థితిలో, మనము ఎల్లప్పుడు నాశన మార్గమునే ఎంపిక చేసుకుంటాము. కాబట్టి, ఈ అభిప్రాయం ప్రకారం, పరిశుద్ధాత్మ మనకు రక్షింపబడు విశ్వాసమునకు ముందు కలుగు కృపను అనుగ్రహిస్తాడు, మరియు రక్షణ మార్గమును ఎన్నుకొనునట్లు అది మనలను బలపరుస్తుంది. ఒకసారి మనము ఈ కృపను పొందినతరువాత, రెండు మార్గములు మన ముందు ఉంటాయి, మరియు క్రీస్తును స్వీకరించాలా లేక తిరస్కరించాలా అను నిర్ణయమును తరువాత మనము తీసుకోవచ్చు.

మూడవ అభిప్రాయం ప్రకారం, మనము సువార్తను ఎదుర్కొనునట్లు పరిశుద్ధాత్మ చేస్తాడు మరియు జీవమును ఎంపిక చేసుకొను స్వాభావిక సామర్థ్యము మనలో లేదు. కాని, ఈ అభిప్రాయం ప్రకారం, పరిశుద్ధాత్మ రక్షించుటకు నిర్ణయించుకున్నవారికి ఆపుచేయలేని కృపను అనుగ్రహిస్తాడు. ఈ కృప రక్షణ మార్గమును ఎంపిక చేసుకొనుటలో మనకు సహాయం చేయుట మాత్రమేగాక, మనము అలా చేయునట్లు చూస్తుంది. అయితే మనము ఏ అభిప్రాయమును కలిగియున్నప్పటికీ, మన పట్ల ఆత్మ కార్యము మంచితనము మరియు దయా కార్యమైయున్నదని ఇవాంజెలికల్ క్రైస్తవులు అందరు ఒప్పుకోవాలి.

కృపా నిబంధనలోని ఒక మూలకముగా దేవుని దయను చూశాము కాబట్టి, ఇప్పుడు మానవ స్వామిభక్తి వైపుకు మన దృష్టిని మళ్లించుదాము.

క్రియల నిబంధన వలెనె కృపా నిబంధనలో కూడా దేవునికి సంపూర్ణ విధేయత చూపుట అవసరమైయున్నది. వాస్తవానికి, కృపా నిబంధనలో మానవ స్వామిభక్తి యొక్క అవసరతలు ఇంకా పెరిగాయి. ఈ పాఠములోని తరువాత భాగములో నిబంధన నిర్వహణను గూర్చి చర్చించునప్పుడు, ఈ ఆలోచనను మనము మరింత లోతుగా చూద్దాము. కాబట్టి, ప్రస్తుతానికి, కృపా నిబంధనలో హృదయపూర్వకమైన మానవ స్వామిభక్తి అవసరమైయున్నదని మాత్రమే మనము చెప్పగోరుచున్నాము.

క్రియల నిబంధనలో, మానవ స్వామిభక్తి యొక్క అవసరతను రెండు సార్లు నెరవేర్చవలసియుండేది. మొదటిగా, మన నిబంధనా ప్రతినిధియైన ఆదాము దానిని నెరవేర్చవలసియుండేది. ఆదాము దేవునికి పూర్తిగా నమ్మకమైనవానిగా ఉంటే, అతడు చూపు విధేయత మానవాళి యొక్క సామూహిక విధేయతగా పరిగణించబడేది. ఆదాము ఈ విషయములో విఫలమైనప్పటికీ, కృపా నిబంధన మనలను ఈ పరిణామమునకు బాధ్యులనుగా ఎంచుట కొనసాగిస్తుంది. మనము మన గతమును మార్చలేము అను ఒక విషయము దృష్ట్యా ఈ తీర్పును మనము తప్పించుకోలేము.

రెండవదిగా, క్రియల నిబంధన మన వ్యక్తిగత స్వామిభక్తిని కూడా కోరింది. ఉదాహరణకు, ఆదాము యొక్క జాతిలో భాగముగా మాత్రమే హవ్వకు తీర్పుతీర్చబడలేదు. ఆమె సొంత క్రియల వలన కూడా ఆమెకు తీర్పు తీర్చబడింది. దేవుడు ఆమె యొక్క వ్యక్తిగత విధేయతను కోరాడని ఇది సూచిస్తుంది. ఉదాహరణకు, ఆదాము దేవుని మాటకు విధేయుడైయుండినను అతని వారసులలో ఒకరు పాపములో పడిపోవుట కూడా సాధ్యమైయ్యేదే. అలా జరిగియుంటే, ఈ పాపము మానవాళి అంతటిని ఖండించియుండేది కాదుగాని, ఆ పాపిని మాత్రమే ఖండించేది.

అయితే కృపా నిబంధనలో గల అందమైన దయాకృతములలో ఒకటి ఏమిటంటే, యేసు మన నిబంధన అధిపతిగాను, మధ్యవర్తిగాను పని చేస్తాడు. మన నిబంధన అధిపతిగా, దేవునికి ఆయన చూపిన పూర్ణమైన విధేయత ద్వారా సామూహిక మానవ స్వామిభక్తి యొక్క అవసరతను ఆయన ఇప్పటికే నెరవేర్చాడు. మరియు మన మధ్యవర్తిగా, ఆయన మనందరి స్థానములో నిలిచియుండి, వ్యక్తిగత స్వామిభక్తి యొక్క అవసరతలను నెరవేర్చాడు. మనము పాపము చేసిన ప్రతిసారి, ఆయన నిందను తనమీద వేసుకున్నాడు. మరియు ఆయన నమ్మకముగా ఉన్న ప్రతిసారి, ఆ నమ్మకమును మన ఖాతాలో జమచేశాడు. కాబట్టి, కృపా నిబంధనలో మానవ స్వామిభక్తి యొక్క అవసరతలు పెరిగినప్పటికీ, అవి నెరవేర్చుట చాలా సులభమైయ్యింది — ఎందుకంటే మన మధ్యవర్తియైన యేసు, మన పక్షమున వాటిని నెరవేర్చుతాడు.

మనము దేవునికి స్వామిభక్తిని చూపుటను గూర్చిన విషయమును గూర్చి ఆలోచన చేయునప్పుడు, యేసు క్రీస్తు యొక్క వ్యక్తిత్వములో బయలుపరచబడిన దేవుని కృప లేకుండా దేవునికి విధేయులగు సామర్థ్యము మనకు ఉండదు అని గుర్తించుట మన ఆరంభ బిందువు అయ్యుండాలి. మనకు వెలుపల ఉన్న శక్తి లేక కృప మీద మనము ఆధారపడవలసియున్నది అని గ్రహించుటకు అది ఆరంభ బిందువు కావాలి... యేసు క్రీస్తు యొక్క వ్యక్తిత్వములో దేవుడు చేసిన కార్యము లేకుండా మనలో నుండి స్వామిభక్తి అనునది కలుగగలదు అని మనము ఆలోచన చేస్తే, స్వామిభక్తి చూపుటకు మనము ఎంత ప్రయత్నించినా మనము ఖచ్చితముగా విఫలమవుతాము అని మనము అర్థము చేసుకోవాలి. కాబట్టి మరొకని యొక్క స్వామిభక్తిని మనము చూడాలి. యేసు క్రీస్తు ధర్మశాస్త్రము యొక్క విప్లవాత్మకమైన స్వభావములోని నియమములను నెరవేర్చుటకు వచ్చిన పూర్ణమైన సేవకుడు అయ్యున్నాడను సత్యమును మనము పరిగణించినప్పుడు, ఆ స్వామిభక్తి, ఆ నమ్మకత్వము, ఆ అనుబంధము, ఆ విధేయత, మరియు ఆ సేవ నేడు మన మీద ఉంచబడినది.

— డా. స్టీఫెన్ ఉమ్

1703 నుండి 1791 మధ్య కాలములో నివసించిన జాన్ వెస్లీ అను వేదాంతవేత్త, తాను వ్రాసిన సెర్మొన్ 6: ది రైచస్నెస్ ఆఫ్ ఫెయిత్ అను రచనలోని 1వ భాగము, 8వ విభాగములో దేవుడు ఆశించు మానవ స్వామిభక్తిని ఇలా వర్ణించాడు. అతడు వ్రాసిన మాటలు వినండి:

ఖచ్చితముగా మాట్లాడితే, మనము నీతిమంతులుగా తీర్చబడుటకుగాను నిబంధనా కృప మనము ఏమీ చేయాలని కోరనే కోరదు; కేవలం, ఆయన కుమారుని నిమిత్తము, మరియు ఆయన మన కొరకు చేసిన ప్రాయశ్చిత్తమును మరియు ఆయనను మనము నమ్మాలి అంతే, మరియు ఆయన “యోగ్యులైన అన్యులను నీతిమంతులుగా తీర్చుతాడు.”

ఇక్కడ వెస్లీ రోమా 4:5ను రుజువుగా చూపుతూ, క్రీస్తులో మన రక్షణ కొరకు మనము వ్యక్తిగతముగా దేవుని నమ్ముటను మాత్రమే కృపా నిబంధన కోరుతుంది అని తెలియజేయుచున్నాడు. ఈ విషయములో, వెస్లీ వెస్ట్మినిస్టర్ కన్ఫెషన్ ఆఫ్ ఫెయిత్, 7వ అధ్యాయం, 3వ భాగమును ఉపయోగిస్తాడు. అక్కడ వ్రాయబడిన మాటలను మరలా వినండి:

రెండవ [నిబంధన] చేయుటకు దేవుడు యిష్టపడ్డాడు, దీనిని సాధారణంగా కృపా నిబంధన అని పిలుస్తారు; దీనిలో ఆయన యేసు క్రీస్తు ద్వారా పాపులకు జీవమును మరియు రక్షణను ఉచితంగా ఇస్తాడు; మరియు వారు రక్షింపబడునట్లు, వారి నుండి విశ్వాసమును కోరతాడు.

రక్షింపబడుటకుగాను మనము దేవునియందు రక్షింపబడు విశ్వాసమును కలిగియుండుటే చాలు అని ఇవాంజెలికల్ క్రైస్తవులు నమ్ముతారు. మరియు ఇది లేఖన బోధకు అనుగుణంగా ఉంది. ఒక ఉదాహరణగా, అపొ. 15:36-18:22లో నమోదు చేయబడిన పౌలు యొక్క రెండవ మిషనరీ యాత్రను జ్ఞాపకము చేసుకోండి. ఆ ప్రయాణములో, సువార్తను ప్రకటించినందుకు పౌలు సీలలు ఫిలిప్పీ పట్టణములోని చెరసాలలో బంధించబడ్డారు. అయితే అర్థరాత్రి వేళ, ఒక భూకంపము వారి బంధకములను తెగగొట్టింది. చెరసాల నాయకుడు వారు పారిపోయారనుకొని, తనను తాను చంపుకో గోరాడు, వెంటనే పౌలు ఖైదీలు పారిపోలేదని, అతడు హాని చేసుకొనవలసిన అవసరం లేదు అని అరిచాడు. అతని జీవితము కొరకు వారు కలిగియుండిన శ్రద్ధను బట్టి చెరసాల నాయకుడు ఎంతగా ప్రభావితుడైయ్యాడంటే, అతడు వెంటనే క్రీస్తును అంగీకరించాలని కోరాడు. అపొ. 16:30-31లో చెరసాల నాయకుడు మరియు పౌలు సీలల మధ్య జరిగిన సంభాషణను వినండి:

[చెరసాల నాయకుడు] వారిని వెలుపలికి తీసికొనివచ్చి అయ్యలారా, రక్షణపొందుటకు నేనేమి చేయవలెననెను. అందుకు వారు ప్రభువైన యేసు నందు విశ్వాసముంచుము, అప్పుడు నీవును నీ యింటివారును రక్షణ పొందుదురని చెప్పెను (అపొ. 16:30-31).

కృపా నిబంధనలో క్రీస్తు యొక్క మధ్యవర్తిత్వం ఎంత ప్రభావవంతమైనదంటే, అది మన కొరకు దేవుని నిబంధనా అవసరతలన్నిటిని నెరవేర్చుతుంది. మన విశ్వాసము కూడా మనము చేసిన భావార్థకమైన కార్యముగా పరిగణించబడదు. మన విశ్వాసము క్రీస్తు నీతిని మనకు ఆపాదించుటకు దేవుడు ఉపయోగించు మార్గమైయ్యున్నది అంతే. కాని దేవుడు తన నిబంధన అవసరతలను తగ్గించాడు అని దీని అర్థము కాదు. మరియు మనము పాపము చేయుటకు స్వతంత్రులమని కూడా అయన చెప్పడు. భిన్నముగా, యోహాను 14:15లో యేసు తన శిష్యులకు చెప్పినట్లు:

మీరు నన్ను ప్రేమించిన యెడల నా ఆజ్ఞలను గైకొందురు (యోహాను 14:15).

1628 నుండి 1680 మధ్యకాలములో నివసించిన ఆంగ్ల ప్యూరిటన్ కాపరియైన వాల్టర్ మార్షల్, తాను వ్రాసిన పుస్తకమైన ది గాస్పల్-మిస్టరీ ఆఫ్ సెన్టిఫికేషన్లోని 8వ అధ్యాయము లేక నిర్దేశనములో ఈ విషయమునకు జవాబునిచ్చాడు. అతడు వ్రాసిన మాటలు వినండి:

క్రియల నిబంధన అను బంధకములో నుండి విమోచించబడుట మన రక్షణలో ఒక భాగమైయున్నది; అయితే దీనికి ముగింపు ఏమనగా, మనకు పాపము చేయుటకు స్వాతంత్ర్యము ఉన్నదని దీని అర్థముకాదు (ఇది అత్యంత ఘోరమైన బానిసత్వము), కాని మనము స్వాతంత్ర్యము అను రాజరిక నియమమును నెరవేర్చవలసియున్నది... పరిశుద్ధతను పట్టించుకోని ఎంత వింతైన రక్షణను వారు కోరతారో! వారు రక్షింపబడతారుగాని, పాపములో చచ్చినవారి వలె ఉంటారు, దైవికమైన జీవితము నుండి దూరమవుతారు, సాతాను స్వరూపము ద్వారా కురూపులవుతారు, వారి రోత దురాశలకు బానిసలు మరియు సామంతలై, మహిమలో దేవునిలోని ఆనందమును కోల్పోతారు. అట్టి రక్షణను క్రీస్తు రక్తము ఎన్నడును కొనుగోలు చేయలేదు.

మనము యేసునందు విశ్వాసమును ఒప్పుకొనునంత వరకు దేవునికి మనము విధేయులము కానవసరం లేదు అని నమ్ము క్రైస్తవులు ఎల్లప్పుడు ఉన్నారు. నిజమైన విశ్వాసులు దేవుని పట్ల ప్రేమగల, నమ్మకమైన స్వామిభక్తిని కనుపరచువారిగా ఉండాలని లేఖనము స్పష్టము చేస్తుంది. యేసునందు విశ్వాసముంచుటను కొనసాగించుట ద్వారా కొంత వరకు, దేవుని నిబంధన ధర్మశాస్త్రమునకు విధేయులగుట ద్వారా కొంత వరకు దీనిని మనము చేయవచ్చు. యాకోబు 2:22-25; మరియు ప్రకటన 14:12 వంటి చోట్ల దీనిని మనము చూస్తాము.

ఇప్పుడు, మనము నిజముగా సువార్తను నమ్మితే, మనము రక్షణను నిశ్చయముగా పొందుతాము అను మాట నిజమే. మనము ఎన్నుడును దేవుని శాపములను ఎదుర్కొనకుండా ఉండునట్లు యేసు యొక్క బలి నిశ్చయపరుస్తుంది. మరియు మనము కృపా వరములుగా నిబంధన ఆశీర్వాదములను — క్షమాపణ మరియు నిత్య జీవము వంటివి — పొందుకొనునట్లు ఈ పూర్ణమైన స్వామిభక్తి చూసుకుంటుంది. అయితే మన క్రియలు ఈ లోకము కొరకు మరియు రానున్న లోకము కొరకు నిబంధన పరిణామాలను కలిగియుంటాయి. ఉదాహరణకు, మనము పాపము చేసినప్పుడు ఈ లోకములో దేవుడు మనలను ప్రేమతో క్రమశిక్షణలో పెడతాడని హెబ్రీ. 12:5-11 బోధిస్తుంది. అంతేగాక, మన వ్యక్తిగత స్వామిభక్తి — ఈ లోకములో అది అసంపూర్ణమైనదిగా ఉన్నప్పటికీ — రానున్న లోకములో దేవుని నుండి మనకు ప్రతిఫలములను సాధిస్తుంది. మత్తయి 6:20; మార్కు 10:21; మరియు లూకా 12:33, 34లో దీనిని మనము చూస్తాము.

కాబట్టి, కృపా నిబంధనలో మానవ స్వామిభక్తిని గూర్చి మనము ఆలోచన చేయునప్పుడు, యేసు మన శాపమునంతటిని తీసివేశాడని జ్ఞాపకముంచుకొనుట చాలా అవసరమైయున్నది. మనము ఆయనకు నమ్మకముగా ఉన్నంత వరకు, దేవుని నిబంధనలోని నిత్యముండు ప్రతికూల పరిణామాలను మనము అనుభవించవలసిన పని లేదు. అయినను మనము పాపము చేయకుండా ఉండుటకు బద్ధులమైయున్నాము. అదే విధముగా, మన ఆశీర్వాదములలో చాలా వరకు క్రీస్తు ద్వారా కొనబడ్డాయి, మరియు మన వ్యక్తిగత స్వామిభక్తి మీద ఆధారపడిలేవు. అయినను, మనము ఆయనకు విధేయులము కావాలని నిబంధన కోరుతుంది.

క్రీస్తు యేసు నందు విశ్వాసము ద్వారా కృప మూలముగా మనము రక్షింపబడితిమి — రక్షింపబడుటకు వేరొక మార్గము ఏదియు లేదు. “అయితే ఏ హేతువుతో మనము ఆయనకు విధేయులమవ్వాలి? ఆయనను ప్రేమించుటకు వెనక హేతువు ఏముంటుంది?” అని కొందరు అడుగుతారు. అసలు హేతువు తరువాత రెండు వచనములలో ఇవ్వబడినది అని నా ఆలోచన. అవును, ఇదంతా ఎఫెసీ 2లో నుండి వెలువడుతుంది, అక్కడ మనము ఇలా చదువుతాము, “దేవుడు ముందుగా సిద్ధపరచిన సత్ క్రియలు చేయుటకై, మనము క్రీస్తుయేసునందు సృష్టింపబడినవారమై ఆయన చేసిన పనియైయున్నాము.” కాబట్టి, మనము విశ్వాసము ద్వారా కృప మూలముగా రక్షింపబడియుంటే — దానిని మనం అన్వేషిస్తూ ఉండాలని నా ఆలోచన — మనము సత్ క్రియలను చేయబద్ధులమైయున్నాము. ఇప్పుడు ప్రశ్న ఏమిటంటే, మనము సత్ క్రియలు చేయకుంటే, మనము ఏమైయున్నాము? ఇది సరియైన ప్రశ్న అని నేననుకుంటాను: మనము యేసు క్రీస్తు నందు విశ్వాసము ద్వారా కృప మూలముగా నిజముగా రక్షింపబడ్డామా?

— డా. మ్యాట్ ఫ్రీడెమాన్

దేవుని దైవకృతము మరియు మానవ స్వామిభక్తి అను మూలకాలను మనము ఇప్పటి వరకు చూశాము కాబట్టి, ఇప్పుడు కృపా నిబంధన యొక్క పరిణామాలను మనము చూద్దాము.

చట్టబద్ధమైన దృష్టికోణము నుండి, కృపా నిబంధనలో క్రియల నిబంధన యొక్క పరిణామములన్ని ఉన్నాయి. రోమా. 5:12-14లో పౌలు బోధించినట్లు, క్రియల నిబంధనలో వలెనే మరణము ఆదాము చేసిన పాపమునకు సామూహిక పరిణామమైయున్నది. మరియు ఆది. 3:16-18లో ఆదాము హవ్వల వలె, మనము కూడా మన వ్యక్తిగత పాపముల కొరకు శ్రమను అనుభవించవలసియున్నది. అంతేగాక, ఇప్పుడు క్రీస్తు వచ్చాడు కాబట్టి నిబంధన శాపములు ఇంకా ఎక్కువైయ్యాయి. హెబ్రీ 10:28-29లో ఇలా వ్రాయబడియున్నది:

ఎవడైనను మోషే ధర్మశాస్త్రమును నిరాకరించినయెడల ఇద్దరు ముగ్గురు సాక్షుల మాటమీద, కనికరింపకుండ వాని చంపించుదురు. ఇట్లుండగా దేవుని కుమారుని, పాదములతో త్రొక్కి, తాను పరిశుద్ధపరచబడుటకు సాధనమైన నిబంధన రక్తమును అపవిత్రమైనదిగా ఎంచి, కృపకు మూలమగు ఆత్మను తిరస్కరించినవాడు ఎంత ఎక్కువైన దండనకు పాత్రుడుగా ఎంచబడునని మీకు తోచును? (హెబ్రీ. 10:28-29).

ఇదే విధముగా, క్రియల నిబంధనలోని ఆశీర్వాదములు కృపా నిబంధనలో చేర్చబడ్డాయి మరియు విస్తరించబడ్డాయి. క్రియల నిబంధనలో, ఆదాము మరియు మానవాళి దేవునికి విధేయులైయుంటే భూమి మీద నిత్య జీవమును పొందుకునేవారు. వాస్తవానికి, వారు నిత్యము జీవించకుండా ఉండునట్లు చూచుకొనుటకు, వారిని జీవవృక్షము నుండి దూరముగా ఉంచుటకు ఏదెను తోటలో నుండి వారిని త్రోసివేయుట రూపించబడింది. నిత్య భౌతిక మరియు ఆత్మీయ జీవితము రూపములో కృపా నిబంధన ఈ ఆశీర్వాదమును పునరుద్ధరిస్తుంది. తుదకు మనము క్రొత్త ఆకాశములు మరియు క్రొత్త భూమి అను భూలోక పరదైశులో నివసిస్తామని అది వాగ్దానము చేస్తుంది. ప్రకటన 21:1-22:5లో యోహాను ఎదురుచూసినట్లు, జీవవృక్షము యొద్దకు వెళ్లు అవకాశము కూడా మరలా మనకు లభిస్తుంది.

అయితే దీనిని మించి, కృపా నిబంధనలో మన విమోచన క్రియల నిబంధనలో మనకు ఇవ్వబడిన ఆశీర్వాదములను మరింతగా పెంచుతుంది. ఉదాహరణకు, మన విమోచన యొక్క అంతిమ స్థితిలో, పాపము మరియు దాని పర్యవసానముల యొక్క సాధ్యత పూర్తిగా తీసివేయబడుతుంది.

మునుపటి పాఠంలో, క్రీ.శ. 354 నుండి 430 వరకు నివసించిన హిప్పో పట్టణ బిషప్ అయిన అగస్టిన్ యొక్క బోధలను చూశాము. అతడు మానవుల యొక్క వాస్తవిక స్థితిని, అనగా పాపరహిత స్థితిని పొస్సే నాన్ పెక్కరే అని వర్ణించాడు, అనగా మానవాళికి పాపము చేయు సామర్థ్యము లేదని అర్థము. అయితే క్రియల నిబంధనలో, మానవాళికి పాపము చేయు సామర్థ్యము కూడా ఉండినది, దీనిని పొస్సే పెక్కరే అని పిలిచాడు. క్రీస్తులో మన విమోచన ద్వారా, మనము పొస్సే నాన్ పెక్కరే స్థాయికి చేరుకుంటాము అని అగస్టిన్ బోధించాడు, ఈ ల్యాటిన్ పదమునకు పాపము చేయుటకు అసమర్థత అని అర్థము. క్రియల నిబంధనలో మన ఉత్తమమైన స్థితి కంటే కూడా ఇది మరి ఉత్తమమైన స్థితి అయ్యున్నది, ఎందుకంటే ఇది దేవుని ఆశీర్వాదములలో మనలను నిత్యము భద్రపరుస్తుంది.

అంతేగాక, కృపా నిబంధనలో, మన ఆశీర్వాదములలో క్రీస్తుతో ఐక్యత కూడా జోడించబడినది. పౌలు ఈ ఆలోచనను ఎంతగా హత్తుకున్నాడంటే, తన రచనలన్నిటిలో దీనిని తరచుగా ప్రస్తావించాడు. “క్రీస్తుయందు,” “క్రీస్తు యేసునందు,” “ప్రభువునందు” మరియు “ఆయనయందు” అను పదములను తన రచనలలో వందకంటే ఎక్కువ సార్లు ఉపయోగించాడు. క్రీస్తునందు ఈ ఐక్యతను కొందరు వేదాంతవేత్తలు నిబంధనా ప్రాతినిధ్యత్వముగా అర్థము చేసుకుంటారు. ఇతరులు దీనిని ఆత్మీయ ఐక్యత దృష్ట్యా అర్థము చేసుకుంటారు. దీనిలో రెండు ఉన్నాయని మరికొందరు నమ్ముతారు. అయితే ఏది ఏమైనా, మన మధ్యవర్తియైన యేసు క్రీస్తుతో మన ఐక్యత మన జీవితములోని ప్రతి కోణమును మార్చివేయు విధముగా ఒక వ్యక్తిగత అనుబంధమును సృష్టిస్తుంది. మరియు దానిలోని ఆశీర్వాదములు క్రియల నిబంధనలో మనము పొందియున్న ప్రతి ఆశీర్వాదమును మించినవిగా ఉన్నాయి. ఎందుకంటే, మనము సొంతముగా సాధించగలిగియుండిన ఆశీర్వాదములకు బదులుగా ఇప్పుడు దేవుని పరిపూర్ణమైన కుమారుడును, తన రాజ్యమునకు రాజుయైన క్రీస్తు స్వయంగా సాధించిన ఆశీర్వాదములను మనము పొందుతాము.

మరియు అవును, మనము యేసునందు విశ్వాసముంచితే, మన స్థానములో ఆయన నిబంధన శాపములను మోస్తాడు అను ఆశీర్వాదమును మనము మరచిపోకూడదు. మనము పాపము చేసినప్పుడు, మనము దేవుని నిబంధనను ఉల్లంఘిస్తాము మరియు దాని యొక్క ప్రతికూల పరిణామాలను పొందుకుంటాము. అయితే మనలను శిక్షించుటకు బదులుగా, దేవుడు మన శిక్షను యేసుకు పురమాయిస్తాడు. మరియు యేసు ఇప్పటికే సిలువ మీద దానితో వ్యవహరించాడు. కాబట్టి, విశ్వాసులకు, కృపా నిబంధనలో శాపములు లేవు; దానిలో ఆశీర్వాదములు మాత్రమే ఉన్నవి. ఈ కారణము చేత, కొంతమంది పురాతన వేదాంతవేత్తలు ఆదాము పాపమును “అదృష్టం” లేక “ఆనందకరమైన” సన్నివేశము అని పిలుస్తారు. నిశ్చయముగా అతని పాపము దుష్టమైనదే, మరియు దేవుడు సరిగానే దానిని ఖండించాడు. అయితే కృపా నిబంధనలో విమోచన మానవాళి యొక్క వాస్తవిక స్థితి కంటే ఎంత ఉత్తమమైనదంటే, ఆదాము పాపము చేయుట ఒక రకముగా మనకు మేలైయున్నది.

1225లో జన్మించి, 1274లో మరణించిన స్కొలాస్టిక్ వేదాంతవేత్తయైన థామస్ అక్వినాస్, తాను వ్రాసిన సుమ్మ థియోలాజిక 3వ భాగము, 1వ ప్రశ్న, 3వ వ్యాసము, 3వ అభ్యంతరమునకు జవాబుగా ఈ సత్యమును వర్ణించాడు. అతడు వ్రాసిన మాటలను వినండి:

పాపము తరువాత మానవ స్వభావము మరింత ఉన్నతమైన స్థితికి ఎదగకూడదు అనుటకు ఏ కారణము లేదు. వాటిలో నుండి ఉన్నతమైన మేలును కలిగించుటకు దేవుడు కీడును అనుమతిస్తాడు కదా; కాబట్టి ఇలా వ్రాయబడియున్నది: “పాపమెక్కడ విస్తరించెనో అక్కడ కృప అపరిమితముగా విస్తరించెను.” కాబట్టి కూడా, ... మనము ఇలా చెబుతాము: “ఆహా ఎంత ఆనందభరితమైన తప్పిదము, అది మనకు అంత గొప్ప విమోచనను అనుగ్రహించింది!”

కృపా నిబంధన ఆయన ప్రజలతో దేవుని అనుబంధమునకు ఎన్ని అద్భుతమైన మూలకములను జతపరుస్తుంది అంటే, దానిలోని ఆశీర్వాదములు అపరిమితమైనవిగా ఉన్నాయి. ఆయన విమోచనను అనుగ్రహించుట ద్వారా మరియు మన మధ్యవర్తిగా స్వయంగా తన కుమారుని నియమించుట ద్వారా దేవుని దయ బహుగా అధికమైయ్యింది. నిబంధన ఆశించిన మానవ స్వామిభక్తిని మన మధ్యవర్తి మన పక్షమున పూరించాడు, మరియు విశ్వాసములో, విధేయతలో మరియు పరిశుద్ధతలో మన ఎదుగుదలను బలపరచుటకు ఆయన పరిశుద్ధాత్మను మనము పొందుకుంటాము. నమ్మువారి కొరకు, నిబంధన శాపములన్ని పూర్తిగా చెరిపివేయబడ్డాయి, మరియు యేసు యొక్క సొంత స్వాస్థ్యములో మనము పాలుపంచుకొనుట ద్వారా నిబంధన ఆశీర్వాదములు అధికము చేయబడ్డాయి. క్రియల నిబంధన విషయములో ఆదాము యొక్క వైఫల్యము దేవుని ఎదుట మానవాళిని ఒక ఘోరమైన స్థితిలో ఉంచింది. అయితే కృపా నిబంధనలో మనము పొందుకొను విమోచన దానిని పూర్తిగా పూరిస్తుంది.

ఇప్పటి వరకు, దేవుని నిత్య ఆలోచనతో నిబంధనా కృప యొక్క అనుబంధము, దైవిక దైవకృతములో దాని యొక్క ఆరంభము, మరియు దాని మూలకములను చర్చించాము. ఇప్పుడు మన చివరి ముఖ్య అంశమును చూద్దాము: దాని యొక్క చారిత్రిక నిర్వహణ.

కృపా నిబంధన పలువురు నిబంధనా ప్రతినిధుల ద్వారా పాలించబడుతుంది లేక నిర్వహించబడుతుంది. కృపా నిబంధన యొక్క చారిత్రిక నిర్వహణను మనము పరిగణించుచుండగా, పలు వేదాంతశాస్త్ర సాంప్రదాయాలు పలు విధాలుగా ఈ నిర్వాహణలను నిర్వచిస్తాయని గుర్తించుట చాలా అవసరమైయున్నది. మరియు చాలాసార్లు, ఈ భేదములు వారు దేవుని నిబంధనా ప్రజలను ఎలా నిర్వచిస్తారు అను విషయము మీద ఆధారపడియుంటాయి. ఉదాహరణకు, కృపా నిబంధనలో కేవలం విశ్వాసులు మాత్రమే ఉన్నారని కొందరు నమ్ముతారు. దానిలో విశ్వాసులు మరియు వారి పిల్లలు కూడా ఉన్నారని ఇంకొందరు నమ్ముతారు. మరికొందరు ఈ అంశమును వేరొక దృష్టికోణములో నుండి చూస్తారు. ఆరంభములో మానవాళి అంతటిని కలిగియుండి మరియు తరువాత వచ్చిన ఒకొక్క నిబంధన ద్వారా మరింత ప్రత్యేకించబడినదిగా మారిన నిబంధనా నిర్వహణలలోని సమగ్ర క్రమమును వారు వర్ణిస్తారు. ఇతర అభిప్రాయములు కూడా ఉన్నాయి.

ప్రామాణిక లేఖనములోను మరియు విమోచన చరిత్ర అంతటిలోను దేవుని రాజ్యమును గూర్చి మనము ఆలోచన చేసినప్పుడు... బైబిలు నిబంధనలన్నిటిని చూస్తూ క్రీస్తులో వాటి యొక్క ముగింపునకు చేరినప్పుడు దాని యొక్క నిర్వహణలో మార్పులను మీరు చూడవచ్చు. కాబట్టి, ఉదాహరణకు, ప్రత్యేకంగా పాత నిబంధనలో, పాత నిబంధన ద్వారా ఇశ్రాయేలు దేశములో నుండి దేవుడు తన రక్షణ ప్రణాళికను తీసుకొని వచ్చినప్పుడు, ఆయన ప్రధానముగా ఒక దేశముతో పని చేస్తున్నాడు, ప్రధానముగా దైవ పరిపాలన దృష్ట్యా పని చేస్తున్నాడు, మరియు ఆ దేశమునకు సంబంధించినంత వరకు దృశ్య రూపములో ప్రాతినిధ్యం వహిస్తున్నాడు, మరియు వారి ద్వారా, మెస్సీయ యొక్క రాక, ప్రభువైన యేసు యొక్క రాక సాధ్యపడుతుంది, మరియు ఆ రాజ్యము యొక్క నిర్వహణ ఆ ప్రజలతో ఒక విశేషమైన స్థలములో, స్థానములో, భూమిలో, మరియు ఒక పరిపాలన మరియు ప్రభుత్వముతో ముడిపడియున్నదని మీరు చూడవచ్చు. తరువాత, క్రీస్తులో దాని యొక్క నెరవేర్పును గూర్చి మీరు ఆలోచించినప్పుడు, క్రొత్త నిబంధనలో రాజ్యము యొక్క నెరవేర్పులో, కొన్ని మార్పులు జరిగాయి. స్పష్టముగా క్రీస్తు రాజైయున్నాడు. ఆయన పాత నిబంధన మాదిరులను మరియు ఛాయలను నెరవేర్చువాడైయున్నాడు. దావీదు మరియు మోషే యొక్క పాత్రలను ఆయన నెరవేర్చుతాడు. ఆయన తన జీవితము, మరణము మరియు పునరుత్థానములో రాజ్యమును ఆవిష్కృతం చేస్తాడు, దేవుని యొక్క రక్షించు పరిపాలనను లోకములోనికి తెస్తాడు, మరియు తరువాత ఒక అంతర్జాతీయ సమాజమును — దీనిని మనము యూదులు మరియు అన్యజనులు కలిసియున్న “ఒక నూతన పురుషుడు,” సంఘము అని పిలుస్తాము — స్థాపించి, నేడు సంఘము ద్వారా మరియు సంఘములోను పాలించుచున్నాడు. ఆయన పరలోకమునకు తిరిగివెళ్లినప్పటికీ, ఆయన సంఘము ద్వారా పాలించుచున్నాడుగాని, ఇశ్రాయేలు ద్వారా పాలించిన దైవ పరిపాలన విధానములో పాలించుటలేదు... కాబట్టి, పాత నిబంధనలో ఇశ్రాయేలు దేశము ద్వారా దేవుడు పాలించిన కాలము నుండి, “రాజు వచ్చియున్నాడు! ఆయన మరలా తిరిగి వచ్చి రక్షణను ముగించి, అంతిమ తీర్పును ఇచ్చుటకు ముందు ఆయన రక్షించు పరిపాలనలోనికి ప్రవేశించండి,” అని లోకమంతటా ప్రకటించుచు సంఘము రాజ్య సువార్తను తీసుకొని వెళ్లుచుండగా నేడు క్రీస్తులో నెరవేర్చబడుచున్న కాలము వరకు అనేక మార్పులు జరిగాయి.

— డా. స్టీఫెన్ జే. వెల్లుమ్

ఈ పాఠంలో మన ఉద్దేశ్యముల కొరకు, నిబంధన యొక్క చారిత్రిక నిర్వహణలో ఇవాంజెలికల్ క్రైస్తవులు సాధారణంగా సమ్మతించు భాగముల మీద మనము దృష్టిని పెడదాము. విశేషముగా, నిబంధన యొక్క ప్రఖ్యాతిగాంచిన ప్రతినిధుల — ఆదాము, నోవహు, అబ్రాహాము, మోషే, దావీదు మరియు యేసు — ఆధీనములో దేవుని నిబంధన యొక్క అభివృద్ధిని మనము చూద్దాము. దాని యొక్క చారిత్రిక అభివృద్ధి మానవాళి కొరకు దేవుని యొక్క ఉద్దేశ్యములను ఎత్తి చూపు విధానమును కూడా మనము పరిశీలన చేద్దాము.

మనము ఇంతకు ముందు చూసినట్లు, ఆదాము పాపములోనికి పడిపోయిన వెంటనే ఆది. 3:15లో ఆదాముతో కృపా నిబంధన చేయబడింది. ఆ సమయము నందు ఆదాము నిబంధనకు నాయకుడుగా ఉన్నాడు కాబట్టి, వేదాంతవేత్తలు దీనిని తరచుగా “ఆదాము యొక్క నిబంధన నిర్వహణ” అని పిలుస్తారు. ఈ నిర్వహణ దేవునితో మన అనుబంధములను వెంటనే సమాధానపరచుకొనుటకు మానవులకు వెంటనే ఒక అవకాశమును ఇచ్చింది. ఈ సమాధానకార్యము ద్వారా, లోకమంతటా దేవుని రాజ్యమును నిర్మించు కార్యము మీద మరొకసారి మనము దృష్టిపెట్టవచ్చు. ఈ లక్ష్యము మనలను నాశనము చేయుటకు దేవుడు నిరాకరించుటలో మాత్రమే కనిపించదుగాని, ఆది. 4:25-5:32లో ఆదాము యొక్క నమ్మకమైన వారసులను గూర్చి ఇవ్వబడిన వృత్తాంతములో కూడా కనిపిస్తుంది. ఆది. 4:25-26లో ఈ వాక్యభాగము ఎలా ఆరంభమవుతుందో వినండి:

[ఆదాము భార్య] కుమారుని కని..., అతనికి షేతు అను పేరు పెట్టెను. మరియు షేతునకు కూడ కుమారుడు పుట్టెను; అతనికి ఎనోషను పేరు పెట్టెను. అప్పుడు యెహోవా నామమున ప్రార్థన చేయుట ఆరంభమైనది (ఆది. 4:25-26).

మానవాళి “యెహోవా నామమున ప్రార్థన చేయుట ఆరంభించెను” అను మాట ఆయన పట్ల వారికి ఉన్న నిబంధనా బాధ్యతలను నెరవేర్చుటకు వారు నిర్థారించుకున్నారు అని చూపుతుంది. వారు వృద్ధి పొంది దేవుని స్వరూపములు మరియు పోలికెలతో భూమిని నింపమని వారికి ఇవ్వబడిన బాధ్యతను వారు నెరవేర్చుచుండిరి అని తరువాత ఇవ్వబడిన వంశావళి సూచిస్తుంది. వాస్తవానికి “స్వరూపము” మరియు “పోలికె” అను పదములే ఆది. 5:1, 3లో ఉపయోగించబడినవి.

ఆదాము తరువాత, జలప్రళయం తరువాత నిబంధన నోవహుతో నిర్థారించబడింది. నోవహు నిర్వహణ ఆది. 6:18 మరియు 8:21-9:17లో ప్రస్తావించబడినది. ఇంతకు ముందు పాఠంలో మనము చూసినట్లు, ఈ నిర్వహణలో ఆదాము నిర్వహణలోని షరతులు అన్ని స్పష్టముగా చేర్చబడినవి. ఆది. 6:18లో, నోవహుతో దేవుడు పలికిన మాటలను మీరు గుర్తు చేసుకోవచ్చు:

అయితే నీతో నా నిబంధన స్థిరపరచుదును (ఆది. 6:18).

ఇక్కడ, స్థిరపరచెదను అను పదము హెబ్రీ క్రియాపదమైన కుం ను అనువదిస్తుంది. ఇది అప్పటికే ఉనికిలో ఉన్న ఒక నిబంధనను నిర్థారించుటకు ఉపయోగించు ఒక సాధారణ పదమైయున్నది.

అయితే జలప్రళయంతో ఇక ఎన్నడు భూమిని నాశనం చేయనని దేవుడు చేసిన వాగ్దానమును జోడించుటతో నోవహు నిర్వహణ నిబంధన ఆశీర్వాదములను విస్తరింపజేస్తుంది. ఈ నిబంధనకు చిహ్నముగా దేవుడు ఇంద్రధనుస్సును కూడా ఇచ్చాడు. ఈ విధంగా, భూమి మీద ఎల్లప్పుడు నివసించుటకు ఒక స్థానము ఉంటుంది అని, మరియు దానిలో తనకు నమ్మకమైన ప్రజలు నిబంధనా ఆశీర్వాదములను వెదకవచ్చని ఆయన హామీ ఇచ్చాడు.

దేవుడు ఆదాము హవ్వలకు ఇచ్చిన ఆజ్ఞనే నోవహుకు మరియు అతని కుటుంబమునకు ఇచ్చుట ద్వారా మానవాళి కొరకు రాజ్య ఉద్దేశ్యములను ఆయన పునరుద్ఘాటించాడు. ఆది. 9:1లో, ఆయన వారితో ఇలా సెలవిచ్చాడు:

మీరు ఫలించి అభివృద్ధి పొంది భూమిని నింపుడి (ఆది. 9:1).

నోవహు తరువాత, అబ్రాహాము దేవుని నిబంధనా ప్రజలకు తరువాత ప్రాముఖ్యమైన ప్రతినిధిగా ఉన్నాడు. అబ్రాహాము నిబంధన నిర్వహణ ఆది. 15:1-21 మరియు 17:1-21లో ప్రస్తావించబడింది. అబ్రాహాము సందర్భములో కూడా, నిబంధనలో నోవహు నిర్వహణలో ఉన్న షరతులు చేర్చబడ్డాయి. మరియు అబ్రాహాము యొక్క వారసులును గొప్ప దేశముగా చేస్తానని, మరియు వారి ద్వారా ప్రపంచ దేశములన్నిటిని దీవిస్తానని దేవుడు చేసిన వాగ్దానములు దానిలో చేర్చబడినవి. ఈ నిర్వహణ సమయములో, అబ్రాహాము వారసుల ద్వారా, ముఖ్యముగా ఇశ్రాయేలు దేశము ద్వారా మానవాళి కొరకు తాను కలిగియున్న ప్రణాళికలను నెరవేర్చుతానని దేవుడు బయలుపరచాడు. విశేషముగా, దేవుని రాజ్యమును భూమియందంతటా వ్యాపింపజేయు బాధ్యత వారికి ఇవ్వబడినది. రోమా. 4:13లో పౌలు వ్రాసినట్లు:

అతడు లోకమునకు వారసుడగునను వాగ్దానము అబ్రాహామునకైనను అతని సంతానమునకైనను ... కలిగెను (రోమా. 4:13).

వాగ్దానము లేక అబ్రాహాము యొక్క స్వాస్థ్యము లోకమును స్వతంత్రించుకుంటుంది అని పౌలు పలికిన మాటలు క్రొత్త విషయములు అని నేననుకొనుట లేదు. ఆయన ఒక క్రొత్త అనువాదమును ఇచ్చుట లేదు. అబ్రాహాముతో దేవుడు ఆరంభించిన వృత్తాంతమును అతడు కొనసాగించుచున్నాడు. వాస్తవానికి, అబ్రాహాముతో దేవుడు ఆరంభించిన విమోచన నిబంధన కార్యము కార్యక్రమము అంతటిని ఆవృతం చేస్తుంది. మరియు ఆదికాండము 12వ అధ్యాయములోని మొదటి మూడు వచనాలలో దీనిని మీరు ఒక విత్తనము-రూపంలో చూడవచ్చని నేననుకుంటాను. మరియు అబ్రాహాము కొరకు వ్యక్తిగతముగా చేయబడిన వాగ్దానములను కూడా మీరు చూడవచ్చు: అతడు ఒక గొప్ప జనాంగమవుతాడు; అతని సంతతి ఒక గొప్ప దేశమవుతుంది; అతని పేరు గొప్పదిగా చేయబడుతుంది. చివరికి, 3వ వచనములో అది లోకమంతటికి విస్తవింపబడుతుంది: “భూమి యొక్క సమస్త వంశములు నీయందు ఆశీర్వదించబడును.” కాబట్టి, ఒక సమయమందు లోకమంతటా వ్యాపించు ఒక కార్యక్రమమునకు అబ్రాహాము ఆరంభమును పలుకుతున్నాడు. కాబట్టి, సంఘము మీద ఆత్మను కుమ్మరించుట ద్వారా దేవుని నూతన కార్యము యొక్క ఆరంభమును గూర్చి పౌలు మాట్లాడునప్పుడు, ఈ విమోచన ప్రణాళిక యొక్క నూతన ఘట్టము లేక నూతన భాగము నెరవేర్చబడుటను మనము చూశాము.

— డా. మార్క్ సౌసి

అబ్రాహాము తరువాత మోషే తరువాత ప్రధానమైన నిబంధన ప్రతినిధి అయ్యున్నాడు. మోషే నిర్వహణలోని షరతులు నిర్గమ. 19-24లో క్రోడీకరించబడినవి, మరియు లేవీయకాండము మరియు ద్వితీయోపదేశకాండములో క్షుణ్ణంగా వివరించబడినవి.

మోషే ద్వారా, దేవుడు అబ్రాహాము నిర్వహణ మీద నిర్మించి, ద్వితీ. 4:31 మరియు 7:8-13 వంటి చోట్ల అబ్రాహాముతో తన వాగ్దానములను నిర్థారించాడు. ఇశ్రాయేలు దేశము కొరకు ఆయన కట్టడలను ఇచ్చి, విశేషముగా లిఖించబడిన మొట్టమొదటి ధర్మశాస్త్రమును వారికి ఇచ్చాడు. మరియు అలానే, లోకమంతటా తన రాజ్యమును నిర్మించు బాధ్యత వైపుకు కూడా మరలా వారి దృష్టిని మళ్లించాడు. ద్వితీ. 28:1లో మోషే ప్రజలకు చెప్పినట్లు:

నీవు నీ దేవుడైన యెహోవా మాట శ్రద్ధగా విని నేడు నేను నీకు ఆజ్ఞాపించుచున్న ఆయన ఆజ్ఞలనన్నిటిని అనుసరించి నడుచుకొనినయెడల నీ దేవుడైన యెహోవా భూమిమీదనున్న సమస్త జనములకంటె నిన్ను హెచ్చించును (ద్వితీ. 28:1).

మోషే దినములలో, భూమి మీద ఎక్కువ శాతం దేవుని యొక్క మానవ స్వరూపములతో నింపబడింది. అయితే మానవాళి అప్పటికీ ఘోరమైన తిరుగుబాటులో ఉన్నది కాబట్టి, దేవుని రాజ్యముగా సేవించుటకు అది అప్పటికి ఇంకా సిద్ధపడలేదు. కాబట్టి, మోషే యొక్క నిబంధన నిర్వహణ క్రింద, దేవుని సత్యము అను సందేశము ద్వారా ఇశ్రాయేలు విమోచనను తీసుకొని రావలసియుండెను. మరియు వారు సఫలమైయుంటే, ఆయన పక్షమున దేవుని నమ్మకమైన ప్రజలు లోకమును పాలించియుండేవారు.

మోషే తరువాత, తదుపరి ప్రధానమైన నిబంధన నిర్వహణ దావీదుతో జరిగింది. 2 సమూయేలు 7, మరియు కీర్తనలు 89, 132లో దావీదు నిర్వహణ వర్ణించబడింది. దావీదు దినమున, దేవుడు మోషే నిర్వహణను నిర్థారించాడు. అయితే అతి గొప్ప నిబంధన ఆశీర్వాదములు దావీదు యొక్క రాజత్వములో మరియు అతని సింహాసన వారసుల రాజత్వములో నెరవేర్చబడతాయి అని కూడా అది బయలుపరచింది. కీర్తనలు 89:3-4లో మనము చదువునట్లు:

నేను ఏర్పరచుకొనినవానితో నిబంధన చేసి యున్నాను నిత్యము నీ సంతానమును స్థిరపరచెదను. తరతరములకు నీ సింహాసనమును స్థాపించెదనని చెప్పి నా సేవకుడైన దావీదుతో ప్రమాణము చేసియున్నాను (కీర్తనలు 89:3-4).

దావీదు తరువాత, తరువాత మరియు అంతిమ — ఇప్పటికి కూడా — నిబంధన ప్రతినిధి యేసు. తమ ప్రతినిధుల పేర్లతో సుపరిచితమైన మునుపటి నిబంధన నిర్వహణలకు భిన్నముగా, యేసు యొక్క నిర్వహణను “క్రొత్త నిబంధన” అని పిలుస్తారు. ఈ పేరు వాస్తవానికి యిర్మీయా 31:31లో ఉన్నది, మరియు హెబ్రీ. 8:8 దానిని ఉద్ధరణముగా చెబుతుంది. దేవుడు తుదకు ఒక స్థిరమైన కదల్చబడని నిబంధనను స్థాపిస్తాడని మరియు దానిలో ఆయన ప్రజలు ఆయన నిబంధనా ఆశీర్వాదములన్నిటిని పొందుకుంటారని యిర్మీయా బోధించాడు. యేసు అప్పగించబడిన రాత్రి, ఆ ప్రభు రాత్రి భోజన సమయములో, తన సిలువ ఈ క్రొత్త నిబంధనను ఆరంభిస్తుందని ప్రభువు స్వయంగా తెలిపాడు. యేసు తన శిష్యులతో పలికిన మాటలను లూకా 22:20 నివేదిస్తుంది:

ఈ గిన్నె మీకొరకు చిందింపబడుచున్న నా రక్తము వలననైన క్రొత్త నిబంధన (లూకా 22:20).

“క్రొత్త నిబంధన” అను మాటలోని “క్రొత్త” అను పదమునకు హెబ్రీ మరియు గ్రీకు పదములను — హెబ్రీలో ఖదాష్ మరియు గ్రీకులో కైనోస్ — “నూతనపరచబడుట” అని కూడా అనువదించవచ్చు. కృపా నిబంధన యొక్క నిర్వహణగా క్రొత్త నిబంధనను గూర్చి లేఖనము మాట్లాడునప్పుడు “నూతనపరచబడుట” అను అర్థమునిచ్చు విధముగానే మాట్లాడింది. ఒక నూతన నిబంధన నిర్వహణ ద్వారా దేవుడు తన నిబంధనను నూతనపరచుచున్నాడు లేక పునరుద్ఘాటించుచున్నాడు అనునదియే ఇక్కడ ఆలోచనగాని, తాను ఇంతకు ముందు ప్రమాణము చేసిన నిబంధనను విడిచిపెట్టాడని అర్థము కాదు.

హెబ్రీ పత్రికయంతటా ఈ నిబంధన యొక్క నూతనపరచబడిన స్వభావము కనిపిస్తుంది, మరియు అది పాత మోషే నిబంధన నిర్వహణకు మరియు క్రీస్తు ద్వారా నిర్వహించబడిన నూతన మరియు అంతిమ కృపా నిబంధనకు మధ్య వ్యత్యాసములను తెలియపరుస్తుంది. ఉదాహరణకు, హెబ్రీ 5-7 పాత లేవీయుల యాజకత్వమును యేసు యొక్క నూతన యాజకత్వముతో — పాత నిబంధన యాజక రాజైన మెల్కిసెదెకు వంటి యాజకత్వమును పునరుద్ధరించు సంప్రదాయము — వ్యత్యాసపరుస్తుంది. క్రొత్త నిబంధన పాత నిబంధన కంటే భిన్నముగా ఉంటుంది అని చూపుటకు హెబ్రీ 8, యిర్మీయా 31లోని మాటలను ఉపయోగిస్తుంది. వాస్తవిక ప్రవచనము మోషే నిబంధన నిర్వహణలోని ఆశీర్వాదముల యొక్క పునరుద్ధరణ మరియు నూతనపరచబడుటను సూచిస్తుంది అని యిర్మీయా 31 యొక్క సందర్భము స్పష్టము చేస్తుంది.

హెబ్రీ 8లో, ప్రభువైన యేసు యొక్క బలి ద్వారా నిశ్చయపరచబడిన నిబంధనను “నిబంధన” అను పదము ద్వారా రచయిత చివరికి పరిచయం చేస్తాడు. యేసు ఒక ఉత్తమమైన నిబంధనకు మధ్యవర్తిగా ఉన్నాడు కాబట్టి యేసు గొప్ప పరిచర్య చేశాడు అని అతడు చెప్పు మాటలను గమనించండి, అనగా నిబంధన స్వయంగా ఉత్తమమైనది అని అర్థము. దీనిని మునుపటి నిబంధన యొక్క ముగింపుగాను, అనగా, పూర్తిగా క్రొత్త నిబంధనగా కూడా అర్థము చేసుకోవచ్చు. అయితే ఇది పాత నిబంధన నిబంధన యొక్క కొనసాగింపుగాను, నెరవేర్పుగాను ఉన్నది అని కొందరు నమ్ముతారు. 31వ అధ్యాయములో యిర్మీయా ప్రవక్త ప్రస్తావించిన నిబంధనను గూర్చి 8వ అధ్యాయములో రచయిత మాట్లాడుతున్నాడు. దేవుడు ఒక క్రొత్త నిబంధనను స్థాపించు సమయం వస్తుంది అని అతడు అంటాడు. క్రొత్త నిబంధన భవిష్యత్తులో జరుగబోతుంది అని యిర్మీయా నమ్మాడు అను విషయమును నేను స్పష్టము చేయగోరుచున్నాను. కాబట్టి, ఇక్కడ మనము ఒక వ్యత్యాసమును చూస్తున్నాము: ఇది ఒక కొనసాగింపా లేక పూర్తిగా క్రొత్తదా? ఇదే సందిగ్ధత. క్రైస్తవులముగా మనము ఈ విషయమును గూర్చి భిన్నముగా ఆలోచన చేస్తాము. క్రొత్త నిబంధన కొనసాగింపు అని నేననుకుంటాను, ఎందుకంటే, దేవుడు మానవ చరిత్ర అంతటిలో తన ప్రజల ద్వారా — ముందుగా తన యూదుల ద్వారా మరియు తరువాత తన అన్యుల ద్వారా — కార్యములు చేశాడు అని మనము చూడవచ్చు. రక్షణ ఎల్లప్పుడు కృప ద్వారా కలిగింది. వ్యత్యాసము ఏమిటంటే, పాత నిబంధనలో యేసు ఇంకా బలిని అర్పించలేదు, కాబట్టి మన వలె పాత నిబంధన ప్రజలు దానిని చూడలేకపోయారు. రక్షణ ఇప్పటికే నెరవేర్చబడింది కాబట్టి ఇప్పుడు మనకు ఉత్తమమైన నిబంధన ఉన్నది, మరియు విఫలమగుటకు మనము భయపడకూడదు, ఎందుకంటే మన ప్రతి పాపము కొరకు యేసు క్షమాపణను సాధించాడు. కాబట్టి, నిబంధన ఉత్తమమైనదే, మరియు ఇప్పుడు ధర్మశాస్త్రము విధించు ఎలాంటి ఆటంకములు లేక పరిమితులు లేవు కాబట్టి అది క్రొత్తదిగా కూడా ఉన్నది. మనకు అవే బలులు అవసరం లేదు; ఆహారమునకు సంబంధించిన అవే నియమములు మనము పాటించనవసరము లేదు; అవే రకములైన వేడుకలను మనము జరుపుకోనవసరము లేదు, మొదలగునవి. ఇప్పుడు సమస్తము యేసును నమ్ముట ద్వారా విశ్వాసము ద్వారా సాధ్యమవుతుంది. కాబట్టి 8వ అధ్యాయము ముగింపులో, క్రొత్త నిబంధన మునుపటి నిబంధనను నిరర్థకము చేసింది అని నిరర్థకమైనది త్వరగా అంతరించిపోతుంది అని రచయిత సెలవిచ్చాడు. కాబట్టి పాత నిబంధన ముగించబడింది మరియు క్రొత్త నిబంధన దాని యొక్క కొనసాగింపైయున్నది.

— డా. ఆల్విన్ పడిల్ల, అనువాదము

క్రొత్త నిబంధన యొక్క నూతనపరచబడిన స్వభావము హెబ్రీ 9:15లో కూడా స్పష్టము చేయబడింది, అక్కడ రచయిత ఇలా వ్రాస్తున్నాడు:

ఈ హేతువుచేత మొదటి నిబంధన కాలములో జరిగిన అపరాధములనుండి విమోచనము కలుగుటకై ఆయన మరణము పొందినందున, పిలువబడిన వారు నిత్యమైన స్వాస్థ్యమును గూర్చిన వాగ్దానమును పొందు నిమిత్తము ఆయన క్రొత్తనిబంధనకు మధ్యవర్తియై యున్నాడు (హెబ్రీ 9:15).

ఈ వచనము సూచించుచున్నట్లు, “క్రొత్త” నిబంధన నిర్వహణ “మొదటి” లేక “పాత” నిర్వహణను కొనసాగిస్తుంది. విశేషముగా, క్రొత్త నిర్వహణ పాపము యొక్క పాత అప్పును చెల్లించి స్వాస్థ్యమును గూర్చిన పాత వాగ్దానములను నెరవేర్చుతుంది. మరియు దాని యొక్క మధ్యవర్తి ద్వారా అది దీనిని సాధిస్తుంది.

ఆయన ప్రజల పక్షమున మధ్యవర్తి తుదకు నిబంధన యొక్క షరతులను నెరవేర్చుతాడు అనునది క్రొత్త నిబంధనలో కనుపరచబడిన గొప్ప వ్యక్తీకరణ అయ్యున్నది. ఉదాహరణకు, లూకా 2:21లో ఆయన అబ్రాహాము నిబంధన ప్రకారం సున్నతిని పొందాడు. మత్తయి 5:17-19, లూకా 24:44, మరియు రోమా 8:4 ప్రకారం ఆయన మోషే ధర్మశాస్త్రమును ఉద్ఘాటించాడు మరియు అనుసరించాడు. మత్తయి 1:1-25లో తెలియజేయబడినట్లు ఆయన మెస్సీయ అను దావీదు స్థానమును సొంతం చేసుకున్నాడు.

అంతేగాక, ఈ నిబంధన షరతులన్నిటిని పాటించుట ద్వారా, యేసు దానికి అనుసంధానమైన దీవెనలన్నిటిని సొంతము చేసుకున్నాడు. రోమా. 4:3-25, గలతీ. 3:14-16 మరియు అనేక ఇతర చోట్ల మనము దీనిని చూస్తాము. అయితే ఆయనకు నమ్మకమైన నిబంధన ప్రజలమైన మనతో పంచుకొనుట కొరకు యేసు ఈ ఆశీర్వాదములను సాధించాడు అనునది ఎంతో అసాధారణమైన విషయము. మన నిబంధన మధ్యవర్తి మరియు నిబంధన నాయకుడైన క్రీస్తులో, ప్రతి నిబంధన నిర్వహణ కోరిన సమస్తమైన మానవ స్వామిభక్తి నెరవేర్చబడింది, మరియు ప్రతి నిర్వహణలోని ప్రతి ఆశీర్వాదమును మనము పొందుకుంటాము.

క్రీస్తు ఆయన యొద్ద ఉన్న ఆశీర్వాదములన్నిటిని మనతో ఇంకా పంచుకోలేదు. అయితే ఎఫెసీ. 1:13, 14లో పౌలు వ్రాసినట్లు, మన భవిష్యత్ స్వాస్థ్యమునకు సంచకరువుగా ఆయన మనకు పరిశుద్ధాత్మను అనుగ్రహించాడు. మరియు యేసు తిరిగివచ్చునప్పుడు, దేవుని యొక్క భూలోక రాజ్యములో ఆయన తన ఆశీర్వాదములన్నిటిని మనతో పంచుకుంటాడు. ప్రకటన 21:1-22:5లో వర్ణించబడినట్లు క్రొత్త ఆకాశములు మరియు క్రొత్త భూమి మీద మానవులకు ఇవ్వబడిన రాజ్య నిర్మాణ కార్యము పూర్తైనప్పుడు ఇది జరుగుతుంది. కాలక్రమములో, దేవుని రాజ్యమును నిర్మించునట్లు ఆత్మ మనలను బలపరుస్తాడు, మరియు ఆయన సన్నిధిని నిత్యము ఆనందించునట్లు ఆయన మన హృదయములను సిద్ధపరుస్తాడు.

కృపా నిబంధనను గూర్చిన ఈ పాఠంలో, దాని యొక్క సమయము, త్రిత్వములోని పురుషమూర్తుల యొక్క పాత్రలు, మరియు కృపా నిబంధనలో దేవుని ఆలోచన యొక్క నెరవేర్పును పరిశీలిస్తూ దేవుని నిత్య ఆలోచనను చూశాము. మానవ పాపము, మరియు మనకు మధ్యవర్తిగా క్రీస్తును చూస్తూ దేవుని దైవకృత కార్యముగా నిబంధనను మనము పరిగణించాము. కృపా నిబంధన యొక్క మూలకములైన దేవుని దయ, మానవ స్వామిభక్తి, మరియు ఆశీర్వాదములు మరియు శాపముల పరిణామములను మనము వర్ణించాము. మరియు ఆదాము, నోవహు, అబ్రాహాము, మోషే, దావీదు మరియు యేసు ద్వారా నిబంధన యొక్క చారిత్రిక నిర్వహణను విశ్లేషించాము.

వేదాంతశాస్త్ర మానవశాస్త్రమును గూర్చిన ఈ పాఠ్యక్రమము అంతటిలో, పాపరహితమైన దేవుని స్వరూపములుగా మానవ స్థితితో ఆరంభించి, పతనమైన పాపులుగా మన శపించబడిన స్థితిని, మరియు యేసు క్రీస్తులో మనము పొందిన కృపగల విమోచనను చూశాము. ఈ దశల ద్వారా దేవుడు మనలను నడిపించుటలోని ఉద్దేశ్యములు మంచివిగాను, దయగలవిగాను ఉన్నాయని చూశాము —మనలను విమోచించుటకు ముందు నిశ్చయించుకొనకుండా దేవుడు ఈ పాపము యొక్క పరిణామములను అనుభవించుటకు మనకు అనుమతి ఇవ్వలేదు. మరియు మన విమోచించబడిన స్థితిలో, ఆయన ఆరంభించిన ప్రణాళికను ముగించునట్లు మనము ఆయన కోరిన స్థానములో ఉన్నాము. మన మొదటి తల్లిదండ్రులకు ఇవ్వబడిన రాజ్య-నిర్మాణ ఆజ్ఞను కొనసాగించుటకు మనకు ఆత్మీయ శక్తి ఇవ్వబడినది. మన ప్రతి అపరాధము క్షమించబడియున్నది, ప్రతి నిబంధన శాపము నుండి మనము విముక్తి పొందాము, తద్వారా మనము ఆయన చూపిన దయను బట్టి ఆయనను స్తుతించగలము, ఆయన నిబంధనకు విధేయత చూపుతూ జీవించగలము, మరియు క్రొత్త ఆకాశములు మరియు క్రొత్త భూమిలో మన అంతిమ ఆశీర్వాదముల కొరకు వేచియుండగలము.